بۇگىن وبلىس اكىمدىگىندە وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ توراعالىعىمەن كەزەكتى سەلەكتورلىق جيىن ءوتتى. باسقوسۋعا باسقارما باسشىلارى مەن اۋدان، قالا اكىمدەرى قاتىستى. كۇن تارتىبىندە ەكى ماسەلە - بيۋدجەت ەسەبىنەن قۇرىلىسى جۇرگىزىلىپ جاتقان نىسانداردىڭ ساپاسى مەن قاتتى تۇرمىستىق قالدىقتاردىڭ پوليگوندار ورىندارى جايى قارالدى.

جيىندا العاشقى تاقىرىپ بويىنشا ءسوز العان وقو مەملەكەتتىك ساۋلەت-قۇرىلىس باقىلاۋى باسقارماسىنىڭ باسشىسى قۇتتىبەك جاماشەۆ سالادا اتقارىلعان جۇمىستار اياسىندا بايانداما جاسادى.  ايتۋىنشا، باسقارما تاراپىنان 2016 جىلى وبلىستىڭ اۋدان، قالالارىندا سالىنىپ جاتقان قۇرىلىس نىساندارىنا 1769 رەت تەكسەرۋ جۇرگىزىلىپ، ونىڭ وزگە دە تۇرىندەگى باقىلاۋ جانە قاداعالاۋ جۇمىستارى ۇيىمداستىرىلعان.

ناتيجەسىندە، عيماراتتاردا انىقتالعان كەمشىلىكتەر بويىنشا 672 نۇسقاما بەرىلسە، نۇسقامامەن جويىلماعان ولقىلىقتار بويىنشا جانە قۇرىلىس نىساندارىنىڭ ساپاسىن تەكسەرىپ بەرۋ تۋرالى ارىز-شاعىمدارعا سايكەس، 535 تەكسەرۋ تاعايىنداۋ اكتىلەرى اشىلعان. سونىمەن بىرگە، 125 مەردىگەر مەن 24 جوبالاۋشى مەكەمەگە شارا كورىلىپ، 2 مەردىگەر مەن 2 جوبالاۋشى مەكەمەنىڭ ليتسەنزياسى الىنسا، 5 مەردىگەردىڭ ليتسەنزياسىنىڭ كىشى جۇمىس تۇرلەرى شەڭبەرىندە جويىلىپ، 3 مەردىگەردىڭ ليتسەنزياسى ۋاقىتشا توقتاتىلدى.

ولقىلىقتاردىڭ باسىم بولىگى قۇرىلىس نىساندارىنىڭ جوبالىق سمەتالىق قۇجاتتارىنىڭ كەش ازىرلەنگەندىگى مەن ونى پايدالانۋعا كەش تاپسىرۋ، سونىمەن بىرگە، قۇرىلىس نورمالارىن ساقتاماۋعا قاتىستى. ماسەلەن، مۇنداي كەمشىلىكتەر تولەبي، بايدىبەك، سوزاق، ورداباسى، ماقتارال اۋداندارىندا ورىن العان.

مۇنان سوڭ، وبلىس اكىمى سالادا ورىن العان كەمشىلىكتەر بويىنشا ءتيىستى اۋدان، قالا اكىمدەرىنىڭ جاۋابىن تىڭداپ، ولقىلىقتاردى تەز ارادا جويۋ قاجەتتىگىنە توقتالدى. تەكسەرۋلەر جۇرگىزىلىپ، شارا كورىلگەن كومپانيالاردىڭ ازدىعىن سىنعا العان ءوڭىر باسشىسى بۇل جۇمىستاردى قايتا ەلەكتەن وتكىزىپ، جۇمىسىنا سالعىرت قارايتىن مەردىگەرلەردى قايتا تالداۋ جاساۋدى جۇكتەدى.

وبلىستىق قۇرىلىس باسقارماسى مەن وبلىستىق مەملەكەتتىك ساۋلەت-قۇرىلىس باقىلاۋى باسقارماسىنىڭ باسشىلارىنا ايتىلعان نۇسقامالاردا جانسەيىت قانسەيىتۇلى جۇمىستاردى اتقارۋداعى كەمشىلىكتەردى جويۋدىڭ جاڭا ءتاسىلىن ويلاستىرىپ، ۇسىنىس جاساۋدى تاپسىردى. سونىمەن بىرگە، قۇرىلىس سالاسىنداعى ساپانى باقىلاپ، جۇمىستار قارقىنىن ءبىلىپ وتىرۋ سىندى جۇمىستار جيىنتىعىن قۇرايتىن ارنايى ونلاين-رەەستر ازىرلەۋدى جۇكتەدى. 

مۇنان سوڭ، كۇن تارتىبىندەگى ەكىنشىسى ماسەلە اياسىندا وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى مۇحيت وتارشيەۆ وڭتۇستىك قازاقستان وبلىسىنىڭ اۋماعىندا قاتتى تۇرمىستىق قالدىقتار تاستايتىن پوليگوندار ورىندارىنىڭ قازىرگى جاعدايىنا تالداۋ جۇرگىزىپ، 2008-2015 جىلدار ارالىعىندا قولدانىستاعى قاتتى تۇرمىستىق قالدىقتار تاستايتىن 44 پوليگونعا قۇرىلىس جانە كۇردەلى جوندەۋ جۇمىستارى جۇرگىزىلىپ، سانيتارلىق-ەكولوگيالىق تالاپتارعا سايكەستەندىرىلگەنىن حابارلادى.

«قازىرگى تاڭعا 844 ەلدى مەكەن 176 پوليگون ورنىمەن قامتىلعان. الايدا، ەلدى مەكەننەن پوليگونعا دەيىن 400 مەتردەن 90 كم-گە دەيىنگى ارا قاشىقتىقتى قۇراپ وتىر. ونىڭ ىشىندە، 259 ەلدى مەكەن بويىنشا 20 كم-دەن 100 كم-گە دەيىن ارا قاشىقتىقتا. ياعني، بۇل ەلدى مەكەندەردە تۇرمىستىق قالدىقتار بەي-بەرەكەت تاستالۋدا دەگەن ءسوز»، - دەدى باسقارما باسشىسى.

ماقتارالدا نەبارى 4, شىمكەنتتە 2 عانا قوقىس پوليگونى بارىن جەتكىزگەن م.وتارشيەۆ وبلىستاعى بىرقاتار اۋدان، قالالاردا قوقىس ورىندارىنىڭ جەتكىلىكسىزدىگىن، بۇل ماسەلەنى رەتتەۋدە جەرگىلىكتى اتقارۋشى ورگانداردىڭ اسىقپاي وتىرعانىن العا تارتتى. 

تازالىقتى ساقتاۋ ماسەلەسىنە قاتىستى ويىن بىلدىرگەن وبلىس اكىمى سەنبىلىكتەردى تۇراقتى وتكىزىپ وتىرۋ ماسەلەنى شەشپەيتىنىن ەسكەرتىپ، بۇل جايدى رەتتەۋ ءۇشىن ارنايى مەكەمەنىڭ اينالىسۋى كەرەكتىگىن جەتكىزدى.

باسقارما باسشىسىنىڭ بايانداماسىن قاناعاتتانارلىقسىز دەپ ەسەپتەگەن اكىم اۋدان، قالالارداعى شاشىلىپ جاتقان قوقىستاردى جيناپ، وتاندىق جانە شەتەلدىك قوناقتار كەلگەندە ۇيالمايتىنداي جاعداي جاساۋ قاجەتتىگىن، ونىڭ ىشىندە، كوشە، نىساندار ماڭىنان اجەتحانا سالۋ جايىن، كوپقاباتتى ۇيلەردىڭ كىرەبەرىستەرىن (پودەزد) تازا ۇستاپ، جارىقتاندىرۋ ماسەلەسىن قاتاڭ تاپسىردى. بۇل جۇمىستارعا بارلىق قۇرىلىمداردىڭ جاپپاي اتسالىسۋى قاجەتتىگىن ەسكەرتكەن ج.تۇيمەباەۆ قوقىستاردى جيناۋعا 3 كۇن مەرزىم بەرسە، اجەتحانا سالۋعا 1 اپتا، كىرەبەرىستەردى رەتتەۋگە 2 اپتا ۋاقىت بەردى. اتالعان مەرزىم اياقتالعاننان كەيىن وبلىس əكىمى ءتيىستى نىسانداردى ەسكەرتپەستەن ارالايتىن بولادى.

اباي اقپارات