تاياۋدا وڭتۇستىك قازاقستان وبلىسىنا تۇركيا رەسپۋبليكاسىنىڭ «TRT AVAZ» حالىقارالىق تەلەارناسىنىڭ ءتۇسىرۋ توبى ارنايى جۇمىس ساپارىمەن كەلىپ، وڭىرىمىزدە جۇزەگە اسىرىلىپ جاتقان مەملەكەتتىك باعدارلامالاردىڭ ورىندالۋ بارىسى، جالپى ايماقتىڭ دامۋ كورسەتكىشتەرى مەن تۇركىستان تۋرالى فيلم ءتۇسىردى.

وڭتۇستىك قازاقستان وبلىسى تۋرالى ارنايى باعدارلاما ازىرلەپ جۇرگەن شىعارماشىلىق توپ ءوڭىرىمىزدىڭ ەكونوميكالىق دامۋ، يندۋستريا جانە تۋريزم سالالارى بويىنشا ءۇش باعىتتاعى جۇمىستارىنىڭ جايىن جەر-جاھانعا كورسەتپەك.

وڭىرىمىزگە جاساعان ساپارىندا «TRT AVAZ» تەلەارناسىنىڭ شىعارماشىلىق ۇجىمى وبلىس اكىمى جانسەيىت تۇيمەباەۆتان سۇحبات الدى. وندا اكىم ولكەمىزدى دامىتۋداعى بولاشاق جوسپارلارىمەن ءبولىسىپ، 300 ميلليون كورەرمەنى بار تەلەارنا ارقىلى تۇركى باۋىرلاس ەلدەردى قازاقستاننىڭ ونىڭ ىشىندە قوناقجاي وڭتۇستىكتىڭ تۋريستتىك مەكەندەرىن تاماشالاۋعا شاقىردى.

«TRT AVAZ» حالىقارالىق تەلەۆيزياسى تۇركيا رەسپۋبليكاسىنىڭ 7 تىلدە، سونىڭ ءبىرى قازاق تىلىندە حابار تاراتاتىن ەڭ ءىرى تەلەارناسى بولىپ تابىلادى. ەۋروپا مەن ورتا ازيا اۋماعىنا تارايتىن، ياعني ولار باۋىرلاس مەملەكەتتەر - ءازىربايجان، قازاقستان، وزبەكستان جانە قىرعىزستان سىندى سەگىز ەلگە حابار تاراتادى. وندا اتالعان رەسپۋبليكالاردىڭ ۇلتتىق داستۇرلەرى مەن ونەرى، دەرەكتى فيلمدەرى مەن مۋزىكالىق باعدارلامالارى كورەرمەن نازارىنا ۇسىنىلادى. 

حالىقارالىق تۇرىك تەلەارناسىمەن قازاقستان تاراپى 2012 جىلدان بەرى تىعىز جۇمىس ىستەپ كەلەدى. اتالعان تەلەارناداعى جاڭالىقتار تسيكلىنىڭ ۇزدىكسىز جۇرۋىنە ەلىمىزدەگى «قازاقستان» ۇلتتىق ارناسىنىڭ ۇجىمى ۇدايى كومەكتەسىپ كەلەدى. 

Abai.kz