وڭتۇستىكتەگى شارۋالاردىڭ ءبىر ەرەكشەلىگى ولار قاشان دا جاڭا تەحنولوگياعا بەيىمدەلۋگە، جەردى يگەرۋ كەزىندە ءتيىمدى جاڭا تەحنيكالاردى ىسكە قوسۋعا ءبىر سوزبەن ايتقاندا جاڭاشىلدىققا ەپتى كەلەدى. وسى ورايدا ايتا كەتەر جايت وڭتۇستىك قازاقستان وبلىسى بۇگىنگى تاڭدا ەلىمىزدەگى ماقتا ەگىلەتىن بىردەن ءبىر وبلىس.

ولار ماقتا ەگۋ كەزىندە دە جەر جىرتۋدىڭ ۇيرەنشىكتى ادىسىنەن باس تارتىپ جاڭا تەحنولوگيامەن ءونىم الۋدى ماقسات ەتتى. ەسەسىنە ماقتا ءشيتىن تەرەڭ قوپسىتۋ تەحنولوگياسىن مەڭگەرىپ، وڭدەلگەن ەگىس القاپتارىن پايدالانۋعا دەن قويدى. بۇل ءادىس جەر قىرتىسىندا جىلدار بويى پايدا بولعان شوگىندى تۇزدار مەن زياندى زاتتاردىڭ قاباتىن جويىپ، وسىمدىك تامىرىنىڭ ەركىن جايىلۋىنا مۇمكىندىك بەرەدى ەكەن. سونداي-اق سوڭعى جىلدارى تۇقىم ەگۋمەن قاتار ارام شوپتەر مەن زيانكەستەرگە قارسى كۇرەس شارالارىندا دا جاڭاشىلدىق بار.

جاڭا تەحنولوگيا بويىنشا تىرمانىڭ ءتىسى جەردىڭ قىرتىسىن 60-70 سانتيمەتر تەرەڭدىككە دەيىن قوپسىتادى. وسى ورايدا وڭتۇستىك قازاقستان وبلىسى ماقتارال اۋدانىنا قاراستى "نۇرالىجول-ج" شارۋا قوجالىعىنىڭ يەسى ەراليەۆ ەربول 191 گا جەرگە ماقتا داقىلىن ەگىپ، جالپى 860 توننا ءونىم الىپ، ورتاشا ونىمدىلىكتى 45 تس/گا قۇراپ مول جەتىستىككە جەتىپ وتىر. 

ايتا كەتەر جايت جاڭا تەحنولوگيانى سەرىك ەتكەن شارۋالار جەرگە سوقا سالمايدى. تەك قوپسىتۋعا از عانا شىعىن جۇمسايدى. شارۋالار مۇنداي ءادىس ماقتادان مول ءونىم جيناۋعا نەگىز بولادى دەپ وتىر. الداعى ۋاقىتتا جەردىڭ يگىلىگىن كورۋ باعىتىندا مۇنداي جاڭا تەحنولوگيالار كوبىرەك ەنگىزىلەدى دەپ كۇتىلۋدە. 

Abai.kz