جاقىندا «Abai.kz» پورتالىندا ەلباسى نۇرسۇلتان ءابىشۇلىنىڭ اتىنا جولدانعان ءۇشبۋ حات جاريالاندى. "تۇڭعىشباي جامانقۇلوۆ جەتەكشىلىك ەتەتىن قازاقستاننىڭ تەاتر قايراتكەرلەرى وداعان قاتاڭ تەكسەرۋدەن وتكىزۋ كەرەك" دەگەن تالابى بار حاتقا ءاسانالى ءاشىموۆ باستاپ، مەرۋەرت وتەكەشوۆا قوشتاعان الماتىلىق جەتى ونەر قايراتكەرى قول قويعان.

حاتتا جازىلعان داۋلى ماسەلەگە بايلانىستى بۇگىن قر تەاتر قايراتكەرلەرى وداعىنىڭ توراعاسى تۇڭعىشباي جامانقۇلوۆ ءسوز الىپ وتىر.

- تۇڭعىشباي اعا، ءوزىڭىزدىڭ ارىپتەستەرىڭىز بىرىگىپ، ەلباسىنا حات جازدى. وقىدىڭىز با؟

- كوردىم، وقىدىم. ەندى مەن نە ايتام؟!. بىرىنشىدەن، مەنىڭ اتىمداعى فەستيۆال تۋرالى ايتايىن. «تۇڭعىشباي تارازعا شاقىرادى» دەگەن فەستيۆالدى قازاقستان تەاتر قايراتكەرلەرى وداعى وتكىزگەن جوق. ونىڭ بارلىعىنا قاراجاتىن ءبولىپ، ءجون-جورالعىسىن جاساپ وتكىزگەن جامبىل وبلىستىق اكىمشىلىگى جانە سول اكىمشىلىكتىڭ مادەنيەت جانە مۇراعات دەپارتامەنتى. وعان وداقتىڭ ەشقانداي قاتىسى جوق. مەن ءوزىم تارازدىق بولعان سوڭ، جەرلەستەرىم ۇسىنىس ايتىپ، "وسىنداي فەستيۆال جاسايىق" دەدى. مەنىڭ اتىمدى سۇرادى. مەن "جاقسى" دەپ، كەلىسىمىمدى بەردىم. ول فەستيۆالدەرى كەيدە حالىقارالىق دەڭگەيدە ءوتىپ، وعان پولشا، چەحيادان ارتىستەر كەلدى. كەيدە رەسپۋبليكا دەڭگەيىندە وتكىزىلىپ ءجۇر.

- حاتتا ايتىلعانداي، ءسىز جەتەكشىلىك ەتەتىن وداق ەشقانداي شارا وتكىزبەيدى ەكەن عوي. جالعىز وسى فەستيۆالدەن باسقا... ول دا وداقتىڭ جوباسى بولماي شىقتى.

- بۇل ەندى ەكىنشى ماسەلە. مۇنداي فەستيۆال وتكىزۋگە وداقتىڭ قاراجاتى جوق. بىلەسىز بە؟ ءبىزدىڭ وداقتا ونداي بيۋدجەت جوق. مينيسترلىك بىزگە ءبىر تيىن دا اقشا بولمەيدى. ءبىز جىل سايىن ءوز جوبالارىمىزدى مينيسترلىككە جولدايمىز. وكىنىشكە وراي مادەنيەت جانە سپورت مينيسترلىگى ءبىزدىڭ حاتتارىمىزعا جاۋاپ بەرمەيدى.

- نەگە؟

- بىلمەيمىن عوي. ايتەۋىر ەشبىر ۇسىنىسىمىزدى قۇپتاعان كەزى بولعان جوق.

- ال «ەڭلىك گۇل» سىيلىعىن ەشكىم تانىمايتىن اكتەرلەرگە بەردى دەيدى حاتقا قول قويعان جەتى ادام. بۇعان نە دەيسىز؟

- راس، «ەڭلىك گۇل» سالتاناتىن ءبىزدىڭ وداق جاساپ جاتىر. مەن توراعا بولعالى بەرى وتكىزىلىپ كەلەدى. مۇنىڭ جەكە دەمەۋشىسى بولدى. العاشقى 5-6 جىلدا "قازمۇنايگاز" كومپانياسى دەمەۋشىلىك كورسەتتى. ودان كەيىن ءبىر جىل دەمەۋشى بولماي قالدى. بيىل  تاعى ءبىر جەكە كاسىپكەر دەمەۋشى بولدى. اناۋ ەسىكتى ءبىر، مىناۋ ەسىكتى ءبىر قاعىپ ءجۇرىپ تاپقان قاراجاتىمىزعا وتكىزدىك. ەندى ول جۇلدەلەردى كىمدەر الادى دەگەنگە كەلسەك: قازاقستاننىڭ بارلىق وبلىستارىنداعى تەاترلاردان ۇمىتكەرلەر قابىلدانادى. بۇكىل وڭىرلەردەگى وبلىستىق تەاترلاردىڭ اكتەرلەرى ءبىر جىل بويى ءوزى سومداعان ۇزدىك رولدەردىڭ بەينە نۇسقاسىن جىبەرەدى. مارەگە 2 اي قالعاندا بىزدەگى تاۋەلسىز ساراپشىلار  اكتەرلەردىڭ ىشىنەن سۇرىپتاپ، ەڭ ۇزدىكتەرىن انىقتايدى.

- ولار كىمدەر؟ قانداي تاۋەلسىز ساراپشىلار؟

- ولار مىناۋ عىلىم اكادەمياسىندا قىزمەت ەتەتىن،  ونەرتانۋ عىلىمىنىڭ دوكتورلارى، عىلىم كانديداتتارى. وندا جالعىز اكتەرگە عانا ەمەس، رەجيسسەرى، سۋرەتشىسى بار، بارلىعى 7 نوميناتسيا بويىنشا سىيلىق بەرەمىز. سوڭعى ساتتە جاڭاعى جەتى ورىنعا 14 ادام ۇمىتكەر بولادى. ءبىر ورىنعا ەكى ادامنان تالاسادى. ول شەشىمدى تاۋەلسىز ساراپشىلار 1 اي بويى ۇمىتكەرلەردىڭ جۇمىستارىن باقىلاپ، ەكشەپ بارىپ شىعارادى. پرەزيديۋم مۇشەلەرى "ەرتەڭ جۇلدە بەرىلەدى" دەگەن كۇنى جابىق داۋىسپەن جەڭىمپازدى انىقتايدى. ەڭ باستى نوميناتسياسى 1 ميلليون تەڭگە.  اقتىق سىنعا شىققان ۇمىتكەرلەر دە 200-300 مىڭ تەڭگەدەن سىيلىق الادى.

- بايقاپ وتىرساق، حات جازعان قايراتكەرلەردىڭ دە سىزگە وكپەسى قارا قازانداي كورىنەدى. 

- راس ايتاسىڭ، مىناۋ حاتتى جازعاندار الماتىنىڭ اكتەرلەرى عوي. وبلىستىق تەاترلاردا قانداي اكتەرلەر بار ەكەنىن بىلمەيدى دە ولار. اشىعىن ايتاتىن بولساق، وزدەرىن "ەڭ مىقتىمىن" دەگەن سەزىم بيلەپ العان مىرزالار مەن حانىمدار.  بۇل جەردە بۇلار ء"بىز سىيلىقسىز قالدىق" دەپ جاتىر. ال وبلىستاردا ونەردىڭ جۇگىن وگىزدەي ارقالاپ، ماڭداي تەرلەرىن توگىپ، قىزمەت ەتىپ جۇرگەن جاندار بار. الگى "سىيلىقسىز قالعاندار" سول اكتەرلەردىڭ نامىسىنا ءتيىپ وتىر دەپ ەسەپتەيمىن. وبلىستىق تەاتردىڭ اكتەرلەرى بۇل اكتەرلەردەن اسىپ تۇسپەسە، كەم تۇسپەيدى.

- تۇڭعىشباي اعا، قولامتانى قوزداتىپ، شالانى ۇرلەگەنىمىز ەمەس، سوندا دا سۇراساق. وسى ۋاقىتقا دەيىن ء«لام-ميم» دەمەگەن قايراتكەرلەردىڭ كەنەتتەن ءسىزدى "تەاتر قايراتكەرلەرى وداعىنىڭ جۇمىسىن تەكسەرۋ كەرەك" دەپ تالاپ كوتەرۋىنىڭ استارىندا نە سىر جاتىر؟

- مىنا «ەڭلىك گۇلدىڭ» بولىپ جاتقانىنا بيىل جەتىنشى جىل. وسىعان دەيىن الگى كىسىلەر، راسىندا،  قايدا جۇرگەن؟ نەگە بىلتىر وسى ماسەلە كوتەرىلگەن جوق؟ ال، اسەكەڭدى ء(اسانالى ءاشىموۆتى ايتادى.-رەد) ءبىز جىل سايىن شاقىرامىز، ول كىسى كەلمەيدى. سونان سوڭ بۇل كىسى وداقتىڭ جۇمىسىنان ەش حابارى جوق. ارالاسپايدى، اتسالىسپايدى. مەنىڭشە الگى حاتتىڭ ارتىندا ءمينيستردىڭ ءوزى تۇرعان سياقتى.

- مينيسترمەن اراڭىزداعى ماسەلەنىڭ ءمان-جايى وزدەرىڭىزگە ءمالىم. دەسە دە، ءسىز بىلدەي ءبىر وداقتى باسقارىپ وتىرسىز. ءسىزدىڭ ارتىڭىزدا قازاقستاننىڭ بارلىڭ وڭىرلەرىندەگى تەاتر قىزمەتكەرلەرىنىڭ اماناتى، سەنىمى تۇر. وسى داۋلار وداق جۇمىسىنا زارارىن تيگىزەدى دەپ ويلامايسىز با؟

- سالقىنى تيسە، تەك وسىنداي وسەك-اياڭ تاراتۋعا عانا سالقىنى تيەر. ءبىزدىڭ مينيسترمەن تەكەتىرەسىمىز ول رەكتور بولىپ تۇرعان كەزدە باستالعان. مەن جۇرگەنوۆتە ساباق بەرەمىن. ول - رەكتور. بار بولعانى ۇكىمەتتەن 12 گرانت بولىنەدى، سول كەزدە. ارىستانبەك مىرزا بارلىق 12 گرانتتى ءوزىنىڭ تىزىمىمەن جاساۋعا تىرىستى. بۇل وسىدان 4 جىل بۇرىن بولعان اڭگىمە. مەن بۇل ءتىزىمدى ورىنداي المايتىنىمدى اشىق ايتتىم. سول جەردەن ءبىزدىڭ ايقاس باستالعان. ول كىسى ماعان دوق كورسەتتى. «سەن مەنىڭ كىم ەكەنىمدى بىلمەيدى ەكەنسىڭ، مەن سەنى جۇمىستان شىعارىپ جىبەرەمىن» دەگەن سوزدەر ايتىلعان سوڭ، ەكەۋىمىز شەكىسىپ قالدىق. سول تەكەتىرەس ءمينيستردىڭ كوڭىلىندە ساقتالىپ قالعان ەكەن. سودان ول كىسى مينيستر بولا سالا، مىنا ءبىزدىڭ وداقتىڭ سەزدىن وتكىزىڭدەر دەپ بۇيرىق سوقتى.

ونى جاسايتىن مينيستر ەمەس، وداقتىڭ پرەزيديۋمى. ەندى تاعى ءبىر ماسەلە - بۇل كىسى كينو سالاسىنىڭ بىلگىرى عوي. وسى سالامەن قاتتى اينالىسادى. 2012 جىلى مەنىڭ «فەنيكس» دەگەن جوبام باستالعان ەدى. قاراجاتتى جاراتۋعا ارنالعان سمەتا بولادى. سوعان سايكەس، ءبىز دايىندىق جۇمىستارىنا، تەحنيكالىق قۇرالدارعا 60 ميلليون تەڭگەدەي جۇمسادىق. قاي ايدا، قانشا اقشا، قايدا جۇمسالاتىنىن «قازاقفيلم» باسشىلىعى رەتتەپ وتىرادى. قاتاڭ باقىلاۋدا. سودان ءبارى رەتىمەن كەلە جاتقاندا، دايىندىق جۇمىستارى اياقتالىپ، ەندى مىنە كينو ءتۇسىرىلىمىن باستايمىز دەگەندە ارىستانبەك مىرزا جوبانى توقتاتىپ تاستادى.  قانشا ادام ايلىقسىز قالدى. ول تاعى بار. سوندىقتان ءبىز سوتقا دا جۇگىندىك. وكىنىشكە وراي ەش ناتيجە بولمادى. ەڭ سوڭىندا بىزگە بولىنگەن 470 ميلليون تەڭگەنى مينيستر  «قازاق ەلى» سەريالىنا اۋدارىپ جىبەردى. جاعداي وسىنداي.

- ءوزىڭىز ايتىپ وتىرسىز، قر تەاتر قايراتكەرلەرى وداعىنىڭ بارلىق قارجىلىق ماسەلەلەرى قيىنداپ تۇر دەپ. سونداي-اق، ءسىز ەلباسىنىڭ قابىلداۋىندا بولدىڭىز. سوندا بۇل ماسەلەلەر ايتىلعان شىعار؟

- مەن ەندى ءبىزدىڭ وداق جايىندا مينيسترگە قانشاما رەت حات جازدىم. ەلباسىنىڭ ءوزى «قوعامدىق ۇيىممەن جۇمىس ىستەڭدەر» دەپ تاپسىرعان. ال ول كىسى كينومەن عانا جۇمىس ىستەيدى ەكەن. بىزبەن شارۋاسى دا جوق. ەشقانداي جينالىستارىنا شاقىرمايدى. ءتىپتى دەسەڭىز، ءبىز وداقتىڭ اتىنان جىل سايىن قۇرمەتتى اتاقتارعا قازاقستاننىڭ بارلىق وڭىرلەرىنەن ءبىرسىپارا اكتەردى ۇسىنامىز. مينيستر ءبىزدىڭ حاتتارعا ءبىر دە ءبىر رەت جاۋاپ بەرگەن ەمەس. ەستۋىمشە، وسكەمەن تەاترىنىڭ اكتەرى ساحان الەكەەۆ دەگەن جىگىت سول مينيسترمەن بىرگە وقىعان ەكەن. بارىپ، «مەنى وسى وداق مىناداي ماراپاتقا ۇسىنىپ وتىر ەدى. سول جاعى نە بولدى، ارەكە؟» دەپ جولىعىپتى. سويتسە،  مينيستر «ول وداقتىڭ ەشقانداي اتاققا ۇسىنۋعا قاقىسى جوق» دەپتى. بۇل دەگەنىڭىز الباتى ءسوز. كەز كەلگەن قوعامدىق ۇيىم اتاققا ۇسىنا الادى. ال ەندى تەاتر اكتەرلەرىن اتاققا ءبىزدىڭ وداق ۇسىنباعاندا كىم ۇسىنۋى ءتيىس؟

- ەندى جاڭاعى حاتقا قايتا ورالساق، اسەكەڭ مەن مەرۋەرت اپايلار باستاپ سىزگە قارسى حات جازۋى كۇتپەگەن جاعداي. دەسەك تە، ءاسانالى اعامەن اراڭىزداعى ارازدىقتىڭ دا ىقپالى بار بولۋى مۇمكىن عوي؟ 

- ءاسانالى اعامىز مينيستر ارىستانبەك مىرزانىڭ ارقا سۇيەپ جۇرگەن اعاسى. جىل سايىن اتاق-قۇرمەتىن، ستەپەندياسىن بەرىپ جارىلقاپ جۇرگەن ادامى. قايتالاپ ايتامىن. «ەڭلىك گۇل» سىيلىعىن العانداردىڭ 70 پايىزى وڭىرلەردەگى اكتەرلەر. وبلىستىق تەاترلاردا ايىنا 20-30 مىڭ تەڭگە ايلىق الىپ جۇرگەن، سويتە تۇرا ساحناعا ادال قىزمەت ەتىپ جۇرگەن ازاماتتار. راس، قالعان 30 پايىزى وسى الماتىنىڭ نارداي تەاترلارىندا جۇرگەن دارداي اكتەرلەر.  قازىرگى تاڭدا وبلىستاردا 2000-نان استام اكتەر بار. ولاردىڭ ەشقايسىسى ءاسانالى نەمەسە مەرۋەرتتەن كەم ەمەس.  كەرەك دەسەڭىز، دارىنى اسىپ تۇسەتىن اكتەرلەر بار. تەك ولار كورىنبەي ءجۇر. ال ەندى اكتەرلەردىڭ باسى قوسىلمايدى دەگەنگە كەلەتىن بولساق، ءبىزدىڭ وداق مەملەكەتتەن ءبىر تيىن اقشا المايدى.

- قر تەاتر قايراتكەرلەرى وداعى شىعاراتىن جۋرنال بار عوي...

- وداق شىعاراتىن «تەاتر» دەگەن جۋرنالعا جىل سايىن بەرەتىن 1 ميلليون تەڭگەسى بار ەدى. بيىل ول دا جوق. قازىر ءۇش ايدىڭ نومەرى شىقپاي تۇر. سەبەبى - اقشا جوق. مۇشەلىك جارنادان تۇسەتىن ازىن-اۋلاق تيىن-تەبەن وداقتىڭ ەش جىرتىعىن جامامايدى. جارنانىڭ قۇنى – 500 تەڭگە. سونداعى جينالاتىنى 700-800 مىڭ تەڭگە سالىق، كوممۋنالدىق شىعىن سەكىلدى ۇساق-تۇيەكتەن اسپاي قالادى. ال جۋرنال ايىنا ءبىر رەت شىعۋى كەرەك. ونىڭ باسپاحاناسىنا كەمىندە 600 مىڭ تەڭگە جۇمسالادى. اۋ سوندا مەن ءبىر تيىنسىز وتىرعان وداققا جەكە دەمەۋشىلەردى تارتىپ، ءوزىمنىڭ از-ماز بەدەلىمدى پايدالانىپ، اركىمنىڭ ەسىگىن ءبىر قاعىپ ءجۇرىپ، «ەڭلىك گۇلدى» وتكىزسەم، وندا وبلىستاردا كورىنبەي جۇرگەن تالانتتى اكتەرلەرگە سىيلىق بەرسەم، كىنالىمىن بە؟

الدە مەن تەاتردا كوپتەن بەرى ەشقانداي ءرول ويناماي جۇرگەن مەرۋەرت وتەكەشوۆاعا سول «قىز جىبەك» ءۇشىن قايتا-قايتا سىيلىق بەرە بەرەيىن بە؟ اسەكەڭە ول سىيلىقتىڭ نە كەرەگى بار؟

- ءجون عوي. دەگەنمەن سۇراعىما جاۋاپ بەرمەدىڭىز...

- راس، ءبىز اسەكەڭ ەكەۋىمىز اكەمتەاتردىڭ 90 جىلدىعىندا ارامىزداعى ەسكى داۋدى ۇمىتىپ، قول الىسىپ، كەۋدە قاعىستىرىپ، تاتۋلاستىق. مەن سوندا اسەكەڭە كەلىپ: «اسەكە-اۋ، ارامىزدا از-كەم ارازدىقتى ۇمىتايىق. مەن ءىنىڭىز رەتىندە ارتىق كەتسەم، كەشىرىڭىز. قاشانعى بۇلاي جۇرەمىز؟ ءبىز باس بولىپ، باسقا اكتەرلەردىڭ دە باسىن قوسايىق» دەدىم. سودان بەرى كەرەمەت ءجۇر ەدىك، مىنا حاتتا اسەكەڭ كەلىپ مەنى جاقسىلاپ سىباپ تاستاپتى. سوسىن وتكەندە ايمان مۇساحودجاەۆانىڭ كونتسەرتى بولدى، اباي اتىنداعى تەاتردا. سوندا  اسەكەڭ ءجۇر ەكەن. مەن بارىپ امانداسۋعا باتپادىم. سويتسەم اسەكەڭ: ء«اي، تۇڭعىشباي، بەرى كەل. نە بولدى، امانداسۋدان قالدىڭ با؟» دەدى. مەن: «اسەكە-اۋ، قورقىپ تۇرمىن. وتكەندە عانا بار وكپەنى ۇمىتىپ، تاتۋلاسقان ەدىك. ارتىنشا ءسىز سولاي دەپسىز. ەندى بارىپ امانداسسام، قولىمدى قاعىپ تاستاي ما دەپ قورقاقتاپ تۇرمىن» دەدىم، ءازىل-شىنى ارالاس. سوندا اسەكەڭ: «و، نەسى-ەي؟!» دەپ اڭ-تاڭ قالدى. مەن ءتۇسىندىردىم، وسىلاي دا وسىلاي ەكەن دەپ. سوندا اسەكەڭ: «ماعان وتكەندە ءبىر بالالار حابارلاسىپ، "سەزد وتكىزۋ كەرەك" دەدى. مەن "ە، وتكىزسەڭدەر وتكىزىڭدەر" دەدىم. باسقا ەشتەڭەسىن دە بىلمەيمىن» دەدى. ەندى الدەكىمدەر وسىدان دارداي قىلىپ، شۋ شىعارىپ جاتقانعا ۇقسايدى.

- مەرۋەرت وتەكەشەەۆا دا «ratel.kz» سايتىنا پىكىر بىلدىرگەن ەكەن. ول كىسى دە اسەكەڭنىڭ ايتقانىنداي، بىرەۋلەر حابارلاسقاندا «ە، جاقسى» دەي سالىپتى...

- مەرۋەرت وتەكەشوۆاعا دا بىرەۋلەر حابارلاسىپ، «سەزد وتكىزۋ كەرەك» دەسە، مەرۋەرت «وتكىزسەڭدەر وتكىزىڭدەر» دەپتى.  سوسىن جاڭاعى حاتقا قول قويعان سايلاۋبەك اسىلحانوۆقا حابارلاستىم. سويتسەم، «ويباي، تۇڭعىشباي، ەشقانداي حابارىم جوق» دەپ اڭ-تاڭ. ءتىپتى وزىمنەن سۇراپ وتىر «نە دەپپىن؟» دەپ...

- زينات اكباروۆا اپاي ۇيعىر تەاترىنىڭ اكتريساسى...

- زينات الپىستان اسىپ قالعان اكتريسا عوي. ۇيعىر تەاترىندا ىستەيدى. مەن ول جاققا دا حابارلاسىپ كوردىم.  ۇيعىر تەاترىنىڭ ديرەكتورى يالقۇنجان شاميلوۆ دەگەن جىگىتكە حابارلاسىپ ەم، «تۇقا، زيناپ اپاي اۋىرىپ جاتقالى قاشان. ونداي حاتقا قول قويعان جوق. حابارى دا جوق. سولاي ما ەكەن؟!» دەپ وتىر.

ەندى اناۋ تاتيانا تاراسوۆا دەگەن اكتريسا 2014 جىلى مەنى توراعالىققا سايلاعان كەزدە: «ويباي، تۇقا، ءسىز باسشىلىققا كەلگەلى وداق جاندانىپ، ءتىرىلىپ قالدى. سوندىقتان سەزگە قاتىسۋشىلار، تۇقاڭنىڭ كانديداتۋراسىن جابىق ەمەس، اشىق داۋىس بەرىپ-اق سايلايىق» دەپ ۇسىنىس جاساپ، مەنى توراعالىققا اشىق سايلاعان ادام ەدى. تاتيانانىڭ تەرىس اينالعانىنا سەنە المايمىن.

وداق عيماراتىنا كەلەر بولساق، راس، بىزدە ەشقانداي عيمارات جوق. جاڭاعى ءوزىڭ ايتقانداي، مەن 2014 جىلدىڭ 21 تامىز كۇنى ەلباسىنىڭ قابىلداۋىندا بولدىم. سوندا جەلتوقسان كوشەسىندەگى اكتەرلەر ءۇيىن بىزگە كەڭسە رەتىندە پايدالانۋعا سۇرادىم. سوندا نۇرسۇلتان ءابىشۇلى بۇل تاپسىرمانى مادەنيەت ءمينيسترى ارىستانبەك مۇحاماديۇلىنا جۇكتەپ، ماسەلەنى تەزدەتىپ شەشىپ بەرۋدى تاپسىرعان. سودان دا ەشقانداي ناتيجە بولمادى. كەيىن  مەمحاتشى گۇلشارا ابدىحالىقوۆاعا كىردىم. ول قايتادان ارىستانبەككە تاپسىرما بەردى. ال مينيستر مىرزا اراداعى باياعى رەنىشتى ۇمىتا الماي ءجۇر...

- ەندى ءبىر عانا سۇراق. ەگەر سەزد شەشىم قابىلداپ، وداق توراعالىعىنان كەت دەسە، كەتەسىز بە؟

- جاقسى، مەن كەتەيىن. مەن بۇل ورىنعا جابىسىپ وتىرعانىم جوق. مەنىڭ ورنىما ىسكەر، تالانتتى جاس ادام كەلسە، ءتىپتى، مەن وعان كومەكتەسۋگە دايارمىن. ال ەندى وسەك-اياڭ تاراتىپ، ۇيات تىرلىك جاساپ وتىرعانداردىڭ ارتىندا قانشاما بىلىق جاتىر. مەن ونى جاقسى بىلەمىن. جانە جۇرت قۇساپ، ولاردىڭ ارتىن قازبالاپ جاتقانىم جوق. ول ءوز الدىنا بولەك اڭگىمە. حوش، ءبىز جاقىندا پرەزيديۋم شاقىرامىز. سوندا جاڭاعى حاتتى جازعان جەتى قايراتكەردى دە شاقىرامىز. سىزدەر دە كەلىپ قاتىسىڭىزدار. سوندا بارلىعى ويىنداعىسىن ورتاعا سالسىن. ال مەن قايتالاپ ايتامىن، بۇل ورىنعا جابىسىپ وتىرعام جوق. مينيستر اقشا بەرسىن وداققا، سوسىن كەزەكتەن تىس سەزد وتكىزىپ، سول جەردە تاعايىندايتىن ادامىن تاعايىنداسىن. الدىمەن مينيستر ارىستانبەك مىرزا وداقتىڭ جاعدايىن، وبلىستارداعى تەاتر اكتەرلەرىنىڭ جاعدايىن ءبىلىپ السىن. ايىنا 20-30 مىڭ تەڭگە جالاقىعا وبلىستىق تەاترلاردا قىزمەت ىستەپ جۇرگەن ازاماتتارعا قولداۋ جاساپ، «ەڭلىك گۇل» سىيلىعىن بەرگەنىم ءۇشىن مەن-اق كىنالى بولا قويايىن. بارى - وسى.

سۇحباتتاسقان نۇرگەلدى ابدىعانيۇلى

Abai.kz