بۇگىن ەلوردادا ۇكىمەتتىڭ كەزەكتى جيىنىن اشقان پرەمەر-مينيستر باقىتجان ساعىنتاەۆ اۋەلى ۇزىناعاشتاعى قاندى وقيعاعا قاتىستى مارقۇمداردىڭ وتباسىنا كوڭىل ايتىپ، ىشكى ىستەر مينيسترىنە قاتاڭ تاپسىرما بەردى.

كىسى قولىنان اجال قۇشقان ءۇش جىگىتتىڭ قاسىرەتتى قازاسى ءار قازاقتىڭ قابىرعاسىن قايىستىرىپ كەتكەنى راس. ەستەرىڭىزگە سالا كەتەيىك، ءبىز بۇل ماسەلەگە قازاقستان رەسپۋبليكاسىنىڭ ىشكى ىستەر ءمينيسترى قالمۇحانبەت قاسىموۆ مىرزادان باستاپ، وزگە دە قۇزىرەتتى ورگانداعى جاۋاپتى تۇلعالار نازار اۋدارىپ، جۇمىلا كىرىسۋى كەرەكتىگىن جازعان ەدىك (http://abai.kz/post/view?id=9974). ەندى بۇل ىسكە پرەمەر-ءمينيستردىڭ ءوزى ارالاسىپ، ءىس بارىسىن باقىلاۋىندا ۇستايتىنىن ءمالىم ەتتى.

مينيسترلەردىڭ باسى قوسىلعان كەزەكتى جيىندى اشپاس بۇرىن ۇكىمەت باسشىسى ۇزىناعاشتاعى قاندى وقيعا تۋرالى ءسوز ەتتى. اعايىندى ءۇش جىگىتتىڭ قازاسىنا قاتىستى ىشكى ىستەر ءمينيسترى قالمۇحامبەت قاسىموۆقا ءىستى ءجىتى باقىلاۋعا الۋدى تاپسىردى.

«قازىر باق بەتتەرىندە قىلمىس تۋرالى كوپ ايتىلۋدا. بىزگە بەلگىلى بولعانداي، الماتى وبلىسىندا قازىر كۇدىكتىلەر ۇستالعان، تەرگەۋ امالدارى جۇرگىزىلىپ جاتىر. بۇل ءىس حالىقتى تولعاندىرىپ وتىرعاندىقتان، بىزگە ناقتى دەرەك بەرۋىڭىزدى سۇرايمىن»، - دەدى باقىتجان ساعىنتاەۆ.

ۇكىمەت باسشىسىنىڭ  سوزىنەن كەيىن ىشكى ىستەر ءمينيسترى ءسوز الىپ، قىلمىسكەرلەردىڭ قالاي ۇستالعاندىعىن ءمالىم ەتتى.

«20 قىركۇيەكتە بىزگە الماتى وبلىسىندا مال ساتۋعا شىققان ءۇش جىگىتتىڭ ۇشتى-كۇيلى جوعالعانى تۋرالى اقپارات كەلىپ ءتۇستى. 21 قىركۇيەكتە ءبىز جوعالعان جىگىتتەرگە تيەسىلى ەكى جۇك كولىگىنىڭ ءبىرىن تاپتىق. وسى ەكى كولىكپەن ولار 41 باس مالدى بازارعا الىپ بارعان. ال، 23 قىركۇيەكتە ەكىنشى جۇك كولىگى تابىلدى. قىلمىسقا قاتىستى كۇدىكتىلەر جامبىل اۋدانىنىڭ تۇرعىندارى بولىپ شىقتى. ولار مايىتتەردى قايدا كومىپ تاستاعانىن ءوز ەرىكتەرىمەن كورسەتكەن. ءتيىستى سوت-مەديتسينالىق ساراپتاما تاعايىندالىپ، تەرگەۋ امالدارى ءجۇرىپ جاتىر»، - دەدى ىشكى ىستەر ءمينيسترى قالمۇحانبەت قاسىموۆ.

نۇرزات توعجان

Abai.kz