سوڭعى ەكى جىلدا وڭتۇستىك قازاقستان وبلىسىندا ءىرى قارا مال سانى 35 مىڭعا ارتىپ، 865 مىڭ باستى قۇراسا، جىلقى 16 مىڭعا ارتىپ، 230 مىڭعا جەتتى. ال قوي مەن ەشكى 155 مىڭنان 3 ملن. 893 مىڭعا دەيىن ارتقان. وسى مەرزىم ىشىندە ەت ءوندىرۋ  111,4 پايىزعا، ءسۇت ءوندىرۋ 104,8  پايىزعا، جۇمىرتقا ءوندىرۋ 112,1 پايىزعا، ءجۇن ءوندىرۋ 110,1 پايىزعا ارتقان. دەگەنمەن، ءىرى قارا مال سانى بايدىبەك، ورداباسى، قازىعۇرت اۋداندارىندا، ال ۋاق مال بايدىبەك، ورداباسى، سوزاق، تولەبي اۋداندارىندا، جىلقى بايدىبەك، تۇلكىباس اۋداندارىندا، تۇيە بايدىبەك، سارىاعاش، تۇلكىباس اۋداندارىندا، قۇس سانى بايدىبەك، قازىعۇرت، سايرام، تۇلكىباس اۋداندارىندا كەمىگەن. بۇل تۋرالى وبلىستىق اۋىلشارۋاشىلىعى باسقارماسىنىڭ باسشىسى سەرىك تۇربەكوۆ وبلىس اكىمى جانسەيىت تۇيمەباەۆتىڭ توراعالىعىمەن وتكەن اكىمدىكتىڭ كەزەكتى ماجىلىسىندە ءمالىم ەتتى.

25 جىلدا ىشكى نارىقتى مال شارۋاشىلىعى ونىمدەرىمەن تولىق قامتاماسىز ەتە الماي كەلە جاتقانىمىزدى تىلگە تيەك ەتكەن وبلىس باسشىسى وزىمىزدە وندىرىلەتىن ونىمدەر ءالى دە باسەكەگە كابىلەتى تومەن بولعاندىقتان، وزگە وبلىستاردى بىلاي قويعاندا، جەرگىلىكتى تۇتىنۋشىلاردىڭ اراسىندا دا شەت ەلدىڭ ونىمدەرىن ساتىپ الۋعا ءماجبۇر ازاماتتاردىڭ از ەمەستىگىنە دە توقتالدى. سول ءۇشىن سانمەن بىرگە ساپا ماسەلەسىنە دە ايرىقشا دەن قويۋ كەرەكتىگىن تاپسىردى. سول سەكىلدى ۆەتەريناريالىق قاۋىپسىزدىك ماسەلەسى دە مال شارۋاشىلىعىن دامىتۋعا ۇلكەن ۇلەس قوساتىنىن اتاپ ءوتىپ، وسى ماقساتتا جۇيەلى تۇردە جۇمىس جۇرگىزىلۋ قاجەتتىلىگى ءسوز بولدى.

س.جايلاۋبەك

Abai.kz