قازاقستاندىق دەموكراتيا – وتە قىزىق قۇبىلىس. بۇگىن عانا كونستيتۋتسياعا وزگەرىس ەنگىزەتىن توپتىڭ رەسمي مالىمدەمەسى جاريالاندى. تۇسىنگەنىم (تەرميندەر مەن زاڭنىڭ باپتارىنا تولى مالىمدەمەنى زاڭگەرلەرگە ارنالعان ەڭبەك دەۋگە بولادى) – 26 باپتى وزگەرتۋگە كەلىسپەيتىندىكتەرىن ايتقان جاندارعا «سەندەر دۇرىس تۇسىنبەپسىڭدەر، اڭگىمە مىنادا» دەگەن ءتۇسىندىرۋ عانا ايتىلعان.

مەنىڭ ويىمشا، جۇمىسشى توبىنىڭ مىندەتى - حالىقتىڭ سان ءتۇرلى پىكىرىن تىڭداۋ، قاپەرگە الۋ، ەگەر ءبىر ماسەلەگە ەكى ءتۇرلى كوزقاراس ورىن السا – ول ماسەلەنى حالىقتىڭ تالقىسىنا سالۋ، ت.ت. ال بيلىكتىڭ وي-پيعىلىن ءتۇسىندىرۋ جۇمىستارى، قۇدايعا شۇكىر، كونستيتۋتسياعا وزگەرىس ەنگىزەمىز دەگەننەن باستاپ توقتاۋسىز ءجۇرىپ جاتىر. پىكىرلەرىن ايتامىن دەگەن جاندارعا ەسىك اشىق. بىراق وزدەرىنىڭ ويلارىمەن ۇيلەسپەيتىن پىكىر يەلەرىنە رەسمي مالىمدەمە جاساۋ جانە بيلىكتىڭ باستاماسىنىڭ دۇرىس ەكەنىن دالەلدەۋ – اقىلعا سيمايتىن ماسەلە.  ونداي بولارىن بىلگەندە – پىكىر ايتىپ نە جىنىمىز بار. كەڭەس وكىمەتىنىڭ كەزىندە ء«بارىمىز بولىپ كەڭەستىك، سوسىن ...پارتكوم شەشىم شىعاردى» دەتىن ساياسي استارلى ءاجۋا بار بولاتىن. بۇل ءزىلدى مىسقىلعا تۇسىنبەيتىن جاندار; «اقىرى شەشىمدى پارتكوم شىعاراتىن بولسا، حالىقپەن كەڭەسۋدىڭ قانداي قاجەتى بار» دەپ تاڭ قالاتىن. حالىقپەن كەڭەسۋ – دەموكراتيانىڭ بەلگىسى، ال شەشىمدى پارتكومنىڭ قابىلداۋى – ءتوتاليتاريزمنىڭ جازىلماعان زاڭى بولاتىن.

ۇلىبريتانيانىڭ ەۋرووداقتان شىعۋى – مەملەكەتتىڭ رەسمي ورىندارى ءۇشىن كۇتپەگەن شەشىم بولاتىن، سول سياقتى، اقش-تىڭ پرەزيدەنتتىك جارىسىندا اپەرباقانداۋ ترامپتىڭ جەڭىسكە جەتۋىن دە ەشقانداي ساياساتتانۋشى بولجاپ-بىلگەن جوق. بۇل – حالىقتىڭ شەشىمى. ونىڭ دۇرىستىعى مەن بۇرىستىعىن كەلەشەك كورسەتەدى. سودان ساباق العان حالىق، كەلەسى جولدارى تاڭداۋ جاساۋعا اسقان جاۋاپتىلىقپەن كەلەدى. ال بۇگىن بۇل - اعىلشىن حالقىنىڭ نە امەريكا حالقىنىڭ تاڭداۋى! اقش-تىڭ رەسمي ورىندارى «ترامپتى تاڭداۋلارىڭ ۇلكەن قاتەلىك; ونىڭ مىناداي كەمشىلىكتەرى بار» دەگەن مالىمدەمە جاساعان جوق.  سوندىقتان، قۇرمەتتى كوميسسيا مۇشەلەرى، قاراق ويناماڭدار. 

دوس كوشىم

Abai.kz