تۇركيانىڭ يزمير قالاسىندا 2017 جىلدىڭ 1-5 ناۋرىزى ارالىعىندا MODEKO-2017 حالىقارالىق جيھاز كورمەسى وتەدى. بيىل 28-رەت وتكىزىلگەلى وتىرعان شارانىڭ باستى دەمەۋشىلەرى: تۇركيا رەسپۋبليكاسى ەكونوميكا مينيسترلىگى، يزمير اكىمدىگى، ەگە ايماقتىق كاسىپكەرلەر پالاتاسى، يزمير ساۋدا پالاتاسى ت.ب.

كورمە بارىسىندا الەمنىڭ 32 ەلىنەن كەلەتىن 1200-گە جۋىق قاتىسۋشى 5 كۇن بويى الەمدىك ستاندارتقا سايكەس جيھاز شىعاراتىن يزميرلىك كاسىپورىندارمەن تىكەلەي بايلانىس ورناتۋعا مۇمكىندىك الادى.

حالىقارالىق نارىقتا تۇرىكتەردىڭ جيھازى ساپاسى جاعىنان ۇلكەن سۇرانىسقا يە. MODEKO-2017 كورمەسىندە كلاسسيكالىق، اۆانگارد، مودەرن جانە مودۋلدىق ستيلدەگى جيھازدىڭ قوناقۇي، ءاسۇي، بالالار مەن جاسوسپىرىمدەر بولمەسى، جاتىن بولمەگە ارنالعان تۇرلەرى ۇسىنىلادى. جۇمساق جيھازبەن قاتار ورىندىق، ۇستەل، شكافتىڭ دا ءتۇر-ءتۇرى ساتىپ الۋشىلاردىڭ كوڭىلىنەن شىعارى انىق.

CSIL زەرتتەۋ كومپانياسىنىڭ دەرەكتەرىنە سۇيەنسەك، تۇركيا جيھاز ەكسپورتى جاعىنان الەمدىك نارىقتىڭ 2 پايىزىن يەمدەنەدى. 2003-2011 جىلدار ارالىعىندا تۇركيانىڭ جيھاز ونەركاسىبى 292 پايىزعا وسكەن. تۇركيانىڭ جيھاز اسسوتسياتسياسى تۇرىك جيھازشىلارى الداعى 2-3 جىلدا الەمنىڭ ۇزدىك وندىعىنا ەنۋدى كوزدەپ وتىر. بۇگىندە تۇرىك ءونىمى يراك، گەرمانيا، يران، ءازىربايجان، فرانتسيا، تۇركىمەنستان، نيدەرلاندتار، رەسەي، ساۋد اراۆياسى مەن يتالياعا ەكسپورتتالادى. ال بىلتىر MODEKO-2016 جيھاز كورمەسىنە شۆەتسيا، گوللانديا، گرۋزيا، كاتار، ومان، يزرايل ت.ب. جالپى سانى 32 مەملەكەتتەن ساتىپ الۋشى قاتىسقان.

يزمير – كولەمى جاعىنان العاندا، تۇركيانىڭ العاشقى ۇشتىگىنە ەنەتىن قالا. ستامبۇلدان كەيىنگى اسا ماڭىزدى پورت تا يزميردە ورنالاسقان. 8500 جىلدىق تاريحى بار اسەم قالانىڭ تۋريزم سالاسى دا كۇشتى دامىعان. تابيعاتى تاماشا يزميردە تاريحي مۇراعا ارنالعان مەكەندەر كوپ. شيپالى تەرمالدى سۋ، ىستىق بۇلاقتار، جاعاجايلار، وزىندىك اسحاناسىمەن ەرەكشەلەنەتىن قالادا حالىقارالىق دەڭگەيدەگى كورمە، فەستيۆال، جارمەڭكەلەر ءجيى وتكىزىلەدى.

Abai.kz