شىمكەنت قالاسىنىڭ الداعى ەكى جىلدىق بيۋدجەتى بەكىدى. كۇنى كەشە وتكەن كەزەكتەن تىس سەسسيا كەزىندە دەپۋتاتتار قالا قازىناسىنا ەنگەن وزگەرىستەردى ناقتىلادى. بۇل تۋرالى «قازاقستان-شىمكەنت» تەلەارناسى حابارلادى.

بيۋدجەتكە ەنگىزىلگەن وزگەرىستەر بويىنشا حالىق قالاۋلىلارىن قالا اكىمىنىڭ ورىنباسارى گۇلجان قۇرمانبەكوۆا تانىستىردى. ونىڭ ايتۋىنشا، رەسپۋبليكالىق جانە ۇلتتىق قوردان بولىنگەن نىسانالى ترانسفەرتتەر مەن كرەديتتەر  قالاداعى مەكتەپكە دەيىنگى ءبىلىم بەرۋ ۇيىمدارىندا  مەملەكەتتىك ءبىلىم بەرۋ تاپسىرمالارىن ىسكە اسىرۋعا باعىتتالماق. ال، جەرگىلىكتى بيۋدجەتتەن بولىنەتىن قارجى  ازاماتتىق قىزمەتشىلەرگە ەڭبەكاقى تولەۋگە، جىلۋ-ەنەرگەتيكالىق جۇيەنىڭ قۇرىلىسىنا، سونىمەن قاتار سۋمەن جابدىقتاۋ جانە سۋ بۇرۋ جۇيەلەرىن رەكونسترۋكتسيالاۋعا جۇمسالاتىن بولادى. سونىمەن قاتار، سەسسيا جيىنىندا قالا بيۋدجەتىنىڭ كەيبىر بيۋدجەتتىك باعدارلامالارىندا قارالعان قاراجاتتتارىنىڭ ۇنەمدەلگەن قارجىسىن ء بىلىم، الەۋمەتتىك قامسىزداندىرۋ، مادەنيەت، سپورت جانە اقپاراتتىق كەڭىستىككە، تۇرعىن-ءۇي كوممۋنالدىق شارۋاشىلىق سالاسىنا باعىتتاۋ جاعى ايتىلعان.

ءبىر ايتا كەتەرى، حالىقتىڭ ماڭداي تەرى، تابان اقىسىمەن قۇرالعان بيۋدجەتتىڭ اشىق ءارى جاريالى تۇردە بولۋى ەلباسى نۇرسۇلتان نازارباەۆتىڭ «100 ناقتى قادام» ۇلت جوسپارىنىڭ 94-قادامىنداعى «اشىق ۇكىمەت» جوباسىندا دا قاراستىرىلعان. وسى تاپسىرماعا سايكەس جۇمىس ىستەي باستاعان «اشىق بيۋدجەتتەر» جوباسى بويىنشا جەرگىلىكتى اتقارۋشى ورگاندار بيۋدجەت تۋرالى مالىمەتتەردىڭ اشىقتىعىن قامتاماسىز ەتەدى. كەز-كەلگەن ازامات بيۋدجەت تۋرالى مالىمەتتەردى سۇراتۋعا، تانىسۋعا قۇقىلى. ءتىپتى ازاماتتار بيۋدجەتتىك باعدارلامالار بويىنشا ءوزىنىڭ جەكە وي-پىكىرىن دە بىلدىرە الادى.

اباي اقپارات