كۇزگى اسكەرگە شاقىرۋ ناۋقانى اياسىندا شىمكەنت قالاسىنىڭ35748 اسكەري بولىمشەسىنىڭ جاتتىعۋ الاڭىندا جاستاردى قر قارۋلى كۇشتەرى قاتارىنا سالتاناتتى شىعارىپ سالۋ ءراسىمى ءوتتى. وڭتۇستىك قازاقستان وبلىسىنىڭ 55 ازاماتى ەلىمىزدىڭ قۇرلىقتىق اسكەر بولىمشەلەرىنە قىسقا مەرزىمدى وتان الدىنداعى بورىشىن وتەۋگە اتتاندى. اتالعان شاراعا ءوڭىر باسشىسى جانسەيىت تۇيمەباەۆ قاتىسىپ، ەرتەڭگى ساربازدارعا قىراعىلىق پەن ساتتىلىك تىلەدى.

«بيىلدىڭ وزىندە قازاقستان رەسپۋبليكاسىنىڭ قارۋلى كۇشتەرى قاتارىندا 2,5 مىڭنان استام وڭتۇستىك ازاماتتارى بار. ءار ادام وتانىن ءسۇيۋدى وزىنەن باستاسا عانا ناتيجە شىعادى، ياعني ەلىمىز دامىپ، جەر كوركەيەدى. مىنە سول ءۇشىن دە ءار ادام ءوز دەڭگەيىندە ەلىمىزدىڭ وركەندەپ وسۋىنە، گۇلدەنۋىنە، تىنىش ءارى بەيبىت ءومىر سۇرۋىنە ۇلەس قوساتىنىنا سەنىمدىمىن. جاس ساربازدارعا ەلدى قورعاۋدا تابىس تىلەيمىن»،-دەدى وبلىس باسشىسى.

ەل تاۋەلسىزدىگىنىڭ 25 جىلدىق مەرەيتويىنىڭ قارساڭىندا، جاس بۋىن وتان الدىندا مەملەكەتىمىزدىڭ تۇتاستىعى مەن تىنىشتىعىن جانە ەگەمەندىگىن ساقتاۋ ءۇشىن اسكەري بورىشىن وتەمەك. سالتاناتتى شارا بارىسىندا ساربازدار اسكەري كورنەكى قويىلىم كورسەتىپ، ارنايى كيىمدەر مەن تەحنيكالاردىڭ كورسەتىلىمىن ۇيىمداستىردى. ال، جاتتىعۋ كەشەنىندە اسكەري-پاتريوتتىق كلۋبتار مەن ۇيىرمەلەردىڭ تۇلەكتەرى بمپ-2,ت-2 قۇرلىق اسكەرلەرى جاۋىنگەرلىك تەحنيكالارىنىڭ ستيمۋلياتورىندا ءوز كۇشتەرىن سىناپ كوردى.

ەستەرىڭىزگە سالساق، كۇزگى اسكەرگە شاقىرۋ ناۋقانى 1 قازاننان باستالدى. جىل سايىن وڭتۇستىك قازاقستان وبلىسىنىڭ جەرگىلىكتى اسكەري باسقارمالارى قر قارۋلى كۇشتەرىنە، باسقا دا اسكەر مەن اسكەري قۇرامالارعا 4 مىڭنان  استام ادامدى وتان الدىنداعى بورىشىن وتەۋگە جىبەرەدى. بۇل ەلىمىز بويىنشا ەڭ جوعارعى كورسەتكىش بولىپ سانالادى. اعىمداعى جىلدىڭ 24 قازانى مەن 19 قاراشا ارالىعىندا شىمكەنت قالاسىنىڭ ورتالىق جيناقتاۋ بەكەتىنەن 500-دەي اسكەري مىندەتتىلەردى قر قورعانىس مينيسترلىگىنىڭ بولىمشەلەرىنە شىعارىپ سالۋ جوسپارلانىپ وتىر.

Abai.kz