زاڭ جوباسى رەفەرەندۋمسىز - پارلامەنت ارقىلى قابىلداناتىنىن نازارباەۆ 1 ناۋرىزدا استانادا بيلىك قۇزىرەتىن ءبولۋ جينالىسىندا مالىمدەگەن ەدى. ونىڭ پىكىرىنشە، زاڭ جوباسى بيلىك جۇيەسىنە "بولماشى وزگەرىستەر" ەنگىزەدى، سول سەبەپتى رەفەرەندۋم ۇيىمداستىرۋدىڭ قاجەتى جوق.

كونستيتۋتسيالىق رەفورما جونىندەگى جۇمىس توبىنىڭ باسشىسى ادىلبەك جاقسىبەكوۆتىڭ ايتۋىنشا، زاڭعا ۇكىمەتتىڭ پرەزيدەنتكە ەمەس، جاڭادان سايلانعان پارلامەنت ماجىلىسىنە بيلىگىن تاپسىرۋى تۋرالى وزگەرتۋ ەنگىزىلەدى. مەملەكەت باسشىسى ۇكىمەت پەن پرەمەر-ءمينيستردىڭ اكتىلەرىنىڭ كۇشىن جويا المايدى. "ول اكتىلەردىڭ جاۋاپكەرشىلىگىن ۇكىمەت ءوزى ارقالايدى", - دەدى جاقسىبەكوۆ.

رەسپۋبليكا پرەزيدەنتى "ازاماتتاردىڭ ەركىندىگى مەن قۇقىقتارىن قورعاۋعا، ۇلتتىق قاۋىپسىزدىكتى قامتاماسىز ەتۋگە، مەملەكەتتىڭ تۇتاستىعى مەن ەگەمەندىگىن ساقتاۋعا مۇددەلى".

كونستيتۋتسيالىق باقىلاۋدى كۇشەيتۋ ماقساتىندا، زاڭ جوباسىندا كونستيتۋتسيالىق كەڭەس شەشىمىنە پرەزيدەنتتىڭ قارسى شىعۋىنا جول بەرمەيتىن مەحانيزم ەنگىزىلەدى، دەدى جاقسىبەكوۆ.

اباي-اقپارات