قۇرمەتتى پرەزيدەنتىمىز نۇرسۇلتان ءابىشۇلى  نازارباەۆ مىرزا!

ارمىسىز حالقىمىزدىڭ قادىرلى ازاماتى، نۇرەكە؟!

ەڭ اۋەلى زامانداس رەتىندە، جاراتۋشى ءبىر اللادان دەنىڭىزگە ساۋلىق  تىلەيمىن. «مىڭ ءولىپ، مىڭ  تىرىلسە دە» سالماقتى دا سابىرلى، اڭقاۋ قالپىنان تانباعان جۇرتىمىزدىڭ كەلەشەگى مەن تاۋەلسىزدىگىنە جاۋاپ بەرەر اماناتىڭىزدىڭ  اسا  اۋىر ەكەنى امبەگە ايان! زىمىراعان ۋاقىتا دا توقتاۋ جوق. مىنە، شيرەك عاسىر، ياعني 25 جىل وتە شىعىپتى.

بۇل جولى سىزگە مەملەكەتىمىزدىڭ كەلەشەگى ءۇشىن اۋاداي قاجەت 3 ءتۇرلى ماسەلەنى ۇسىنا وتىرىپ، اقىلداسقاندى ءجون سانادىم ;

ءبىرىنشى، - بىزدەر ونداعان جىلدار بويى ايتىپ كەلە جاتقان « ...ىلەنىڭ سۋى ازايىپ، بالقاشتىڭ تارتىلىپ»  بارا جاتقانىنا قاتىستى ۇسىنىس؟!

الاتاۋدىڭ الماتى جاعىنداعى بەتىندە ۇلكەندى-كىشىلى 800-گە تارتا كول بار. مىنە وسى كولدەردىڭ ءزامزامداي تازا سۋلارى جاز بويى بۋلانىپ اسپانعا ۇشىپ جوق بولۋدا؟!. وسىنى عىلىمي زەرتتەي وتىرىپ، پايدالانۋدىڭ جولىن  تاپساق... قىتايعا دا، قىرعىزعا دا جالىنىشتى بولماس ەدىك. ول ءۇشىن وسى كولدەردى 1-1,5 مەتر تەرەڭدىكتەن الماتىنىڭ ۇستىنەن اعىپ جاتقان سەگىز وزەنگە قوسساق، بىرىنشىدەن جىلدا قاۋىپتەنەتىن سەلدەن قۇتىلار ەدىك. ەكىنشىدەن،  الماتى ماڭىنان جاساندى 8 كول جاساپ، بالىق پەن ورمان  شارۋاشىلىعىن  دامىتۋعا جول اشىلار ەدى. ۇشىنشىدەن، تارتىلۋ قاۋپى تونگەن بالقاشتىڭ سۋىن مولايتار ەدىك. بۇل جايىندا بىلتىر الماتىنىڭ جاس اكىمى باۋىرجان بايبەكتىڭ قابىلداۋىندا بولىپ ايتقان ەدىم...

ال جەتىسۋداعى  43 وزەندى قوسۋ ارقىلى بالقاشتى تەڭىزگە اينالدىرىپ، بۇكىل قازاقستاننىڭ ەكولوگياسىن تۇرلەندىرۋدىڭ قاجەتتىگىن الماتى وبلىسىنىڭ اكىمى اماندىق باتالوۆقا باق ارقىلى حابارلاعانمىن. وسى يدەيانى وزىڭىزگە جەتكىزۋدى ءجون كوردىم...

ەكىنشى ۇسىنىس. ءسىزدىڭ ايتقان: «2020 جىلى قازاقستان ازاماتتارىنىڭ 90%-ى  مەملەكەتتىك تىلدە سويلەيدى» دەگەن تۇجىرىمدى ىسكە اسىرۋ مەحانيزىمىن ۇسىنامىن. ول ءۇشىن بيىل دايىندالىپ، 2017-ءشى جىلدىڭ قىركۇيەگىنەن باستاپ ەنگىزىلەتىن ءبىلىم رەفورماسىن وزگەرتىپ، مەملەكەت قارجىلاندىرىپ، وتىرعان بۇكىل مەكتەپتەردىڭ 1-ءشى سىنىپتارىنان باستاپ بارلىق پاندەردى تۇگەلدەي مەملەكەتتىك تىلدە جۇرگىزۋ كەرەك. سوندا، ءوزىڭىز ايتقان «قازاقستان حالقىنىڭ بىرلىگى - قازاق تىلىندە» دەگەن ۇلاعاتتى ءسوز ءىس جۇزىندە جۇزەگە اسا باستايدى.

ءۇشىنشى ۇسىنىس. مەن ۇسىنىپ جۇرگەن «ۇرپاق تاربيەسىنىڭ جاڭا ءىلىمىن» مەملەكەتتىك دەڭگەيدە ءوزىڭىزدىڭ باسشىلىعىڭىزبەن قولدانىسقا ەنگىزۋىمىز قاجەت. بۇل ءىلىمنىڭ پايداسىنىڭ دالەلى – وسى تەحنولوگيامەن ومىرگە كەلگەن رەسپۋبليكامىزداعى 2 000-عا تارتا ءبۇلدىرشىن بولا الادى. وزىڭىزگە جاقسى تانىس  بالا جامبىل – وسى ءىلىمنىڭ جەمىسى. ەگەر مۇمكىندىك بولسا، ءوزىڭىزدىڭ قابىلداۋىڭىزدا بولىپ، بۇل جايىندا تولىق ماعۇلىمات بەرەر ەدىم...

ەل-جۇرتىمىزعا قاجەت وسى ۇسىنىستاردى جولداۋشى  جازۋشى-عالىم، مەديتسينا جانە پەداگوگيكا عىلىمدارىنىڭ دوكتورى، قازاقستاننىڭ ەڭبەك سىڭىرگەن قايراتكەرى، اكادەميك سوۆەت-حان  عابباسۇلى دەپ بىلەرسىز.

Abai.kz