سىبايلاس جەمقورلىققا قارسى ءىس-قيمىل ۇلتتىق بيۋروسى وكىلدەرى "بايتەرەك ۇبح" باسقارما توراعاسى قۋاندىق بيشىمباەۆتىڭ قىزىلوردا قالاسىنداعى شىنى زاۋىتىنىڭ قۇرىلىسىنا بولىنگەن 1 ميلليارد تەڭگە قاراجاتتى جىمقىرعانىن مالىمدەدى، - دەپ حابارلايدى Tengrinews.kzء تىلشىسى. 

"بايتەرەك ۇبح" باسقارما توراعاسى قۋاندىق بيشىمباەۆ قىزىلوردا قالاسىندا تاباق شىنى ءوندىرۋ جانە قايتا وڭدەۋ زاۋىتىنىڭ قۇرىلىسىندا "Orda Glass" جشس جانە ونىڭ مەردىگەر ۇيىمى "شىمكەنتحيممونتاج" جشس ارقىلى 1 ميلليارد تەڭگە جىمقىرۋ بويىنشا قىلمىستىق جوسپار قۇرعان. قىلمىستىق جوسپارعا وسى اتالعان ۇيىمداردىڭ جەتەكشىلەرى د.يبراشەۆ ، ج.يسابەك جانە م.كوجاباەۆ تارتىلعان", - دەلىنگەن حابارلامادا.

جىمقىرىلعان قاراجات، ۇلتتىق بيۋروداعىلاردىڭ ايتۋىنشا، "زاۆود سترويتەلنىح مەتاللوكونسترۋكتسي" جشس ۇلەستەس كومپانياسى ارقىلى تاماقتانۋعا جانە جۇمىسشىلاردىڭ جاتىن ورنىنا دەپ قولما-قول اقشاعا اينالدىرىلعان.

وسى كورسەتىلگەن سومادان قۋاندىق بيشىمباەۆ جەكە ءوزى 2 ميلليون اقش دوللارىن سىيبايلاسى - ءىنىسى س.نۇرلىبەكتەن العان دەلىنەدى.

ايتا كەتەيىك، بيشىمباەۆتىڭ ۇستالعانى جايلى 2017 جىلدىڭ 10 قاڭتارىندا بەلگىلى بولعان ەدى. "بيشىمباەۆ توپ بولىپ، الدىن الا كەلىسىم جاساۋ ارقىلى اسا ءىرى كولەمدە بىرنەشە رەت پارا الىپ وتىرعان. زاڭسىز العان قاراجاتتى بيشىمباەۆ ءوز قاجەتىنە جاراتقان", - دەپ حابارلاعان ەدى انتيكوررۋپتسيا قىزمەتىنىڭ وكىلدەرى.

اباي اقپارات