وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ۆەنگريانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى، دوكتور اندراش باراني مەن ۆەنگريانىڭ الماتى قالاسىنداعى باس كونسۋلى فەرەنتسا بلاۋماننامەن كەزدەستى.

قوس تاراپتى كەزدەسۋ بارىسىندا اۋىل شارۋاشىلىعى، كولىك-لوگيستيكا سالاسىنىڭ دامۋ قارقىنى جانە وبلىستىڭ ەكونوميكالىق مۇمكىندىكتەرى تۋراسىندا ءسوز قوزعالدى.

اۋىل شارۋاشىلىعى سالاسىندا ءوسىم ينديكاتورى باسىم. جىلىجاي باعىتىن دامىتۋدا وبلىس ەلىمىزدە كوشباستاپ تۇر، رەسپۋبليكاداعى جىلىجايدىڭ 91 پايىزى وڭتۇستىككە تيەسىلى. ۆەنگريا مەملەكەتىنىڭ وسى سالادا تاجىريبەسى مول ەكەندىگى بەلگىلى. سوندىقتان وڭىرىمىزگە ينۆەستيتسيا سالۋ ارقىلى كوپ جەتىستىككە جەتۋگە بولاتىنىن جەتكىزگەن وبلىس باسشىسى ەكى ەل اراسىنداعى ساۋدا-ساتتىقتى ارتتىرا وتىرىپ، مادەني بايلانىستى دا جانداندىرۋ قاجەتتىگىن العا تارتتى.

«ماجارستاندىق تۇركىتانۋشى عالىم، قوعام قايراتكەرى يشتۆان قوڭىر ماندوكي بارلىق سانالى عۇمىرىن ماجار جانە كۇللى تۇركى حالىقتارىنىڭ قانداس، تۋىس جۇرتتار ەكەندىگىن دالەلدەۋگە ارناعان عالىم. ول ءوز ەڭبەكتەرىندە تۇركى حالىقتارىنىڭ سالت-ءداستۇرىن، مادەنيەتىن، ۇلتتىق ءدىلىن زەرتتەپ، تىڭ جاڭالىقتار اشقان. مىنە، سول جولدى جالعاستىرا وتىرىپ تۋىستاس ەلدەر رەتىندە بىرلەسە وتىرىپ مادەني ءىس-شارالاردى قولعا الۋىمىز كەرەك. ماسەلەن، كەلەر جىلدان باستاپ بۇكىل تۇركىلەردىڭ استاناسى اتانعان تۇركىستان قالاسىندا جوسپارلانعان اۋقىمدى جوبالارعا ماجار حالقى دا ۇلەس قوسۋعا نيەتتى» دەدى وبلىس اكىمى ج.تۇيمەباەۆ.

ەلىمىزدىڭ بارلىق قالالارىندا بولعان قوناقتار كەلەر جىلى وڭتۇستىكتە ۆەنگريانىڭ قۇرمەتتى كونسۋلدىعىن اشۋدى جوسپارلاپ وتىر. بۇل ءوز كەزەگىندە، ءوڭىردىڭ الەۋەتى، ءوسۋ قارقىنىن زەردەلەي كەلگەندەگى شەشىمى ەكەنىن جەتكىزدى. سونداي-اق ءبىلىم سالاسىندا تاجىريبە الماسا وتىرىپ ماجار جاستارىنىڭ وڭتۇستىك قازاقستانداعى جوو ءبىلىم الۋىنا مۇمكىندىكتەر قاراستىرىلسا دەگەن ويلارىن دا جەتكىزدى.

ايتا كەتەيىك، ەكى ەل اراسىنداعى قارىم قاتىناس جىل سايىن نىعايا تۇسۋدە. ۆەنگريا مەن قازاقستان اراسىندا تاۋار اينالىمى 2015 جىلدىڭ العاشقى 4 ايىندا 29,3 ملن اقش دوللارىن قۇراعان. قازاقستان ەكپورتىنىڭ نەگىزگى كومپونەنتەرى مينەرالدى وتىن، حيميالىق تىڭايتقىش، جابدىقتار مەن مەحانيزمدەر بولىپ تابىلادى. سونداي-اق، قوس ەلدىڭ اراسىندا ەنەرگەتيكالىق، پارلامەنتارالىق، مادەني-گۋمانيتارلىق بايلانىس تىعىز ورناعان.

Abai.kz