رەسەيلىك تاسس اگەنتتىگىنە سۇحبات بەرگەن رف سىرتقى ىستەر مينيسترلىگىنىڭ وكىلى ەلەونورا ميتروفانوۆا «بۇرىنعى وداققا مۇشە بولعان ەلدەردە ورىس تىلىنە ەرەكشە جاعداي جاسالۋى ءتيىس» دەپتى.

«ورىس تىلىنە قاتىستى الەم ەلدەرىندە پروبلەما كوپ. سونىڭ ىشىندە ەڭ جاقىن كورشى ەلدەردەگى ورىس ءتىلىنىڭ ستاتۋسى بولىپ وتىر. ورىس تىلىنە ايرىقشا مارتەبە الىپ بەرۋ ءبىزدىڭ باستى مىندەتىمىز. تىم قۇرىسا تمد اۋماعىندا ورىس ءتىلى حالىقارالىق قاتىناس ءتىلى بولۋ كەرەك. قازىر ونىڭ ءوزى قيىن بولىپ وتىر»، - دەيدى ميتروفانوۆا.

ميتروفانوۆانىڭ مەڭزەپ وتىرعانى ۋكراينا مەن بالتىق ەلدەرى بولعانىمەن قاۋىپتى ءسوزدىڭ قازاققا دا قاراتا ايتىلىپ تۇرعانىن اڭداۋ قيىن ەمەس.

بۇۇ 2015 جىلعى دەرەگىنە كوز جۇگىرتسەك، تمد اۋماعىندا 138 ميلليون حالىق بولسا، ولاردىڭ 61 ميلليونى ورىس تىلىندە ەركىن تىلدەسەدى ەكەن.

ياعني، بۇل كورسەتكىش پۋتين بيلىگىنە ۇنامايدى. ەندى ولار، تمد اۋماعىندا ورىس ءتىلىن سالتانات قۇرعىزۋ ءۇشىن قوقان-لوقى جاساي باستايدى دەگەن ءسوز. 

جالپى، رەسەي حالىقارالىق زاڭ نورمالارىندا كورسەتىلمەگەن، ارعى-بەرگى تاريحتا بولماعان "جاڭالىق" اشۋعا قۇمار ەل. "جەر بەتىندەگى ءورىستىلدى حالىقتاردى قورعايمىز" دەپ ايدى اسپاننان شىعارعان كەزدە ءبىزدىڭ مەملەكەت ونسىز دا قالى مۇشكىل ءوز ءتىلىن ەكىنشى ساناتقا ىسىرا سالىپ، ورىس ءتىلىنىڭ دامۋىنا بار جاعداي جاساپ بەرە قويدى. ونى قويشى، قازىر رەسەيدەگى كوپتەگەن ساياساتكەرلەر "وتانداستار" دەگەن سۋ جاڭا ۇعىم ويلاپ تاۋىپ، شاڭىراعى باياعىدا ورتاسىنا تۇسكەن كسرو تۇرعىندارىنىڭ "قۇقىعىن قورعاماق" بولىپ ءجۇر. 

ولار ايتقان "وتانداستاردىڭ" ىشىندە ءبىزدىڭ ەلدە قازاقتىڭ نانىن جەپ وتىرىپ، جۇرەگى رەسەي دەپ سوعاتىن ازاماتتار كوپ ەكەنىنە ءشۇبا كەلتىرە المايمىز. بۇگىننىڭ وزىندە قوس ازاماتتىعى (قر زاڭدارىن پىسقىرمايدى، ولار) بار ولار، ەندى ونسىز دا رەسمي ءتىل دەگەن ستاتۋسى بار تىلدەرىن ونان ارمەن داڭعىل جولعا سالۋ ءۇشىن بارىن سالاتىنى بەلگىلى.

قازاقستاندا تۇرىپ، رەسەي بيلىگىنىڭ ايتقانىمەن جۇرەتىن، سونى تالاپ ەتەتىن ازاماتتار پايدا بولىپ جاتسا، ەلىمىزدىڭ قۇزىرەتتى ورگاندارى قاراپ وتىرماۋعا ءتيىس.

رەسەيدىڭ سىرتقى ىستەر ءمينيسترى ءوز ءسوزىن ەمەس، مەملەكەتتىڭ پوزيتسياسىن ءبىلدىردى.

بۇعان ءبىز سەكىلدى ەلدەر نە دەپ ءتىل قاتار ەكەن؟

ۋاقىت كورسەتەر! 

ءشارىپحان قايسار

Abai.kz