ءانشى، سازگەر، ساتيريك، ءبىر سوزبەن ايتقاندا - ساحنا ادامى، سەمەيلىك ونەرپاز ايمۇحانبەت بەيسەمبەكوۆ تانىمال ازىلكەش تۇرسىنبەك قاباتوۆ حالىقتان كەشىرىم سۇراسىن دەپ جاتىر.

تۇرسىنبەك قاباتوۆ كەزەكتى ءبىر ازىلىندە ەلدى كۇلدىرەمىن دەپ ءبۇلدىرىپ العانعا ۇقسايدى. نەگە دەسەڭىز، قازاقتى الدە جالقاۋ، الدە بار جەرىن يەگەرە المايدى دەگەندى ازىلدەپ ايتقىسى كەلگەن قاباتوۆ"ول (قازاق) ۋف دەدى دە جاڭاعى بالا قۇساپ جونىمەن كەتتى، جەر بولسا بوس جاتىر" –  دەپتى. ءوز الىنشە جەر ماسەلەسىن جەڭىل كۇلكىمەن ايتىپ وتپەك بولعان قاباتوۆ  ساحنا ادامدارىن جەرگە قاراتتى دەپ كۇيىنگەن ايمۇحنابەت بەيسەمبەكوۆ قاباتوۆقا قاراتا مىنانداي حاتى جازدى:

ەي، «كۇلدىرگىش» ، باۋىرىم قاباتوۆ! قازاقستاننان ەگىن سالۋعا، مال جايۋعا جارايتىن ءبىر بوس جەر تاۋىپ بەرشى!

مەن ساعان "تاناۋىمدى" كەسىپ بەرەيىن. ونداي جەردىڭ ءبارى مەنشىككە ءوتىپ كەتكەن. قازىر اۋىل ماڭايىندا شارۋانىڭ مالىن جاياتىن جەرى جوق.

الماتى وبلىسىندا مولا تۇرعان جەر دە ساتىلىپ، جەر يەسى قايتىس بولعان ادامدى اتا- باباسىنىڭ قاسىنا جەرلەتپەي، قانشاما كۇن ءمايىت يىستەنىپ كەتكەنشە جاتىپ داۋ بولعانىن بىلەسىڭ بە؟

اقتوبە وبلىسىندا جەر تۇرماق، قىتايلار مەملەكەتتىڭ جولىمەن قازاقستاندىقتاردى تەگىن جۇرگىزبەي، پوست جاساپ اقشا العانىن بىلەسىڭ بە؟

شىمكەنتتە قانشاما تابيعاتى تاماشا جەردى قورشاپ العان اراب شەيحى قازاقتاردى سول جەردىڭ ماڭايىنان جۇرگىزبەيتىنىن بىلەسىڭ بە؟

الماتى وبلىسى مەن شىعىس قازاقستان وبلىسىنىڭ كوپتەگەن شۇرايلى ەگىن سالاتىن جەرىن قىتايلار پايدالاناتىنىن بىلمەيسىڭ بە؟

ال، ءجاي قارا قازاق وزدەرىنە تيەسىلى ون سوتتىق جەرگە قولى جەتپەي جۇرگەنىن قالاي بىلمەيسىڭ؟

كۇلدىرگىش باۋىرىم، "بۇلدىرگىش" بولماي ايتقىش بولساڭ، ايتساڭشى: ءۇش - تورتتەن كرەديت الىپ تولەي الماي زار جىلاعان حالىقتى، شاراسىزدىقتان قالاعا كەلىپ، باسپاناسىز، جۇمىسسىز قايىرشىنىڭ كۇنىن كەشىپ جۇرگەن اۋىل جاستارىنىڭ جاعدايىن، حالىقتى قان قاقساتىپ جەپ وتىرعان مەنشىك بانكتەردى، سول بانكتەرگە جەگەندەرى از بولعانداي، حالىقتىڭ سالىعىنان جينالعان تريلليونداعان اقشانى ولارعا "كومەككە" بەرىپ جاتقانىن ايتىپ كۇلدىرسەڭشى!

ايتقىش بولساڭ، يتشىلەپ كۇن كورەتىن، 30-40 مىڭ تەڭگە جالاقى الاتىن مۇعالىم، دارىگەر، مادەنيەت پەن ونەر سالاسىنىڭ قىزىمەتكەرلەرى، ءجاي حالىقتىڭ جالاقىسىمەن 600 000-نان 1500 0000 -عا دەيىن جالاقى الاتىن دەپۋتاتتار مەن مينيسترلەردى، وبلىس اكىمدەرىن، بانكيرلەر مەن بيلىكتەگىلەردىڭ جەر مەن كوكتەي ءومىر ءسۇرۋ ايىرماشىلىعىن نەگە كۇلكى ەتپەيسىڭ!

ايتقىڭ كەلسە، ايتار ماسەلە كوپ! بىراق، سەن ونى ايتپايسىڭ! سەبەبى، "كوكەلەرىڭنىڭ" توي-تومالاعىنان جەپ جۇرگەن "مايشەلپەگىڭنەن" ايرىلاسىڭ! مەن بار سانالى ءومىرىمدى كيەلى ساحانادا وتكىىپ كەلە جاتقان اداممىن. سەنىڭ ءبىر اۋىز "شاتپاق" ءسوزىڭ ءۇشىن قازىر حالىق ارتيستتەردى جەردەن الىپ، جەرگە سالىپ، جەرگە تىعىپ جاتىر. سەن ءۇشىن ءبىزدىڭ "بەتىمىزدەن وتىمىز شىعىپ" وتىر.

بۇل ءىسىڭ ماسقارا بولدى! "كەۋدەڭە نان پىسپەسە" قازاقتى "اقىماق بالاعا", جەردى "ويىنشىققا" تەڭەگەن دورەكى مازاعىڭ ءۇشىن حالىقتان كەشىرىم سۇرا!

"قاتپا بالا دەگەن دە، قاتپا بالا!"

شەكتەن شىعىپ، ساندالىپ لاقپا، بالا!

جەر-انانى كۇلكى ەتىپ ساحنادان،

"بەتىڭ كۇيىپ" قالماسىن "وتقا" بالا!

"قاتپا بالا دەگەن دە، قاتپا بالا!"

"كوكەلەرگە" قازاقتى ساتپا، بالا!

"كلوۋنى بيلىكتىڭ" اتانعانشا،

ەل-جۇرتىڭنىن سەنىمىن اقتا، بالا!

ساتيريك "كوكەڭ" ايمۇحانبەت بەيسەمبەكوۆ