جەمقورلىققا قارسى ءىس-قيمىل جونىندەگى ۇلتتىق بيۋرو Central Asia Monitor جانە Radiotochka.kz باسىلىمدارىنىڭ باس رەداكتورى بيگەلدى عابدۋللينگە قاتىستى سوتقا دەيىنگى تەرگەۋدى باستادى، - دەپ حابارلايدى اباي-اقپارات ۇلتتىق بيۋرو ءباسپاسوز قىزمەتىنە cىلتەمە جاساي وتىرىپ.

قازىر بيگەلدى عابدۋللين ۇستالىپ، استانا قالاسى ءىىد-ءنىڭ ۋاقىتشا ۇستاۋ يزولياتورىنا قامالعان. قىلمىستىق قۋدالاۋ ورگانى عابدۋلليندى وزىنە باعىنىشتى اقپارات قۇرالدارىندا «مەملەكەتتىك ورگان باسشىلارىنا قاتىستى ولاردىڭ ىسكەرلىك بەدەلىن تۇسىرەتىن جاعىمسىز ماتەريالداردى جاريالاۋ ارقىلى اقپاراتتىق شابۋىلداردى ۇدەتىپ، سىندى دوعارۋ ءۇشىن لاۋازىمدى تۇلعالاردان ءوز مەديارەسۋرستارىنا مەملەكەتتىك تاپسىرىس الىپ كەلگەن» دەگەن مالىمەت تاراتتى.

ۆەدومستۆو سونداي-اق، كەيبىر شەنەۋنىكتەردىڭ عابدۋلليننىڭ مۇددەسىن جۇزەگە اسىرۋعا، مەملەكەتتىك تاپسىرىس تۋرالى كەلىسىمدەرگە قول قويۋعا ىقپال ەتكەنىن مالىمدەدى. «سودان كەيىن (مەملەكەتتىك تاپسىرىس تۋرالى كەلىسىمنەن كەيىن – رەد.) عانا ولاردىڭ قىزمەتى تۋرالى جاعىمدى ماتەريالدار جاريالانعان. ماسەلەن، جامبىل وبلىستىق اكىمدىگىنەن ول 10 ميلليون تەڭگە كولەمىندەگى بيۋدجەت قارجىسىن بوپسالاعان. وسىنداي جولمەن عابدۋللينگە تاعى جەتى مەملەكەتتىك ورگان اقشا اۋدارعان»، - دەلىنگەن حابارلامادا.

بۇعان دەيىن سالىق تولەۋدەن جالتاردى، الاياقتىق جاسادى دەگەن ايىپپەن قازاقستان جۋرناليستەر وداعىنىڭ توراعاسى سەيىتقازى ماتاەۆ پەن ونىڭ ۇلى، «قازتاگ» حاا باسشىسى اسەت ماتاەۆ قۋعىندالىپ، س. ماتاەۆ التى، ءا. ماتاەۆ بەس جىلعا باس بوستاندىعىنان ايرىلعان بولاتىن.

اباي-اقپارات