ا.مامين Gate City جوباسى ىسكە اسىرىلىپ جاتقان الماتى اگلومەراتسياسىنىڭ سولتۇستىگىندەگى سپۋتنيك -قالانىڭ قۇرىلىس بارىسىمەن تانىستى. بۇل تۋرالى الماتى قالاسى اكىمىنىڭ ءباسپاسوز قىزمەتى حابارلادى.

قازىرگى تاڭدا Gate City سپۋتنيك-قالاسىندا سۋمەن، ەلەكترمەن، گازبەن قامتۋ، جول ينفراقۇرىلىمى نىساندارى تۇرعىزىلىپ، جىلۋ جەلىلەرىنىڭ قۇرىلىسى جۇرگىزىلۋدە. 2017 جىلى يندۋستريالدى ايماقتا التى جوبا، سونىمەن قاتار العاشقى تۇرعىن كەشەندەرى قولعا الىنادى.

قر پرەمەر-ءمينيسترىنىڭ ءبىرىنشى ورىنباسارى، سونداي-اق، «سولتۇستىك اينالىم - بوكەيحانوۆ» كولىك ءتۇيىنىنىڭ قۇرىلىسىن تەكسەرىپ قايتتى. كولىك ءتۇيىنىن 2017 جىلعى جەلتوقساندا پايدالانۋعا بەرۋ جوسپاردا بار. پەرسپەكتيۆتى وتكىزۋ قابىلەتى – تاۋلىگىنە 361 177 اۆتوكولىك.

ساپار بارىسىندا ا. مامين 2017 جىلدىڭ ءبىرىنشى جارتىجىلدىعىندا «التىن وردا» بازارى اۋدانىنداعى الماتى-بىشكەك جولىنىڭ ۋچاسكەسىنە قايتا قۇرۋ جۇمىستارىن باستاۋدى تاپسىردى. بۇل ۋچاسكە الماتىعا كىرىپ/شىعاتىن بارىنشا كوپ پايدالانىلاتىن جول. قر پرەمەر-ءمينيسترىنىڭ ءبىرىنشى ورىنباسارى، سونىمەن قوسا، كەلەسى جىلدىڭ ءبىرىنشى جارتىجىلدىعىندا ۇزىندىعى 66 كم (6-8 جولاق) بولاتىن ۇلكەن الماتى اينالما اۆتوكولىك جولىنىڭ قۇرىلىسىن مەملەكەتتىك-جەكەمەنشىك ارىپتەستىك جاعدايىندا باستاۋدى تاپسىردى.

جۇمىس ساپارى بارىسىندا ا.مامين الماتىنىڭ الاتاۋ اۋدانىنىڭ سولتۇستىك-باتىس بولىگىندە ورنالاسقان يندۋستريالىق ايماقتا بولدى. جالپى اۋدانى 490 گا بولاتىن يندۋستريالىق ايماق التى وندىرىستىك سەكتورعا بولىنگەن. بۇل ازىق-تۇلىك، ماشينا قۇراستىرۋ، قۇرىلىس، فارماتسەۆتيكا، حيميا جانە جەڭىل ونەركاسىپ. يندۋستريالىق ايماق اۋماعىندا ا. مامين «BRB APK» جشس جىلۋ كەشەنىنىڭ جۇمىسىمەن تانىستى. جىلىجايدان تاۋلىگىنە 20 تونناعا دەيىن كوكونىس جينالادى.

بۇدان كەيىن قر پرەمەر-ءمينيسترىنىڭ ءبىرىنشى ورىنباسارى قالانىڭ اۋەزوۆ اۋدانىندا ورنالاسقان «دوستىق» مەترو ستانتسياسىنىڭ قۇرىلىس بارىسىن قاداعالادى. جاڭا ستانتسيا اباي داڭعىلىن بويلاي، جۇرگىن بولىك استىندا مومىشۇلى كوشەسىنەن باتىسقا قاراي تۇرعىزىلاتىن بولادى.

«الماتى ءۇشىن مەتروپوليتەننىڭ دامۋى وتە ماڭىزدى، «سارى-ارقا» مەن «دوستىق» ەكى جاڭا ستانتسيالارىنىڭ پايدالانۋعا بەرىلۋىن ەسەپكە العاندا، جولاۋشىلار اعىنى تاۋلىگىنە 45-تەن 90 مىڭ جولاۋشىعا دەيىن ارتادى»، - دەدى ا. مامين.

ەكى جاڭا ستانتسيا 2020 جىلعا قاراتا ىسكە قوسىلادى دەپ جوسپارلانعان.

جۇمىس ساپارىنىڭ قورىتىندىسى بويىنشا الماتى ق. اكىمدىگىندە الماتى اگلومەراتسياسىن دامىتۋ ماسەلەلەرى بويىنشا كەڭەس وتكىزىلدى.

ا. مامين مەملەكەت باسشىسى نۇرسۇلتان نازارباەۆتىڭ الماتى اگلومەراتسياسىن دامىتۋ ماسەلەسىنە ەرەكشە نازار اۋداراتىنىن ايتىپ ءوتتى.

«ساپار بارىسىندا Gate City سپۋتنيك-قالاسىنىڭ ينفراقۇرىلىمىن، جاڭا مەترو ستانيتسياسىن دامىتۋ ماسەلەلەرى، قالانىڭ كولىك سىزباسىن جەتىلدىرۋ جانە يندۋستريالدى جوبالاردى ىسكە اسىرۋ ماسەلەلەرى قاراستىرىلدى. بۇلار ءدال وسى زاماناۋي اگلومەراتسيانى قالىپتاستىرۋعا ىقپال ەتەتىن جوبالار. الماتى اگلومەراتسياسى – ەلدىڭ قارقىندى دامۋىنىڭ ماڭىزدى نۇكتەلەرىنىڭ ءبىرى. الەمدىك تاجىريبە كورسەتكەندەي، اگلومەراتسيالار – ەكونوميكالىق لوكوموتيۆتەر»، - دەپ ءسوزىن تۇيىندەدى ا. مامين.

اباي اقپارات