وڭتۇستىك قازاقستان وبلىسىندا اۋىل شارۋاشىلىعى سالاسىندا يننوۆاتسيالىق تەحنولوگيالاردى ەندىرۋ ماسەلەسى عىلىممەن بايلانىستا جولعا قويىلىپ كەلەدى. جۋىردا وبلىس ورتالىعىندا  قازاق ۇلتتىق اگرارلىق ۋنيۆەرسيتەتىنىڭ رەكتورى ت.ەسپولوۆ باستاعان جوعارى وقۋ ورنى عالىمدارىنىڭ قاتىسۋىمەن سەمينار-جيىن ءوتتى، دەپ حابارلايدى وقو اكىمدىگىنىڭ ءباسپاسوز قىزمەتى. 

جيىن بارىسىندا وڭتۇستىك قازاقستان وبلىسىنىڭ اۋىل شارۋاشىلىعى سالاسىندا يننوۆاتسيالىق تەحنولوگيالاردى ەندىرۋ ماسەلەسى ءسوز بولعان. جيىندا عالىمدار قاتىسۋشىلاردى سۋارمالى جەرلەرگە يننوۆاتسيالىق تەحنولوگيالاردى ەندىرۋ، ءىرى قارا مالدىڭ تۇقىمىن ساقتاپ قالۋ، قارقىندى باۋلاردا الما ءوسىرۋدىڭ سونى تەحنولوگياسىن ەندىرۋ جانە وزگە دە باعىتتار اياسىندا عىلىمي جۇمىستارىمەن تانىستىردى. سەمينار-جيىن سوڭىندا اكىمدىك پەن اتالعان جوعارى وقۋ ورنى اراسىندا ىنتىماقتاستىق مەموراندۋمى ءتۇزىلدى. قازۇاۋ مەن اگروونەركاسىپ (اوك) سالاسىنىڭ بىرىكتىرىلىپ، ءوندىرىس پەن عىلىمدا جەمىستى ارەكەت ەتۋدى ماقسات تۇتقان مەموراندۋم عىلىمي جوبالاردى شارۋاشىلىقتا ەندىرۋ ارقىلى اگرارلىق سەكتورداعى ءونىم كولەمىنىڭ ارتىپ، ونىڭ باسەكەگە قابىلەتتىلىگىن جوعارىلاتۋدى، سول ارقىلى، وبلىستىڭ اگروونەركاسىپ سالاسىنىڭ يننوۆاتسيالىق دامۋىن ارتتىرىپ، الەۋەتىن كوتەرۋدى كوزدەيدى. جيىننان سوڭ، ۋنيۆەرسيتەت پروفەسسورلارى وبلىستىڭ اۋىل شارۋاشىلىعىنىڭ بارلىق باعىتتارىمەن اينالىساتىن جەتى اۋدانعا اتتاندى. وندا عالىمدار جەكەلەگەن تاقىرىپتار اياسىندا كوشپەلى سەمينارلار ۇيىمداستىرىپ قايتتى.

اباي-اقپارات