مەملەكەت باسشىسىنىڭ تاپسىرماسىمەن ءام مەملەكەتتىك باعدارلاما اياسىندا وڭتۇستىك حالقى سولتۇستىككە كوش باستاعان بولاتىن. الدىڭعى لەك جايعاسىپ، جۇمىسپەن قامتىلعان. اتالعان باعدارلامانىڭ جالعاسىن تاۋىپ جاتقاندىعى تۋرالى حابار جاقىندا كەلدى. سويتسەك، وڭتۇستىكتەن تاعى 25 وتباسى سولتۇستىككە كوشپەككە بەل بايلاپتى.

شىمكەنت قالاسىنان جانە تولە بي اۋدانىنان جينالعان تۇرعىندار شوقان ءۋاليحانوۆ اۋدانىنداعى اقجار اۋىلىنا كوشىپ بارادى. ولار تۇگەلدەي جۇمىسپەن قامتىلىپ، ءوڭىردىڭ اۋىل شارۋاشىلىعىن دامىتۋعا اتسالىساتىن بولادى، دەپ جازادى otyrar.kz شىمكەنتتىك گاۋھار بالتاباەۆا جۋىردا جايعاساتىن جەرىن كوزبەن كورىپ قايتتى. باسپانام دا، جۇمىس ورنىم دا كوڭىلىمنەن شىقتى دەيدى. بىرنەشە جىل بويى ماتەماتيكا پانىنەن ساباق بەرىپ كەلگەن مۇعالىم ەندى بۇل جۇمىسىن سولتۇستىكتە جالعاستىراتىن بولادى. قونىس اۋدارۋشىلاردىڭ اراسىندا جۇمىسسىزدار مەن باسىبايلى باسپاناسى جوق تۇرعىنداردىڭ قاراسى كوپ. الايدا، بارلىعى دا ەڭبەككە قابىلەتتى. يگى باستامانىڭ باسى-قاسىندا جۇرگەن حالىق قالاۋلىلارى سولتۇستىككە ات باسىن بۇرعانداردىڭ بارلىعىنىڭ دا باسپاناسى دايىن دەپ سەندىرەدى. ايتۋلارىنشا، ولارعا ءبىر رەتتىك مەملەكەتتىك سۋبسيديادان بولەك ەگىن ەگەتىن جەر دە بەرىلەدى. كاسىپ باستاۋ ءۇشىن تومەن پايىزبەن نەسيە دە الا الادى. ايتا كەتەيىك، جىل باسىنان بەرى وبلىستان 80-نەن استام وتباسى سولتۇستىك وڭىرگە كوشكەن. ۇيىمداستىرۋشىلار نيەت بىلدىرۋشىلەردىڭ قاتارى 200-دەن اسىپ جىعىلادى دەيدى. الايدا، وڭىردە بۇل ماقساتقا نەبارى 100 كۆوتا بولىنگەن.

Abai.kz