مال ۇرلىعىمەن كۇرەس كۇشەيتىلمەك
تۇركىستان قالاسى اكىمدىگىنىڭ ءماجىلىس زالىندا قالا اكىمى الىپبەك وسەرباەۆتىڭ توراعالىق ەتۋىمەن تۇركىستان قالاسى بويىنشا قىلمىستىڭ الدىن الۋ شارالارىنىڭ بارىسى جانە مال ۇرلىعىنا ناتيجەلى توسقاۋىل قويۋ ماسەلەلەرى قارالدى. جيىنعا اۋىل وكرۋگ اكىمدەرى مەن تۇرعىندارى، سونىمەن قاتار ءتيىستى سالا قىزمەتكەرلەرى قاتىستى.
قىىب جەرگىلىكتى پوليتسيا قىزمەتى ۋچاسكەلىك پوليتسيا بولىمشەسىنىڭ باسشىسى باۋىرجان يساەۆ اتالمىش ماسەلەلەر بويىنشا حابارلاما جاسادى. بابايقورعان اۋىلدىق وكرۋگىنىڭ اكىمى ارمان ەرجىگىتوۆ، ۇشقايىق اۋىلدىق وكرۋگىنىڭ اكىمى ءنۇرالى المەردەنوۆ، ۆەتەريناريا ءبولىمىنىڭ باسشىسى پولات مۇساەۆ، زاڭ ءبولىمىنىڭ باس ينسپەكتورى ءبىرجان بەكدىلداەۆ قوسىمشا حابارلامالار جاساپ، اتالعان قىلمىستارىڭ الدىن الۋ، بولدىرماۋ تۇرعىسىندا ءوز تاراپتارىنان قانداي جۇمىستار جاسالىپ جاتقانىنا توقتالدى.
ءتورت تۇلىكتىڭ ۇرلىعىنا قاتىستى اتالمىش جيىنعا كەلگەن اۋىل تۇرعىندارى ۇرلىقتى توقتاتۋدىڭ، ونى قۇرىقتاۋدىڭ جولدارىن بىرلەسە شەشۋ قاجەتتىگىن جەتكىزدى. سونىمەن قاتار مال ۇرلىعىنىڭ جيىلەۋىنىڭ باستى سەبەبى باقتاشىنىڭ بولماۋى ەكەنىن دە ايتتى.
«مال اشۋى – جان اشۋى» دەمەكشى، ءتورت تۇلىگى قولدى بولىپ، شىعىنعا ۇشىراپ جاتقان اۋىل تۇرعىندارىنىڭ جانايقايى كىمدى دە بولسىن بەي-جاي قالدىرماسى انىق.
جيىن سوڭىندا شاھار باسشىسى الىپبەك وسەرباەۆ قايتالانا بەرەتىن مال ۇرلىعىنا ناتيجەلى توسقاۋىل قويۋ قاجەتتىگىن باسا ايتىپ، ناقتى تاپسىرمالار بەرە كەلە، مال ۇرلىعىنىڭ اشىلۋى بارىسىنداعى جۇمىستاردى سىنعا الىپ، ودان ناتيجە شىعارۋلارى قاجەتتىگىن دە نازاردان تىس قالدىرمادى.
Abai.kz
