تاياۋدا ەاەو وكىلدەرى بىشكەكتە باس قوستى. الايدا ءبىز قازاقستان، رەسەي، بەلورۋسسيا، قىرعىزستان جانە ارمەنيا بەستىگىنىڭ بىرلىگى بىرتىندەپ سەتىنەي باستاعانىن وسىعان دەيىن دە جازعان ەدىك.

بۇل جولى جيىلىسقا رەسەي دەلەگاتسياسىن رف پرەمەر-ءمينيسترى دميتري مەدۆەدەۆ باستاپ كەلىپتى. پەتەربورداعى باس قوسۋدا قىرعىزستان پرەزيدەنتى المازبەك اتامباەۆ ەاەو-داعى تەڭسىزدىك تۋرالى اشىق ايتقان بولاتىن. ارمەنيا وداققا تەك ورتاق اسكەر ءۇشىن كىرگەنىن ايتقان سوڭ، بەلورۋسسيا باسشىسى الەكساندر لۋكاشەنكو ويىنداعىسىن اشىپ ايتىپ سالعان-دى. وداقتىڭ ويرانى شىعار كۇن الىس ەمەستىگىن ەسكەرتكەن ول بەس جىلعا تولار-تولماس ۋاقىت ىشىندە رەسەيگە 15 ميلليارد دوللار بەرىپ قويعانىن ايتىپ كۇيىندى. ءسويتتى دە، "ورىسپەن وداقتى ۇزەم" دەدى.

وسىنىڭ بارلىعىن ءۇنسىز تىڭداپ كەلگەن مەدۆەدەۆ دميتري كرەملدىڭ رەسمي پوزيتسياسىن جايىپ سالدى. "وداقتان شىققىلارىڭ كەلسە، ءبىزدىڭ گازدى ەۋروپالىق باعامەن ساتىپ الاسىڭدار" دەدى توتەسىنەن.

"ەۋرازيالىق ەكونوميكالىق وداق ەشكىمدى كۇشپەن ۇستاپ وتىرعان جوق. تەك ەسكەرىڭىزدەر، وداققا مۇشە كەيبىر ەل ءبىزدىڭ گازدى جەڭىلدىكپەن ساتىپ الۋدا. ەلەستەتىپ كورىڭىزدەر، ەگەر ولار وداقتان شىعاتىن بولسا، قازىر رەسەي گازىن ەۋروپا باعاسىندا ساتىپ الۋشى ەدى. بۇل مىڭ تەكشە مەترىنە 200 دوللاردان بولادى دەگەن ءسوز. ەندەشە ەشتەڭەنى دالەلدەۋدىڭ كەرەگى جوق. سونداعى سومانى ەسەپتەپ اۋرە بولماڭىزدار دا. تيىسىنشە، باعا دا ايتارلىقتاي قىمباتتاۋ بولاتىن ەدى", - دەدى مەدۆەدەۆ.

بۇل كرەمل بوپساسىنىڭ اشىق كورىنىسى بولىپ تابىلاتىن سياقتى. بۇعان بەلورۋسسيا باسشىسى لۋكاشەنكو جاۋاپ بەرىپتى.

"مەنى تاڭ قالدىرعانى - ارىپتەسىم مەدۆەدەۆتىڭ ءسوزى بولدى. بىزگە قوقان-لوققى كورسەتكەن ءتۇرى مىناۋ، ءبىز گاز اقىسىن ەۋرو باعادا تولەيدى ەكەنبىز. بۇل دەگەنىڭىز 150 دوللاردىڭ گازىن 200 دوللارعا ساتىپ الۋ دەگەن ءسوز. سويتسەك ءبىز رەسەيگە اۋىز اشىپ وتىرعان نانسوعار ەكەنبىز. بىلسەڭىز گازدىڭ باعاسى مەدۆەدەۆتىڭ قولىنداعى دۇنيە ەمەس. كەرەك دەسەڭىز، ءبىزدىڭ دە رەسەيدەن ەسەلەپ الاتىن قۇنىمىز بار. قىسقا ءارى نۇسقا ايتامىن: بىزگە جەڭىلدەتىلگەن باعا كەرەك ەمەس. بىزگە باۋىرلاس رەسەيدىڭ باسشىلىعى ءوز مىندەتتەرىن ورىنداسا بولعانى. ءبىز وداقتى قۇرعاندا ءبىزدىڭ ازاماتتارىمىزعا، كاسىپكەرلەرىمىزگە، كاسىپورىندارىمىزعا بىردەي جاعداي جاسالادى دەپ كەلىسكەنبىز. وسى تالاپ ورىندالسا بولعانى ەدى. ال ەگەر دانىشپانداردىڭ ءبىرى ءبىزدى گاز باعاسىمەن قورقىتپاق بولسا، قاتتى قاتەلەسەدى", - دەدى الەكساندر لۋكاشەنكو.

بۇل جيىلىسقا قازاقستان دەلەگاتسياسىن ۇكىمەت باسشىسى باقىتجان ءابدىرۇلى باستاپ بارعان ەدى.

«ەاەو كاسىپكەرلەرى ىقپالداسۋدان، ورتاق نارىقتاردى قۇرۋدان ەلەۋلى، جاقسى ناتيجە كۇتەدى. سول سەبەپتى دە ءبىز «ويىننىڭ ورتاق ەرەجەلەرى» دەپ اتالاتىن بىرىڭعاي رەتتەۋدى جۇزەگە اسىرۋعا ءوزىمىز كەلىسكەن سالالاردا بيزنەسكە قاجەتتى ساپالى، ءتيىمدى ءارى اۋىرتپالىق تۇسىرمەيتىن رەتتەۋ تاجىريبەسىنە قول جەتكىزۋىمىز قاجەت»، - دەدى قر پرەمەر-ءمينيسترى ب. ساعىنتاەۆ. باقىتجان ءابدىرۇلىنىڭ بۇل ايتقانى ساياسي تۇرعىدان اربانى دا سىندىرماي، وگىزدى دە ولتىرمەۋدىڭ جولى بولعانىمەن، استارىنا ۇڭىلسەك، الەكساندر لۋكاشەنكونىڭ ءسوزىن دەموكراتيالىق جولمەن جەتكىزگەنمەن بىردەي بولدى. تاراپتار ەندى ماۋسىمنىڭ 8-9 كۇندەرى استانادا وتەتىن شىۇ سامميتىندە كەزدەسەدى.

نۇرگەلدى ابدىعانيۇلى

Abai.kz