بايان ەسەنتاەۆا اقبوتا سەيىتماعانبەتتىڭ شىن مانىندە توپتان نە سەبەپتى كەتكەنى تۋرالى ايتىپ بەردى.

بۇل تۋرالى 31 ارنانىڭ “ايتا بەرسىن” باعدارلاماسىندا ايتىلدى.

پروديۋسەردى ابىگەرگە تۇسىرگەن قىز اقبوتا سەيىتماعانبەت بولاتىن. 20 جاستاعى ارۋ كۇيەۋگە شىعاتىنىن ايتپاعاندا توپ قۇرامى وزگەرمەيتىن بە ەدى؟ الايدا بايان حانىم ونىڭ توپتان كەتكەنىنە ەمەس، ءانشىنىڭ ومىرىندەگى وزگەرىستەر تۋرالى ەڭ سوڭىندا ەستىگەنىنە وكپەلى.

“بوتانىڭ بالا كۇتىپ جۇرگەنى تۋرالى مەن سوڭعى ەستىدىم. ءبىر شەتىنەن ول ۋاقىتتا مۇنداي حاباردى ەستۋگە دايىن ەمەس ەدىم. تۋىسقاندارىم مەن ءبىزدىڭ ديرەكتور مەنى، مەنىڭ جۇيكەمدى قورعاۋعا تىرىستى. سول سەبەپتى مەن ءبارىن كەش ەستىدىم. ارينە، شەشىمدى جىلدام قابىلداۋىمىز كەرەك بولدى. سەبەبى توپتىڭ جۇمىس كەستەسى وتە تىعىز ەدى. بىراق مەن بۇل جاڭالىقتى سابىرمەن قابىلدادىم. مەن اقبوتامەن جانە ونىڭ جىگىتىمەن ءبىر رەت جولىقتىم. بۇدان كەيىن ول ماعان حابارلاسپادى، جازبادى، ءوزى تۋرالى ەشنارسە ەستىرتپەدى. ال مەن ايتىپ وتىرعان كەزدەسۋدە ونىڭ قانشا سوما قارىز ەكەندىگى، ونى قالاي قايتاراتىندىعى تۋرالى ايتىلدى. جاس ءارى تاجىريبەسى جوق بولعاندىقتان، مەنىمەن اشىق سويلەسپەدى دەپ ويلايمىن”، – دەيدى بايان ەسەنتاەۆا.

ءبىر قىزىعى، سوڭعى كەزدەسۋدەن كەيىن اقبوتا مەن ونىڭ سۇيىكتىسى بايان حانىمنىڭ الدىنا بىردە ءبىر رەت كەلمەپتى. ءتىپتى شاكىرتى ۇستازىنان كەشىرىم سۇراماعان. الايدا قىز قازىر جالعىز. ونىڭ ءالى دە تۇرمىس قۇرماعانى بەلگىلى. اياعى اۋىر ءانشى جۇمىسسىز وتىر. سۇيىكتىسى بولسا، ءانشىنىڭ قولىنا ساقينا سالۋعا اسىعار ەمەس. اقبوتانىڭ جاقىن دوستارى ءانشىنىڭ قيىن جاعدايعا تاپ بولعانىن ايتىپ ءجۇر. بىراق ءانشى ءوزىنىڭ قازىرگى جاعدايىن بارىنشا جاسىرعىسى كەلەتىن سياقتى. ويتكەنى، الەۋمەتتىك جەلىدەگى جەكە پاراقشاسىنا “باقىتتىمىن” دەپ ءجيى جازىپ ءجۇر.

“شىنىمدى ايتسام، وسى ۋاقىتقا دەيىن ەسىمدى جيا الماي ءجۇردىم. بىرەۋدى ويلايتىنداي حالدە بولمادىم. وعان حابارلاساتىن شىعارمىن. قازىر ونىڭ جاعدايى تۋرالى سۇراستىرىپ جاتىرمىن. بىراق مەن تەرەزا انا نەمەسە قايىرىمدىلىق قورى ەمەسپىن. 19 جاستاعى قىزدىڭ كەلىسىم-شارتقا قول قويىپ وتىرىپ، ءوزى تۋرالى ويلاماعانى ءۇشىن مەن كىنالى ەمەسپىن. بۇل – مەنىڭ ەمەس، ونىڭ تاعدىرى”، – دەيدى پروديۋسەر.

نۇرسۇلۋ نايمانوۆا

Abai.kz