وقو ايماقتىق كوممۋنيكاتسيالار قىزمەتىندە قر تاۋەلسىزدىگىنىڭ 25 جىلدىق مەرەكەسىنە وراي شىمكەنت قالاسىنىڭ اكىمى عابيدوللا ءابدىراحىموۆ بريفينگ بەردى. جيىندا ءۇشىنشى قالانىڭ الەۋمەتتىك-ەكونوميكالىق دامۋ جاعدايى جونىندە توقتالىپ،  شىمكەنتتىڭ تاۋەلسىزدىك جىلدارى جەتكەن جەتىستىكتەرى تۋرالى ايتىپ بەردى.

قالا باسشىسىنىڭ مالىمەتىنە سۇيەنسەك،  ەكونوميكا سالاسى بويىنشا  قالا بيۋدجەتى 1994 جىلعى 1,0 ملرد.تەڭگەنى قۇراسا، بۇگىندە 110,0 ملرد.تەڭگەگە ارتقان. قالا ەكونوميكاسىنا سالىنعان ينۆەستيتسيالار 459,0 ملن.تەڭگەدەن 200,0 ملرد.تەڭگەگە وسكەن.

-ەگەمەندىگىمىزدىڭ العاشقى جىلدارى شىمكەنتتە 400 مىڭ حالىق بولسا، قازىر 902 مىڭنان استى. قالا اۋماعى 13 مىڭ گەكتاردان 117 مىڭ گەكتارعا ۇلعايدى. 25 جىل  ىشىندە 3 965,0 مىڭ شارشى مەتر جاڭا تۇرعىن ۇيلەر پايدالانۋعا بەرىلدى، - دەدى قالا اكىمى.

بۇگىندە شىمكەنت بيزنەسكە قولايلى قالا بولىپ، ونىڭ اۋماعىندا شاعىن جانە ورتا بيزنەس ەسەبىنەن 75 مىڭعا جۋىق كاسىپكەرلىك سۋبەكتىلەرى تىركەلىپ، وسى سالادا 136 مىڭ ادام جۇمىسپەن قامتىلىپ وتىر. 

قالادا  1991 جىلى 72 ءبىلىم ۇياسى بار بولسا، قازىر 169 مىڭ وقۋشىسى بار 129 مەكتەپ جۇمىس جاسايدى. ال، بالاباقشا سانى  129 دان 383 گە ارتىپ وتىر.  

ال، مادەنيەت، سپورت سالاسىندا ءوسىم، دامۋ بار.  1991 جىلى قالادا 52 مادەنيەت نىسانى بولسا، قازىر 93 نىسانعا جەتتى. العاش تاۋەلسىزدىك العان جىلدارى شىمكەنتتە  337 سپورت نىسانى بولسا، قازىر 781-گە جەتتى. قالادا 4 سپورت مەكتەبىنىڭ سانى 13 كە ارتتى. ءتىپتى، جۋىردا №12-ءشى بالالار مەن جاسوسپىرىمدەرگە ارنالعان سپورت مەكتەبى قايتا قۇرۋدان ءوتىپ، پايدالانۋعا بەرىلدى. سونىمەن قاتار، 5 «Street workout» سپورت الاڭشالارىن سالىندى. تۇرعىنداردى بۇقارالىق سپورتقا تارتۋ ماقساتىندا قالادا «Shymkent Bike» جوباسى جۇزەگە اسىرىلدى. ناتيجەسىندە 200 ۆولەسيپەدكە ارنالعان قالانىڭ 40 جەرىنەن ۆەلوستانتسيالار ورناتىلدى. ەل ەگەمەندىگىنىڭ العاشقى جىلدارى قالا كوشەلەرىنىڭ جالپى ۇزىندىعى 835,0 شاقىرىم بولسا، بۇگىنگى كۇندە 2811,0 شاقىرىمعا (3,3 ەسە) ۇلعايدى.

مەملەكەتتىك قىزمەت كورسەتۋ سالاسىندا ء«بىر تەرەزە» قاعيداسى بويىنشا جۇمىستار قولعا الىنىپ، قالا اكىمى اپپاراتى مەن بولىمدەردە «اشىق اكىمدىك» باعدارلاماسى ەنگىزىلدى. باعدارلامانى ىسكە اسىرۋ ءۇشىن «فرونت وفيس» (بىرىڭعاي كەڭسە) قۇرىلدى.

تۇيىندەپ ايتقاندا، قر تاۋەلسىزدىگىنىڭ 25 جىلدىعىندا ەلباسى نۇرسۇلتان ءابىشۇلى نازارباەۆتىڭ ساليقالى ساياساتىنىڭ ارقاسىندا شىمكەنت قالاسىندا الەۋمەتتىك جاعداي ايتارلىقتاي كوتەرىلدى. ماسەلەن، 2000 جىلداردىڭ باسىندا قالادا جۇمىسسىزدىق دەڭگەيى 17,2 پايىز بولسا، حالىق سانى 2 ەسەگە وسكەنىنە قاراماستان، جۇمىسسىزدىق دەڭگەيى 5,2 پايىزدى قۇراپ، اتالعان كورسەتىش جىل سايىن تومەندەپ كەلەدى.

Abai.kz