وڭتۇستىك قازاقستان وبلىسىنىڭ اكىمى جانسەيىت تۇيمەباەۆ بۇۇ قازاقستانداعى تۇراقتى ۇيلەستىرۋشىسى، بۇۇ «دامۋ» باعدارلاماسىنىڭ تۇراقتى وكىلى نوريماسا شيمومۋرا مىرزامەن كەزدەستى.

دەلەگاتسيا مۇشەلەرىمەن بولعان جيىندا قر ۇكىمەتى مەن بۇۇ بىرلەسكەن باعدارلامالارىن ىسكە اسىرۋ بارىسىنداعى جاسىل ەنەرگەتيكا، قورشاعان ورتانى قورعاۋ، وڭىرلىك ىنتىماقتاستىق، اۋماقتىق دامۋ جانە ءتيىمدى باسقارۋ اياسىنداعى جوبالار جايى قارالدى. جوعارىدا اتالعان جوبالار بۇگىندە وبلىستا جۇزەگە اسىرىلىپ جاتقانىن ايتقان اكىم حالىقارالىق دەڭگەيدە تاجىريبەسى مول ۇيىممەن ءاربىر باعىت بويىنشا بىرلەسە جۇمىس جاساپ، ودان ءارى دامىتۋ ءوڭىرىمىز ءۇشىن ءتيىمدى بولاتىنىنا سەنىم ءبىلدىردى. 
«بالامالى ەنەرگيا سالاسىن دامىتۋ باعىتىندا 27 جوبا ىرىكتەلىپ، 10 جوبا ناقتى جۇزەگە اسۋدا. ال ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ سالاسىندا قر ينۆەستيتسيالار جانە دامۋ مينيسترلىگى مەن وبلىس اكىمدىگى جانە «شىمكەنت-تسەمەنت» اق اراسىندا ءۇش جاقتى كەلىسىم جاسالدى. بۇل ءوز كەزەگىندە بەس جىل ىشىندە ەنەرگيا تۇتىنۋدى 15 پايىزعا ازايتۋعا مۇمكىندىك بەرەتىن بولادى»،-دەدى وبلىس اكىمى. 

وتىرىستا بۇۇ دب تۇراقتى وكىلى نوريماسا شيمومۋرا قورشاعان ورتانى قورعاۋ ماقساتىنداعى جوبالاردى جۇزەگە اسىرۋدا قازاقستان ۇكىمەتى ۇلكەن قولداۋ ءبىلدىرىپ وتىرعانىن ايتىپ، بۇگىندە بىرقاتار جوبالار رەسپۋبليكا وڭىرلەرىندە ءساتتى ىسكە اسىپ جاتقانىن جەتكىزدى.

«شىعىس قازاقستان، قىزىلوردا جانە ماڭعىستاۋ وبلىستارىندا جوعارىدا اتالعان جوبالار تابىستى جۇمىس جاساپ كەلەدى. وسى باعىتتاعى جۇمىستاردى وڭتۇستىك وڭىرىندە دە ىسكە اسىرۋدا بىرلەسە جۇمىس جاساۋعا نيەتتىمىز. ماسەلەن، شىمكەنت وسى بەسجىلدىق جوبا اياسىندا ىرىكتەلىپ الىنعان 15 پيلوتتىق قالالاردىڭ ءبىرى بولىپ تابىلادى. وسىنداعى قالا ينفراقۇرىلىمى مەن تۇرعىن-ءۇي كوممۋنالدىق شارۋاشىلىعى جانە ەنەرگەتيكا، كولىك سىندى جوبالاردى انىقتاۋعا، ولاردى ازىرلەۋگە جانە ىسكە اسىرۋعا جاردەمدەسۋگە دايىنبىز»،- دەدى نوريماسا شيمومۋرا. 

وڭتۇستىك قازاقستان - حالقى كوپ وبلىس بولعاندىقتان پروبلەمادا جوق ەمەستىگىنە توقتالعان ايماق باسشىسى، الداعى ۋاقىتتا ۇسىنىلعان باعدارلامالار بويىنشا تىعىز بايلانىستا جۇمىس جاسالاتىنىنا سەنىم ءبىلدىردى. 

وڭتۇستىك قازاقستان وبلىسىنا جۇمىس ساپارىمەن كەلگەن دەلەگاتتار وبلىستاعى قولونەر ورتالىعىنىڭ جۇمىسىمەن تانىسىپ، م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىمەن بىرلەسكەن «بۇۇ ەرىكتىلەر باعدارلاماسى» جاستار فورۋمىنا قاتىستى.

Abai.kz