بۇگىن باستالعان ەكسپو-2017 كورمەسىنىڭ جينىنىنا كەلگەن يتاليا دەلەگاتسياسىنىڭ وكىلى، ەكسپو كوميسسارى ستەفانو راۆانيان پاۆيلونداردىڭ ساپاسى ءام كوركى تالاپقا ساي ەمەس ەكەندىگىن ايتتى. كوميسسار راۆانياننىڭ بۇل ايتقاندارى قازاقستاندىق باق-قا دەرەۋ تارالىپ، ونسىز دا وڭىپ تۇرماعان ەسىموۆ كومانداسىنا قاراتا سىني ماقالالار جاريالاندى.

وسىدان ەكى كۇن بۇرىن يتاليا دەلەگاتسياسى استاناعا كەلىپ، وزدەرى وتىراتىن پاۆيلوندى ارالاپتى. سويتسە، الگى عيماراتتىڭ ديزاينى مۇلدە كوڭىلدەرىنەن شىقپاعان ەكەن. «ەكى كۇن بۇرىن ءبىز عيماراتتىڭ تۇرىنە تاڭ قالدىق. مۇنداعىلارعا ءوز سىزبامىزدى بەردىك. ول قايدا؟ ەكىنشى قاباتتا وفيس بولسىن دەدىك. وفيس تۇگىلى ەكىنشى قابات جوق قوي...»، - دەپتى كوميسسار مىرزا (https://www.nur.kz/1417513-predstaviteley-italii-karibskikh-os.html).

بۇل اقپارات بۇگىن عانا باق-قا تارادى. ارادا 3 ساعاتقا جۋىق ۋاقىت ءوتتى. كەلە سالا ەسىموۆتىڭ ەسىن شىعارعان كوميسسار ءوزىنىڭ ءسوزىن ءوزى تەرىسكە شىعارىپ، ەكسپو كومپانياسىنىڭ جۇمىسى ءمىنسىز ەكەنىن ايتىپتى.  «مۇنداي القالى جيىنداردا تىعىز قارىم-قاتىناس بولعانى دۇرىس. ءبىز دە ءوز كەزەگىمىزدە ۇيىمداستىرۋشىلارمەن ەتەنە ارالاسقاندى ءجون كوردىك. ال عيماراتتىڭ تۇرىنە، ونىڭ قۇرىلىسىنا كەلەر بولساق – ول ماڭىزدى ەمەس. مۇنداي اۋقىمدى شارانى وزكىزۋ سىندى جۇمىستاردىڭ قاسىندا عيماراتتىڭ قانشا قاباتتان تۇراتىنىن تالقىلاۋ ءجون ەمەس»، - دەپتى ستەفانو راۆانيان (https://tengrinews.kz/kazakhstan_news/italyanskiy-komissar-prokommentiroval-kritiku-oformleniya-312792/).

سوندا قالاي بولعانى؟ ءبىز تۇسىنبەدىك پە، الدە اراداعى 3 ساعاتتا يتاليا دەلەگاتسياسىنىڭ ويى وزگەرىپ ۇلگەردى مە؟ ەكسپو كوميسسارى نەگە ەكى سويلەدى؟

نۇرگەلدى ابدىعانيۇلى

Abai.kz