حالىققا اقپارات تاراتۋدا اشىقتىق، مولدىرلىك پەن جاريالىقتى كوزدەيتىن «اشىق اكىمدىك» جوباسى اياسىندا سارىاعاش اۋداندىق اكىمدىگىنىڭ ءباسپاسوز قىزمەتى اۋداندا بالاباقشا اشىلعانىن، ونىڭ قۇرىلىسىنا ناقتى قانشا قارجى كەتكەنىن، قانداي باعدارلاما اياسىندا سالىنعانىن، اۋدانداعى بالالاردى بالاباقشامەن قامتۋ دەڭگەيى تۋرالى اقپاراتتى ونلاين تۇردە سارىاعاش اۋدانى اكىمدىگىنىڭ رەسمي سايتىندا دەر كەزىندە جاريالادى.

بۇل تۋرالى «rgmedia.kz» سايتى حابارلايدى.

ءباسپاسوز قىزمەتىنىڭ حابارلاۋىنشا، جۋىردا عانا قازاقستان رەسپۋبليكاسى تاۋەلسىزدىگىنىڭ 25 جىلدىق مەرەكەسىنىڭ اياسىندا سارىاعاش قالاسىنىڭ سامال مولتەك اۋدانىنداعى №30 بوبەكجاي بالاباقشاسىنىڭ سالتاناتتى اشىلۋ ءراسىمى ءوتتى. نىساننىڭ اشىلۋ راسىمىنە اۋدان باسشىسى ق.ابدۋاليەۆ، «نۇر وتان» سارىاعاش اۋداندىق فيليالى توراعاسىنىڭ ءبىرىنشى ورىنباسارى پ.تۇرسىنداەۆ، اۋداندىق ارداگەرلەر كەڭەسىنىڭ توراعاسى ج.سۇلەيمەنوۆتەر قاتىسىپ جاڭا عيماراتتىڭ لەنتاسىن قيدى.

بالاباقشا 320 ورىندىق، قۇرىلىس  جۇمىستارى 2014 جىلى باستالىپ 2015 جىلى تاپسىرىلعان. رەسپۋبليكالىق بيۋدجەتتەن 529 ملن 988 مىڭ تەڭگە قارجىعا سالىنعان. زاماناۋي ۇلگىدە سالىنعان بالاباقشادا تولىق قۇرال-جابدىق، بۇلدىرشىندەرگە ارنالعان جيھازدارمەن قامتاماسىز ەتىلگەن.

قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ 2010 جىلعى 29 قاڭتارداعى قازاقستان حالقىنا ارناعان «جاڭا ونجىلدىق-جاڭا ەكونوميكالىق ورلەۋ-قازاقستاننىڭ جاڭا مۇمكىندىكتەرى» اتتى جولداۋىندا بەرگەن تاپسىرماسىنا سايكەس «بالاپان» باعدارلاماسى بويىنشا سارىاعاش اۋدانى اۋماعىندا 28 مەملەكەتتىك، 162 جەكەمەنشىك بالاباقشا مەن 30 شاعىن ورتالىق جۇمىس ىستەپ، اۋدان بويىنشا بالالاردى بالاباقشامەن قامتۋ دەڭگەيى 83,4 % قۇراپ وتىر.

بالاباقشا اشىلعانى تۋرالى جاڭالىقتان تەك سارىاعاش اۋدانىنىڭ تۇرعىندارى عانا ەمەس، سونىمەن قاتار وڭتۇستىك قازاقستان وبلىسىنىڭ باسقا دا اۋداندارى ونلاين رەجيمدە حاباردار بولدى. ياعني، وسى ارقىلى باسقا دا اۋداندار سارىاعاش اۋدانىنا باقىلاۋ جاساي الادى. بۇل ەلباسى ن.نازارباەۆتىڭ «ناقتى 100 قادام» - ۇلت جوسپارىنىڭ 94 قادامىنىڭ شەڭبەرىندە ىسكە اسقان «اشىق اكىمدىك» جوباسىنىڭ اياسىندا جۇزەگە اسۋدا.  

اباي اقپارات