بۇل – باق قونىپ، قۇت دارىعان، بىرەگەي پايدالى قازبالارعا باي ءوڭىر. مۇندا مەندەلەەۆ كەستەسىندەگى بارلىق ەلەمەنتتەر كەزدەسەدى. سوڭعى بەس جىلدىڭ قورىتىندىسىندا شەتەل ينۆەستورلارىن تارتۋ بويىنشا ەلىمىزدە اتىراۋدى عانا العا وزدىرىپ، ەكىنشى ورىنعا تابان تىرەۋىنىڭ ءوزى ءوڭىردىڭ ەكونوميكالىق الەۋەتىن ايقىنداي تۇسەرى ءسوزسىز. ىشكى جالپى ءونىم وندىرۋدە دە ىزدەنىستەر بار، - دەپ جازادى "ەگەمەن قازاقستان" باسىلىمى.

سوڭعى ۋاقىتتا مەملەكەت پەن جەكەمەنشىكتىڭ ارىپتەستىگى نەگىزىندە سالىنىپ جاتقان الەۋمەتتىك نىساندار قاتارى كوبەيدى. جاڭادان بوي كوتەرگەن شاعىن اۋداندار دا قالانىڭ قاناتىن كەڭگە جايا ءتۇستى. ال اقتوبەلىك ديقاندار بيىل ءار گەكتاردان 13 تسەنتنەر استىق باستىرىپ، تاۋەلسىزدىكتىڭ 25 جىلدىعىنا تولىمدى تارتۋ جاسادى. بۇل وڭىردەگى جارقىن جاڭالىقتارمەن لايىقتى جالعاسىن تابۋدا.

قازاقستان حالقى اسسامبلەياسىنىڭ ەل تاۋەلسىزدىگىنىڭ 25 جىلدىعىنا ارنالعان رەسپۋبليكالىق اكتسياسىنىڭ اياسىندا ۇيىمداستىرىلعان «تاۋەلسىز قازاقستان» پويىزىنىڭ اقتوبەگە اتباسىن تىرەۋى دە وسىنداي قۋانىشتى وقيعا رەتىندە ەل ەسىندە قالدى. پويىزدى قارسى الۋشىلار قاراشانىڭ قاقاعان قارا سۋىعىن دا ەلەگەن جوق، تەمىر جول ۆوكزالى الاڭىنا حالىق كوپ جينال­دى. ولاردىڭ اراسىندا وبلىس ورتا­لىعىنداعى ەتنومادەني بىرلەستىكتەر وكىلدەرى، وبلىستىق دەپارتامەنتتەر مەن باسقارمالار، قالالىق مەكەمەلەر باسشىلارى، جاستار جانە قالا جۇرت­شىلىعى بار.

«نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ايبەك ساعيەۆ، اقتوبە وبلىسى قازاقستان حالقى اسسامبلەياسى فيليالى حاتشىلىعىنىڭ مەڭگەرۋشىسى بۇلبۇل ەلەۋسىنوۆا باستاعان قالا­لىق­تار قوناقتاردى دۋمانداتىپ قارسى الدى، گۇل شوقتارىن ۇسىندى. بيشى­لەردىڭ مىڭ بۇرالعان ادەمى ءبيى دە، اقتوبەلىك ونەرپازدار شىرقاعان قازاق ەلى تۋرالى پاتريوتتىق ءان دە سالتاناتتى ءساتتىڭ اجارىن اشا ءتۇستى. ۇرمەلى اسپاپتار ءانسامبلى ورىنداعان اۋەن ارايلى اقتوبەنىڭ اسپانىن تەربەتتى.

سالتاناتتى جيىن بارىسىندا ءسوز العان ب.ەلەۋسىنوۆا ەگەمەندىك العان جىل­دارداعى قول جەتكەن جەتىستىك­تەرىمىزدى تۇعىرلى تاۋەلسىزدىگىمىزبەن ساباقتاس­تىردى. ال «تاۋەلسىز قازاق­ستان» پويىزى شتا­بىنىڭ جەتەكشىسى ءامىرجان الپەيى­سوۆ باستاعان توپتىڭ وسىنداي يگى قادام­دارىنا ريزاشىلىق ءبىلدىرىلدى. ول ءوز كە­زە­گىندە پويىزدىڭ باستى ماقساتى حا­لىق­قا الەۋمەتتىك كومەك كورسەتۋ ەكەنىن ايتتى.

ايتا كەتۋ كەرەك، توپ قۇرامىندا جەتى مينيسترلىكتىڭ جانە ءۇش ۇلتتىق كومپانيانىڭ وكىلدەرى، بارلىعى 270-تەن استام مامان بار. ونىڭ 72-ءسى – دارىگەر. ولار كەلىسىلگەن كەستە بويىنشا تۇرعىنداردى قابىلدادى. ءبىز «نۇر وتان» پارتياسى وبلىستىق فيليالىنداعى قوعامدىق قابىلداۋعا كەلۋشىلەر قاتارى كوپ بولعانىن كوردىك. «مەن قوعامدىق قابىلداۋعا ەكى ماسەلەمەن كەلىپ ەدىم. ءبىرى كەلىنىم وزبەكستاننان ەدى، ازاماتتىق الا الماي، سابيلەرىنە تيەسىلى قارجىسىنا قول جەتكىزە الماي جۇرگەن-ءدى. ءوزىم جۇمىسسىز بولاتىنمىن. ەكەۋى دە وڭ شەشىلەتىن بولدى، ريزا بولىپ تۇرمىن»، دەدى اقتوبەلىك يگىلىك ورالوۆ. جالپى، قوعامدىق قابىلداۋعا كەلگەن 40 ادامنىڭ 15-ءىنىڭ ماسەلەلەرى سول جەردە وڭ شەشىلگەنىن بىلدىك. قالعاندارى ءتيىستى ورىندارعا جولدانىپ، ناتيجەسى باقىلاۋدا ۇستالاتىن بولدى.

«دامۋ» كاسىپكەرلىكتى دامىتۋ قورى» اق عيماراتىندا «اتامەكەن» ۇلتتىق كاسىپكەرلەر پالاتاسىنىڭ، «قازاگرو»كومپانياسىنىڭ جانە ادىلەت مينيسترلىگىنىڭ وكىلدەرى ءبىر توپ كاسىپكەرمەن كەزدەستى. الدىمەن ادىلەت مينيس-ترلىگىنىڭ ساراپشىسى ساپاربەك اقجانباەۆ ءسوز الىپ، اتالعان پويىزدىڭ ماقساتىمەن، ءجۇرىپ وتكەن جولىمەن قىسقاشا تانىستىردى. «اتامەكەن» ۇلتتىق كاسىپكەرلەر پالاتاسىنىڭ وكىلى ارنۇر دارباەۆ كاسىپكەرلەردى تولعاندىراتىن ماسە­لەلەر بويىنشا شولۋ جاسادى. ولارعا كاسىپكەرلەردىڭ قۇقىقتارى مەن مۇد­دەسىن قورعاۋ، نەسيەلەۋ جانە باسقا ماسەلەلەر بويىنشا كەڭەس بەرىلدى. كاسىپكەرلەر اۋىل شارۋاشىلىعىن، شاعىن كاسىپكەرلىكتى مەملەكەتتىك قولداۋ باعدارلامالارىنىڭ كەيبىر قاي­شى تۇستارىن كوتەردى. جيىنعا قاتى­سۋشى ەڭبەك ارداگەرى ەسەت سارتاەۆ ءىسىن جاڭادان باستاعىسى كەلەتىن كاسىپكەرلەرگە ساۋاتتىلىق جەتىسپەي­تىنىن اتاپ ايتتى.

ال دارىگەرلەر №2 قالالىق ەمحانادا قابىلداۋ جۇرگىزدى. نەۆرولوگ، ۋرولوگ، گەماتولوگ، وفتالمولوگ، ەندوكرينولوگ، گاستروەنتەرولوگ سىندى بىلىكتى 18 مامان دارىگەرلەر سىرقاتتاردى قابىلدادى. پويىز دارىگەرلەرىنىڭ باسشىسى سەرىكجان سابىراليەۆتىڭ ايتۋىنشا، تۇسكە دەيىن 182 ادام دارى­گەرلەردىڭ قابىلداۋىندا بولىپ، كەڭەس العان، باسقا وڭىرلەردەگىدەي اقتوبەدە دە جۇرەك-قان تامىرلارى، كوز اۋرۋلارىنا شالدىعۋشىلار قاتارى كوپ ەكەن.

سونداي-اق، بالالار مەن جاس­وس­پىرىمدەر ۇيلەرىندە قايىرىم­دى­لىق اكتسيالارى ۇيىمداستىرىلدى. «تاۋ­ەلسىزدىك تاريحى – ۇلت رۋحىنىڭ ولشەمى»، «ماڭگىلىك ەل» سەكىلدى بىرنەشە تاقىرىپ اياسىندا كەزدەسۋلەر، دوڭگەلەك ۇستەلدەر وتكىزىلدى. ال «نۇر وتان» پارتياسى وبلىستىق فيليالى عيماراتىندا «ۇلى دالا ەلى – تاۋەلسىزدىكتىڭ 25 نەگىزى» تاۋەلسىزدىك مەرەكەسىنە دەيىنگى اتاۋلى كۇندەر شاراسى سالتاناتتى جاعدايدا اشىلدى.

وبلىستىق اكىمدىك عيماراتىندا وتكەن بريفينگتە ءا.الپەيىسوۆ پويىز ماماندارى وتكىزگەن شارالار مەن اتقارىلعان جۇمىستاردى قورى­تىن­دىلادى، باق وكىلدەرىنىڭ سۇراق­تارىنا جاۋاپ بەردى. ونىڭ ايتۋىنشا، وسى كەزەڭدە 32 مىڭنان استام ادام قامتىلعان، 7 مىڭعا جۋىعىنا مەدي­تسي­نالىق كەڭەس بەرىلسە، 4,5 مىڭىنىڭ جەكە ماسەلەلەرىن شەشۋگە كومەك كورسەتىلگەن. 20 مىڭنان استام ادامعا ءارتۇرلى كەڭەس بەرىلگەن.

«تاۋەلسىز قازاقستان» پويىزى كەلەسى كەزەكتە اتىراۋ وبلىسىنىڭ ماقات ستانساسىنا جول تارتتى، 27 قاراشادا قايتا ورالىپ، شالقارعا بارادى.

ساتىبالدى ءساۋىرباي

اباي-اقپارات