جاقىندا بۇۇ باس اسسامبلەياسى رەسەي اننەكتسيالاپ العان قىرىمنىڭ ماسەلەسىن تالقىلادى. دالىرەك ايتساق، قىرىمداعى ادام قۇقىقتارىنىڭ ورەسكەل بۇزىلۋىنا بايلانىستى رەسەي بيلىگىنە ۇندەۋ جولداپ، حالىقارالىق ساراپشىلاردى كىرگىزۋدى سۇراعان رەزوليۋتسيا قابىلداندى. بۇل تۋرالى وزبەكستاندىق «fergananews.com» پورتالى حابارلادى.

بۇۇ-دا قىرىمداعى ادام قۇقىقتارىنىڭ بۇزىلۋىنا رەسەي بيلىگىن ايىپتاعان قۇجات داۋىسقا سالىندى. اقش، بريتانيا، كانادا، تۇركيا باستاعان، ەۋرو وداق اۋماعىنداعى 23 ەلدى قوسقاندا بارلىعى 73 مەملەكەتتىڭ وكىلى رەزوليۋتسيانى قولداپ داۋىس بەرگەن. ال قازاقستان، وزبەكستان، قىتاي جانە يران بۇل قۇجاتتى قولداماپتى.

قالىس قالىپ، قىرىم ماسەلەسىندە نەيترالدى پوزيتسيانى ۇستانعان 76 مەملەكەتتىڭ ىشىندە قىرعىزستان مەن تاجىكستان بار. اتالعان جيىندا تۇركىمەنستان مەن اۋعانستان وكىلدەرى داۋىس بەرۋ راسىمىنە قاتىسپاعان.

بۇۇ-نىڭ ءتورت بەتتىك رەزوليۋتسياسىندا قىرىم اۋماعىنداعى ادام قۇقىقتارىنىڭ ورەسكەل بۇزىلۋى، ۇلتارالىق ديسكريميناتسياعا جول بەرىلۋ ماسەلەلەرى قامتىلعان. سونىڭ ىشىندە قىرىم تاتارلارى مەن ۋكراين ەتنيكاسى وكىلدەرىنە جاسالىپ جاتقان قىسىم تۋرالى باياندالىپتى.

رەزوليۋتسيادا رەسەي بيلىگىن اتالعان ماسەلەلەردى دەرەۋ شەشىپ، قىرىم تۇرعىندارىنا قىرىن قاراۋدى دوعارۋدى تالاپ ەتكەن.

سونداي-اق، حالىقارالىق ساراپشىلار كىرگىزۋ ماسەلەلى مەن رف جوعارعى سوتىنىڭ 2016 جىلعى 26 ساۋىردە شىعارعان شەشىمىن جويۋ ماسەلەسى كوتەرىلگەن. ايتا كەتەيىك، رف جوعارعى سوتى قىرىمداعى «قىرىم تاتارلارىنىڭ ءماجىلىسىن» ەكستريميستىك ۇيىم دەپ تانىعان بولاتىن.

ال بۇۇ-داعى ۋكراينا وكىلى ۆلاديمير ەلچەنكو مالىمدەمە جاساپ، رەزوليۋتسيانى قولداماعان ەلدەرگە وكپەسى قارا قازانداي ەكەنىن ايتقان.

ەستەرىڭىزگە سالا كەتەيىك، 2014 جىلى اياق استى جاسالعان رەفەرەندۋم ناتيجەسىنە سۇيەنىپ، رەسەي بيلىگى قىرىمدى اننەكتسيالاپ العان. بۇل كەزدە بۇۇ قىرىمنىڭ رەسەي قۇرامىنا قوسىلۋىن زاڭسىز دەپ تانىعان بولاتىن.

بۇۇ باس اسسامبلەياسىنىڭ قىرىم ماسەلەسىندەگى جيىنىنا 193 مەملەكەت قاتىسىپ، پاليستينا مەن ۆاتيكان باقىلاۋشى ميسسياسىن ورىنداعان.

Abai.kz