الماتى قالاسىنىڭ العاشقى سەرىك قالاسى (Gate City) قۇرىلىسى 2030 جىلعا دەيىن اياقتالادى. قالا ءتورت بولىكتەن تۇرادى.

«الماتى وبلىستىق ءماسليحاتىنىڭ شەشىمىمەن جوبانىڭ تەحنيكالىق-ەكونوميكالىق نەگىزى دايىندالدى. قۇجاتقا ساي، Gate City قۇرىلىسى 2030 جىلعا دەيىن اياقتالادى»، – دەپ مالىمدەدى بۇگىن ينۆەستيتسيالار جانە دامۋ ءمينيسترىنىڭ ورىنباسارى رومان سكليار.

Gate City قۇرىلىسىندا جولاۋشىلار جانە جۇك اينالىمىنىڭ ىشكى جانە سىرتقى رەتتەۋلەرى بويىنشا ترانسپورتتىق قىزمەت، يندۋستريالدى ايماقتار مەن كلاستەرلەر كەشەن، تۇرعىن ءۇي-ازاماتتىق كەشەندەرى مەن اكىمشىلىك-ىسكەرلىك جانە قوعامدىق نىساندار قامتىلماق.

«قازىرگى تاڭدا الماتىنىڭ سەرىك قالاسى Gate City-گە ينجەنەرلى-كوممۋنيكاتسيالىق ينفراقۇرىلىم تارتىلعان. سونىڭ ىشىندە سۋ، گاز جانە ەلەكترمەن قامتاماسىز ەتىلىپ تۇر. ەندى جول مەن ينجەنەرلىك جەلىلەر تارتۋ كەرەك. سونىمەن قاتار قۋاتتىلىعى 200 گكال/ساعات بولاتىن قازاندىق قۇرىلىسى اياقتالىپ قالدى»، — دەدى رومان سكليار.

قۇجاتقا ساي، 2030 جىلعا دەيىن قالا قۇرىلىسىنا 650 ملرد تەڭگە بولىنەدى. سونىڭ ىشىندە بيۋدجەت قارجىسى 206 ملرد بولسا، جەكە قارجى 444 ملرد تەڭگە.

مينيستر ورىنباسارىنىڭ مالىمەتىنشە، 2008-2015 جىلدار ارالىعىندا 31,4 ملرد تەڭگە بولىنگەن. ال 2016 جىلى جوباعا قارجى بولىنبەگەن.

2030 جىلدان كەيىن وسىلايشا الماتى جانىنان Golden City, Growing City جانە Green City قالالارى بوي كوتەرمەك.

الماتى جانىنان ءتورت سەرىك قالا سالۋ تۋرالى شەشىم 2006 جىلى قابىلدانعان ەدى. 2007 جىلعى پرەزيدەنتتىڭ شەشىمىمەن 2008 جىلى G4 City جوباسى باستالعان. بۇل قالالار الماتى-قاپشاعاي تاس جولى بويىندا سالىنباق.