الماتى قالاسىندا گەنەرال ي. ۆ. پانفيلوۆ باستاعان 316-شى اتقىشتار ديۆيزياسى 28 باتىرىنىڭ اتاقتى ەرلىگى تۋرالى «28 پانفيلوۆشى» كوركەم ءفيلمىنىڭ قازاقستاندىق تۇساۋكەسەرى ءوتتى. تۇساۋكەسەردىڭ قۇرمەتتى قوناقتارىنىڭ ءبىرى پانفيلوۆ ديۆيزياسى 1075-شى اتقىشتار پولكى 2-ءشى باتالون 4-ءشى روتاسىنىڭ جاۋىنگەرى مۇسابەك سەنگىرباەۆتىڭ نەمەرەسى تولەگەن مۇسابەكوۆ بولدى.

«فيلم وتە جاقسى تۇسىرىلگەن. موسكۆا تۇبىندەگى قانتوگىس شايقاستارعا قاتىسۋشىلاردىڭ ءبىرى بولعان يۆان ءشادريندى ءوز كوزىممەن كورگەن بولاتىنمىن. ول بىزدەرگە، مەكتەپ وقۋشىلارىنا، 1941 جىلدىڭ قاراشاسىندا ورىن العان ۇرەيلى كۇندەردىڭ وقيعالارى تۋرالى ءجيى اڭگىمەلەپ بەرەتىن»، - دەدى تولەگەن تىلەۋحانۇلى مۇسابەكوۆ.

پانفيلوۆشى باتىردىڭ نەمەرەسى ايتىپ كەتكەندەي، كەڭەس وداعىنىڭ باتىرى يۆان دەميدوۆيچ شادرين ماسكەۋ قالاسىن فاشيست اسكەرلەردىڭ شابۋىلىنان قورعاۋ بارىسىندا قازا تاپقان قارۋلاس دوستارىن ءجيى ەسكە العان بولاتىن.

«بۇل فيلم شىنىمەن حالىق فيلمىنە اينالدى. ويتكەنى ول وتانىنىڭ باس قالاسى ماسكەۋدى قۇتقارۋ ءۇشىن ومىرلەرىن قۇربان ەتكەن كوپۇلتتى حالىق تۋرالى فيلم. ولاردىڭ قالعان باسقا شاراسى دا بولعان جوق، ويتكەنى شەگىنەر جول جوق، ارتتارىندا ماسكەۋ جانە ونى قانداي دا جاعدايدا قورعاپ قالۋ قاجەت دەگەن تاپسىرما بولاتىن»، - دەپ ءسوزىن جالعاستىردى ت. مۇسابەكوۆ.

سونىمەن قاتار ول پانفيلوۆ ديۆيزياسى 28 باتىرىنىڭ ىشىندە قازاقتار، ۋكرايندىقتار، قىرعىز جانە ورىستار بولعاندىعىن حابارلادى: «اتالارىمىزدىڭ كوبى ورىس ءتىلىن بىلمەگەنىمەن، بەرگەن تاپسىرمانى ءتۇسىنىپ، وتانىمىزدىڭ استاناسىن قورعاۋدا جانىن پيدا ەتتى. بۇل ولاردىڭ رۋحتارىنىڭ قانشالىقتى مىقتى بولعاندىعىن كورسەتەدى».

«جاستىعىنا قاراماستان،  ءفيلمنىڭ ءتۇسىرۋ توبى سول ۋاقىتتىڭ وقيعالارىن، ۆولوكولامسك قاقتىعىستارىنىڭ قورقىنىشتارى مەن قاتىگەزدىگىن كورسەتە الدى. مەن ولارعا باتىر پانفيلوۆشىلاردى ماڭگى ەستە ساقتاۋ ىسىنە قوسقان ۇلەسى ءۇشىن العىس ايتىپ، وسى جولداعى ىزدەنىستەردى جالعاستىرا وتىرىپ، بولاشاقتا بۇدان دا كەرەمەت تۋىندىلار جاسايتىندىعىنا ءۇمىتىمدى بىلدىرەمىن. سونىمەن قاتار قازاقستان رەسپۋبليكاسىنىڭ مادەنيەت جانە سپورت مينيسترلىگىنە دە بۇل جوباعا قولداۋ كورسەتكەندەرى ءۇشىن ريزامىن، ويتكەنى اتالمىش فيلم وسكەلەڭ ۇرپاقتى پاتريوتتىق رۋحتا تاربيەلەۋدە ەرەكشە ماڭىزعا يە. 28 پانفيلوۆشىنىڭ ەرلىگى – باتىلدىق پەن جانقيارلىقتىڭ داۋسىز ۇلگىسى. فيلم جالپى كورسەتىلىمگە شىققاننان كەيىن كورەرمەندەر كينوتۋىندىنى ءتۇسىرۋشى توپتىڭ ەڭبەگىنە وزدەرىنىڭ لايىقتى باعاسىن بەرەتىندىگىنە ۇمىتتەنەمىن»، - دەدى پانفيلوۆشى باتىردىڭ نەمەرەسى.

ايتىپ كەتۋ كەرەك، الماتىدا وتكەن «28 پانفيلوۆشى» ءفيلمىنىڭ تۇساۋكەسەرى بارىسىندا تولەگەن مۇسابەكوۆ كينوتۋىندىنىڭ رەجيسسەرلەرى اندرەي شالوپا، كيم درۋجينين، سونىمەن قاتار مۇسابەك سەنگىرباەۆتىڭ ءرولىن سومداعان اكتەر ازامات نىعمانوۆقا «مۇسابەك سەنگىرباەۆتىڭ 100 جىلدىعى» مەرەيتويلىق توسبەلگىلەرىن تابىس ەتتى.

Abai.kz