الداعى تاياۋ كۇندەردىڭ بىرىندە مەملەكەتتىك ورگانداردا قىزمەت ەتەتىن شەندىلەر بىرىڭعاي كيىم كيىپ جۇرسە، تاڭ قالماڭىز. «NewTimes.kz» اقپاراتتىق اگەنتتىگىنىڭ تىلشىسىنە اتى-ءجونىن اتاماۋدى ءوتىنىپ سۇحبات بەرگەن مەكەمە قىزمەتكەرى وسىنداي ءبىر شەتىن اڭگىمەنىڭ شەتىن شىعارىپ وتىر. الگى ادامنىڭ ايتۋىنا قاراعاندا، لاۋىزىمدى قىزمەت يەلەرى كيەتىن كيىمنىڭ ورتاق نۇسقاسى زاڭ اياسىندا بەكتىلىپ، قابىلداناتىن كورىنەدى. اگەنتتىك تىلشىسىمەن سىر بولىسكەن شەنەۋنىك تاۋەلسىزدىك كۇنىنە دەيىن بىرىڭعاي ۇلگىدەگى كيىمدەردى كيىپ ۇلگەرەتىن شىعارمىز دەپتى.

ءجون-اق. ء«جون-اق» بولعاندا بۇل تالاپ قىزمەت ورنىنا «بارىن كيىپ، باقانىن قولىنا ۇستاپ» باراتىن سانقوي مىرزالار مەن حانىمدارعا ۇناي قويار ما ەكەن؟ قاي ءبىر جىلى ەسىمىزدە، ەلباسىنىڭ ءوزى «استانالىقتار استانا جۇرتى ەكەندىگىن تانىتىپ، دۇرىس كيىنىپ ءجۇرۋى كەرەك» دەگەن ءسوزدى ايتىپ ەدى، شەندى-شەكپەندى ايەل شەنەۋنىكتەر ەلورداداعى قىمبات سالونداردى قارا شىبىنداي قاپتاپ بارىپ، باسىپ قالعان. ال، سودان جارىس باستالسىن... ءتىپتى، باكىت سىزدىكوۆا دەيتىن دەپۋتات توتايلاردىڭ ەسىرگەنى سونشالىق – ەمشەكقاپتارىنىڭ كولەمى مەن باعاسىن ايتىپ ماقتانعان-دى. سىزدىكوۆالاردىڭ سىقپىتىن بىلەتىن ساۋداگەرلەر بۇندايدا ايانىپ قالسىن با، ەمەشەكقاپتاردىڭ نارقىن سول كەزدە ەڭىرەتىپ وتىرىپ 70-80 مىڭ تەڭگەگە دەيىن كوتەرىپ ساتقان بولاتىن. ەمشەكقاپتىڭ باعاسى الگىندەي بولعان سوڭ كويلەك-كونشەكتىڭ قۇنى قۇنان-بايتالدىڭ باسىنەن دە اسىپ كەتكەن. ءسويتىپ، القىمى ىسكەن استانالىق توتايلار ءبىر تويلاپ قالىپ ەدى. ساياساتتاعى الەم-جالەم (گلامۋرنىي) ەركەتەر دە حايالداردان قالماي ەسىرىپ باققان. ەندى مىنە، كورمەيسىز بە، ەنەڭدى ۇرايىن «ەدينىي فورما» دەگەن بىردەڭە شىعىپ جاتىر. بۇل «ەدينىي فورما» دەگەننىڭ كەۋدە تۇسى – اق، تومەن جاعى – قارا بولاتىن كورىنەدى. تۇسىنىكتى ەتىپ ايتساق، اق كوستيۋم، قارا شالبار...كوك گالستۋك. لاۋازىمى جوعارى شەنەۋنىك كيەتىن كيىمىنىڭ دە «لاۋازىمى» جوعارى بولۋى مۇمكىن ەكەن. «جوعارى بولعاندا» قانداي؟ ازىرگە بەلگىسىز. ايتسە دە شەندىلەردىڭ بىرىڭعاي «شەكپەن» كيەتىنى انىق.

مىنا جاڭالىقتى ەستي سالىپ «جادو» دەگەن اتپەن تانىمال ديزاينەر-مودلەر جادىرا ساحيەۆا  بىلەكتى ءتۇرىپ تاستاپ ىسكە كىرىسكەلى وتىرعان كورىنەدى. قۇرالاي نۇرقادىلوۆا دا بۇل ناۋقاننان، ءسىرا، قۇر قالا قويماس...

دەگەنمەندە ايتا كەتەلىك، شەنەۋنىكتەردىڭ بىرىڭعاي كيىم ۇلگىسى حح عاسىرعا دەيىن باتىس ەلدەرىندە، رەسەيدە دە بولعان. قازىر بىلۋىمىزشە، ءبىر ءتۇستى، بىرىڭعاي فورمادا قىتايدىڭ، سولتۇستىك كورەيانىڭ شەنەۋنىكتەرى كيىنەدى.

Abai.kz