وڭتۇستىك قازاقستان وبلىسىندا ەكى ەل اراسىنداعى ىنتىماقتاستىقتى  ارتتىرىپ، كاسىپكەرلەرگە ۇلكەن مۇمكىندىكتەر جاساۋ ماقساتىندا قازاق-وزبەك بىرلەسكەن بيزنەس كونفەرەنتسياسى ءوتتى.

كونفەرەنتسيا جۇمىسىنا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ پەن قازاقستان رەسپۋبليكاسىنىڭ وزبەكستان مەملەكەتىندەگى توتەنشە جانە وكىلەتتى ەلشىسى ەرىك وتەمباەۆ پەن 70-كە جۋىق قوس مەملەكەتتىڭ كاسىپكەرلەرى قاتىستى.

بيزنەس كەزدەسۋدە ءسوز العان ءوڭىر باسشىسى بارشا قاتىسۋشى قوناقتارعا العىسىن ءبىلدىرىپ، بۇگىنگى جيىن ەكىجاقتى قاتىناستاردى دامىتۋدا پايدالى الاڭ بولاتىنىنا سەنىم ءبىلدىردى. 

«وڭتۇستىك قازاقستان وبلىسىنىڭ اكىمدىگى ينۆەستيتسيالىق جوبالاردى ىسكە اسىرۋدا جان-جاقتى قولداۋ كورسەتۋگە دايىن. ءبىزدىڭ مەملەكەتتە يندۋستريالدى-يننوۆاتسيالىق دامۋ باعدارلاماسى بەلسەندى جۇزەگە اسىرىلىپ، ول قازىرگى ۋاقىتتا وبلىس ەكونوميكاسىنىڭ دامۋىنا سەپتىگىن تيگىزىپ كەلەدى. دامىعان الەم ەلدەرىنىڭ تاجىريبەسى كورسەتكەندەي، يندۋستريالدى ايماقتار ينۆەستورلاردى تارتۋدىڭ نەگىزگى قۇرالى بولىپ تابىلادى. بۇگىندە وبلىستىڭ قالالارى مەن اۋداندارىندا 11 يندۋستريالدى ايماق جۇمىس ىستەيدى. وڭدەۋشى ونەركاسىپ باعىتىنداعى جوبالاردى ىسكە اسىرۋشى ينۆەستورلار ءۇشىن ءبىز اتالعان ايماقتان جەر ۋچاسكەلەرىن ءبولىپ بەرۋگە ءازىرمىز. سونىمەن قاتار، وسىندا وندىرىلگەن ءونىمدى ەۋرازيالىق ەكونوميكالىق وداققا مۇشە ەلدەر مەن قحر-نا ەكسپورتتاۋعا مۇمكىندىك بار»، -دەدى اكىم.

ءوز كەزەگىندە، ەلشى ەرىك وتەمباەۆ وبلىس باسشىسىنا وڭتۇستىكتە قازاق-وزبەك اگرو يندۋستريالدى ايماعىن سالۋدى جانە تاشكەنت قالاسىمەن عانا ەمەس، وزبەكستاننىڭ بارلىق ايماقتارىمەن دە ارىپتەستىك بايلانىس ورناتۋدى ۇسىندى.

«ەكى جاقتىڭ كليماتى ۇقساس بولىپ كەلگەندىكتەن مۇندا كوكونىس ءوسىرۋ شارۋاسىن دامىتۋعا بولادى. جانە قوس ەل اراسىنداعى تۋريزم سالاسىن وركەندەتۋ ماقساتىندا ۇلى جىبەك جولىن قايتا جاڭعىرتۋىمىز كەرەك. بۇل باعىتتا قازىرگى تاڭدا ءتيىستى جۇمىستار مەن كەلىسسوزدەر جۇرگىزىلىپ جاتىر»، - دەدى ەلشى.

بۇل رەتتە، قازاقستاننىڭ وزبەكستانداعى ەلشىسى «سامارقان – شىمكەنت – تۇركىستان» مەن «شاردارا – جەتىساي – جىزاق»  باعىتتارىندا جۇرەتىن اۆتوبۋستار قاتىناسىنىڭ ورناتىلاتىنىن مىسال رەتىندە كەلتىردى.

سونىمەن قاتار، مارتەبەلى مەيمان وڭتۇستىكتەگى «حيمفارم» اق ءوندىرىسى شىعاراتىن ءدارى-دارمەك كورشىلەس وزبەك ەلىندە سۇرانىسقا يە ەكەنىن ايتىپ، بۇگىندە ءدارى-دارمەك ونىمدەرىن جۇيەلى تۇردە ساتىپ الۋعا نيەتتى ەكەنىن جەتكىزدى.

قوس تاراپتى كەزدەسۋ بارىسىندا وقو كاسىپكەرلىك، يندۋستريالدى-يننوۆاتسيالىق دامۋ جانە تۋريزم باسقارماسىنىڭ باسشىسى مارات قاراباەۆ وڭتۇستىكتىڭ كاسىپكەرلىك سالاسىنداعى مۇمكىندىكتەرىمەن تانىستىردى. سونىمەن قاتار، تۋريزم باعىتىن دامىتۋ جايىن دا باياندادى.

ايتا كەتەيىك، 2015 جىلى ەكى ەلدىڭ اراسىنداعى تاۋار اينالىمى 1,67 ملرد. اقش دولللارىنا جەتكەن. وسى سىندى كەزدەسۋلەردىڭ ناتيجەسىندە ەكسپورت پەن يمپورتتىڭ كولەمىن ارتتىرۋ كوزدەلىپ وتىر. بۇگىندە وزبەكستان مەملەكەتىنەن كوگىلدىر وتىن، ماقتا تالشىقتارى، حيميالىق ونىمدەر، تىڭايتقىشتار مەن كوكونىستەر يمپورتتالادى.

وقو اكىمىنىڭ ءباسپاسوز قىزمەتى