exclusive.kz cايتى بولاتحان تايجان اتىنداعى قوردىڭ پرەزيدەنتى، ەكونوميست، قوعام قايراتكەرى مۇحتار تايجان مەن قوعامدىق بەلسەندى گەرويحان قىستاۋباەۆتىڭ اراسىندا اشىق دەبات وتكىزدى. دەباتتىڭ وتۋىنە مۇحتار تايجان مەن گەرويحان قىستاۋباەۆ اراسىندا الەۋمەتتىك جەلىدە كوپتەن بەرى داۋعا اينالعان ماسەلەلەر سەبەپ بولعان. دەباتتى جۋرناليست ءنازيرا دارىمبەت جۇرگىزدى. جارتى ساعاتقا سوزىلعان دەباتتا مۇحتار تايجاننىڭ كاسىپكەرلىك سالاداعى كەيبىر ىستەرى، وتباسى جانە ونىڭ قوعامدىق ىستەرى ءسوز بولدى.

500 توننا پياز

گەرويحان قىستاۋباەۆتىڭ ايتۋىنشا، مۇحتار تايجان الماتى وبلىسى، قاپشاعاي قالاسىنا قاراستى شەڭگەلدى اۋىلىندا پياز وسىرۋمەن اينالىساتىن ادامداردان جيىنى 500 توننا پياز الىپ، اقشاسىن بەرمەي كەتكەن-مىس. بۇعان قارىمتا جاۋاپتا مۇحتار تايجان پياز ماسەلەسىندە ەشكىمدى الداماعانىن ءارى شەڭگەلدى اۋىلىنا بارىپ، «اقشامدى بەرمەي كەتتى» دەگەن ادامدارمەن بەتپە-بەت جۇزدەسۋگە دايىن ەكەنىن ايتتى. وسىمەن، پياز توڭىرەگىندەگى ماسەلەگە ەكى جاقتا نۇكتە قويعانداي بولدى.

جانات ەسەنتاەۆ جانە مۇحتار تايجان

مامىر ايىندا جەر كودەكسىندەگى كەيبىر باپتارعا قاتىستى قوعامدا جەر ماسەلەسى داۋى ءورشىپ، اتىراۋدا حالىق ميتينگىگە شىعىپ، ونىڭ ارتى ءار ايماقتا اكتسيا، ميتينگىلەرگە ۇلاسىپ جاتقان شاقتا ازاماتتىق بەلسەندى جانات ەسەنتاەۆ ۇستالىپ، قىلمىستىق كودەكستىڭ 174-بابىمەن ايىپتالىپ، قامالعان ەدى. تەرگەۋ يزولياتورىندا جاتقان ەسەنتاەۆقا مۇحتار تايجان بارعان ەدى. دەباتتا گەرويحان قىستاۋباەۆ «تۋىستارىنىڭ ءوزىن كەزدەستىرمەي وتىرعان تەرگەۋدەگى ادامعا سەنى قالاي كىرگىزدى؟» دەگەن ساۋالىنا مۇحتار تايجان ەسەنتاەۆپەن باس پروكۋراتۋرانىڭ كومەگىمەن بارعانىن جانە ونىمەن كەزدەسۋگە كىرمەس بۇرىن ورالداعى ازاماتتىق بەلسەندىلەرمەن جولىعىپ، ەسەنتاەۆتىڭ وتباسىنا حابارلاسىپ، بارلىق تاراپپەن اقىلداسا كەلىپ، سونداي شەشىمگە كەلگەندەرىن ايتتى. دالەلدەرىن كورسەتتى.

تايجان اۋلەتى

گەرويحان قىستاۋباەۆ مۇحتار تايجاننىڭ وتباسىنا قاتىستى دا جايتتاردى ايتتى. ونىڭ اتا-اناسىنىڭ اجىراسۋ، مۇلىك ءبولىسى جايلى ءسوز ەتتى. الايدا، مۇحتار تايجان ناقتى قۇجاتتار كورسەتىپ، گەرويحان قىستاۋباەۆتىڭ سوزدەرىنىڭ نەگىزسىز ەكەنىن دالەلدەدى.

جەر رەفورماسى جانە م.تايجان

ستۋديادا وتىرعان، اتى-ءجونىن اتاماعان بەلگىسىز ءبىر ادام م.تايجانعا «جەر ماسەلەسى كەزىندە حالىقتى ميتينگىگە شىقپاڭدار دەپ ۇگىتتەدى. سوعان حالىق رەنىشتى، مەن دە رەنجىۋلىمىن» دەدى. بۇعان جاۋاپ رەتىندە تايجان «جاس الاش» گازەتى رەداكتسيادا جەر ماسەلەسى بويىنشا ميتينگ وتكىزۋگە رۇقسات الۋ، وتكىزۋ، ۇيىمداستىرۋ ماسەلەلەرى بويىنشا وتكەن قوعامدىق باستامانىڭ باسى-قاسىندا بولعانىن، ودان كەيىن قۇرىلعان جەر رەفورماسى جونىندەگى كوميسسيا جۇمىسىنىڭ ناتيجەلى بولعانىن ايتتى. ءارى سۇراق قويعان ادامنىڭ ايتقانىن ونىڭ جەكە پىكىرى دەپ قابىلدايتىنىن دا اتاپ ءوتتى.

دەباتتىڭ اقىرى

دەبات سوڭىندا م.تايجان مەن گ.قىستاۋباەۆقا ءبىر-ءبىر اۋىز ءسوز ايتۋعا ۋاقىت بەرىلدى. تايجان ءوز كەزەگىندە دەباتتى ۇيىمداستىرعان رەداكتسياعا راحمەت ايتىپ، گەرويحان قىستاۋباەۆقا جاۋلىعى جوق ەكەنىن، سول سەبەپتى تاتۋلاسۋعا شاقىردى. تايجان ورتاعا شىعىپ، قىستاۋباەۆپەن قول الىستى. بىراق، قىستاۋباەۆ تايجاننىڭ الەۋمەتتىك جەلىدە ەسىمىن بۇرمالاپ، ءاجۋا ەتكەنىن ايتىپ، توقتامادى. ءسويتىپ، دەبات تا اياقتالدى.

نۇرا ماتاي

Abai.kz