قازىر ەلىمىزدەگى ءار وبلىس، ءار اۋدان جيىن-تەرىن جۇمىستارىن ءتامامداپ، قورىتىندىلارىن شىعارۋدا. وڭتۇستىك قازاقستان وبلىسى اكىمدىگى جاقىندا «التىن كۇز» مەرەكەسىن وتكىزىپ، سوندا جۇگەرى ەگىپ، ودان ءونىم الۋدا وتىرار اۋدانىنىڭ جوعارى كورسەتكىشكە يە بولعانىن جاريالادى.

وتىرار اۋدانىنىڭ تابيعاتى، توپىراعى جۇگەرى ەگۋگە وتە ىڭعايلى. جۇگەرى جىلۋدى سۇيەتىن وسىمدىك، جاقسى باپتالعان جۇگەرى باسقا داقىلدارمەن سالىستىرعاندا وتە مول ءونىم بەرەدى. بيىلعى جىلى وتىرار اۋدانىندا «Asia Agro Grop» اۋىلشارۋشالىعى ونىمدەرى كورپوراتسياسى جۇگەرى ەگىپ، كول-كوسىر ءنىم الدى. سونداي-اق «وتىرار ءدان» شارۋا قوجالىعى دا جۇگەرىدەن پايدا كوردى.

بىلتىرعى جىلى وتىرار اۋدانىندا جىلدىق قۋاتتىلىعى 10 مىڭ توننانى قۇرايتىن جۇگەرى ساقتاۋ جانە كەپتىرۋ كەشەنى ىسكە قوسىلعان بولاتىن. جالپى قۇنى 450 ميلليون تەڭگە بولاتىن كاسىپورىن بۇگىندە ءتاپ-ءتاۋىر كادەگە جارادى.

«اۋداندا جۇگەرى داقىلىن 1990 جىلدارداعى كولەمگە جەتكىزۋ جانە جۇگەرى كلاستەرىن دامىتۋ بويىنشا جۇمىستار اتقارىلىپ جاتىر. ماسەلەن، 2020 جىلعا دەيىن جۇگەرى القابىن 15 مىڭ گەكتارعا جەتكىزۋ جونىندەگى ءىس-شارا جوسپارى بەكىتىلگەن» دەيدى اۋدان باسشىلارى. بيىل وتىرار اۋدانى بويىنشا 7,5 مىڭ گەكتار جەرگە جاڭا تەحنولوگيالاردى پايدالانۋ ارقىلى جۇگەرى ەگىلدى. بىلتىر بوي كوتەرگەن كەشەن الداعى ۋاقىتتا 10 مىڭ تونناعا دەيىن ءونىم قابىلداۋعا ءازىر. بۇل اۋدانىمىزدا شاعىن جانە ورتا كاسىپكەرلىكتىڭ دامۋىنا جاسالعان جاعداي»، – دەدى اۋدان اكىمى. كاسىپورىن باسشىسىنىڭ ايتۋىنشا، بۇل كەشەننىڭ اشىلۋى جۇگەرى كلاستەرىن دامىتۋعا نەگىز بولماق. سەبەبى، بۇرىندارى ديحاندار جيناعان ءونىمىن كەپتىرە الماي، الاجازداي ەتكەن ەڭبەگى زايا كەتەتىن. ەندى شارۋالارعا ونىمدەرىن ىسىراپسىز جيناپ الۋىنا مۇمكىندىك تۋىپ وتىر. مۇندا 35 ادام جۇمىسپەن قامتىلعان. كەشەننىڭ ونىمىنە سۇرانىس ارتىپ، شيكىزات كوبەيسە، بولاشاقتا جۇمىس قۋاتتىلىعى بۇدان ءارى ارتپاق.