سوڭعى كۇندەرى جوعارى بيلىكتە بولىپ جاتقان وزگەرىستەر مەن تۇتقىنداۋلاردىڭ سوڭى نەمەن تىناتىنى ازىرگە بەلگىسىز. ساراپشىلار ءارتۇرلى بولجامدار ايتىپ جاتىر. جەلى قولدانۋشىلارى دا ءتۇرلى پىكىر ايتىپ، ءارتاراپتا ارقالاي اڭگىمە قىزىپ تۇر. وسىنداي مازاسىز شاقتا پرەزيدەنت ن.نازارباەۆتىڭ جيەنى، داريعا نازارباەۆا مەن راحات اليەۆتىڭ كىشى ۇلى – ايسۇلتان نازارباەۆ ءوزىنىڭ facebook-تەگى پاراقشاسىندا توسىنداۋ ويىن جاريا ەتتى. وندا ايسۇلتان راحاتۇلى اقش پەن ەۋروپاداعى جاعدايدى ايتا كەلىپ، قازاقستاننىڭ حالىنە توقتاپ، بىرەر اپتانىڭ جۇزىندەگى اۋىس-ءتۇيىستى، باسقا دا جايتتاردى ءسوز ەتە كەلىپ ءبۇي دەيدى. 

ء"بارىمىز كۋا بولىپ وتىرعانداي، كارىم ءماسىموۆ مىرزا پرەزيدەنتتىڭ اينالاسىن جەمقورلاردان تازالاپ جاتىر. «حالىق جاۋى» دەگەن ەسكى ءسوز قازىر ەش جەردە قولدانىلمايدى. دەسەدە، بۇل ءسوز - جوعارعى بيلىك ەشولانىنا كىرىپ العان شەنەۋنىكتەردى سيپاتتاۋعا تاپتىرماس ءسوز. ويتكەنى، ولار ءبىر-بىرىنە ەمەس، حالىققا كەسىرىن تيگىزىپ وتىر. اتامدى بىلەتىندىكتەن، ءماسىموۆ بۇل قيىن جۇمىستى پرەزيدەنتتىڭ اينالاسى تولىقتاي تازارعانشا جۇرگىزەتىنىن ناقتى ايتا الامىن» دەي كەلىپ، ايسۇلتان نازارباەۆ بىرنەشە ادامنىڭ اتى-ءجونىن اتاپ، ولار جايلى ويىن ورتاعا سالادى.

«ماعان ۇلتتىق بانك توراعاسى اقىشەۆ پەن پرەزيدەنت اپپاراتىنىڭ جەتەكشىسى جاقسىبەكوۆ ورىنتاقتارىن ساقتاپ قالا ما، جوق پا سول جاعى قىزىق. سەبەبى، ولاردىڭ قولاستىندا جۇمىس ىستەگەن ادامدار جەمقورلىق جاسادى، مەملەكەتكە قارسى جۇمىس ىستەدى دەگەن كۇدىكپەن قامالىپ جاتىر. اتى اتالعان مىرزالاردى جاقسى بىلەم، ءارى ولاردىڭ سىرتىنان، قۇپيا تۇردە بىرەۋ ماڭىزدى ىستەر اتقارۋعا باتىلى بارىپتى دەگەنگە ەشقاشان سەنبەيمىن.

وتەمۇراتوۆ پەن تاسماعامبەتوۆ مىرزالاردىڭ ارام ىستەرمەن قاتىسى بار ما، جوق پا ونى تەكسەرىس كورسەتەدى.  بىراق، كوشەدەگى كەز كەلگەن ادامنان سۇراساڭىز، بۇل ادامدار حالىقتى توناعانىن ايتىپ بەرەدى. قۇدايعا شۇكىر، مۇنداي فاميليالار كوپ ەمەس. ولار تۋدىرىپ وتىرعان نەگاتيۆ ەلدى قارا بۇل سياقتى بۇركەپ قالدى. قالاي بولعاندا دا، اعاشكالاردىڭ زامانى اياقتالىپ كەلە جاتقان سياقتى. قازاقستان كوز الدىمىزدا وزگەرىپ جاتىر. ۇقك-نىڭ جاڭا توراعاسىنىڭ قوردالانعان ماسەلەلەردى رەتتەۋگە ۋاقىتى دا، مۇمكىندىگى دە جەتەدى دەپ ويلايمىن. ونىڭ ءرولى ءدال قازىر ەل ءۇشىن وتە-موتە ماڭىزدى».

پرەزيدەنتتىڭ ەڭ سەنىمدى سەرىكتەرىنىڭ ءبىرى، مەملەكەتتىك تۇلعا يمانعالي نۇرعاليۇلىنىڭ اتىنا قاتىستى دا اششى، اۋىر ءسوز ايتقان ايسۇلتان نازارباەۆ جازباسىنىڭ نەگىزگى مازمۇنى – وسى.

جالپى، جازبا اۆتوردىڭ ءوز ويى. ءىرى لاۋازىمدى ادامداردىڭ اتتارى اتالىپ، ولار جايلى جايسىزداۋ دۇنيەلەر ايتىلعان. بىراق، ناقتى دالەل كەلتىرمەگەن. سوعان قاراعاندا، بۇل ساراپشىلار ءجيى ايتا باستاعان كلانارالىق قاقتىعىستىڭ ۇشقىنى بولۋى مۇمكىن. نە دەسەك تە جوعارى بيلىكتىڭ ىشىندە ءجۇرىپ جاتقان مىلتىقسىز مايداننىڭ قىر-سىرى سول جاققا وتە جاقىن ايسۇلتان نازارباەۆقا بىزدەن گورى انىعىراق كورىنەتىنى راس.

تاعى ءبىر ايتا كەتەتىن نارسە ول – پرەزيدەنت ن.نازارباەۆ اۋلەتىنىڭ ءۇشىنشى بۋىنى بيلىكتىڭ ىشكى ماسەلەسى، ەل جاعدايىنا بايلانىستى ىستەرگە ارالاسىپ كورىنە باستادى. بارشا جۇرتقا ءمالىم، پرەزيدەنت اۋلەتىنىڭ مۇشەلەرى – قىزدارى، كۇيەۋ بالالارى، جيەندەرى ءىرى كاسىپكەرلەر سانالادى. ۇلكەن قىزى – داريعا نازارباەۆا سەنات دەپۋتاتى. ال، ايسۇلتاننىڭ اكەسى – راحات اليەۆ قىلمىس جاساپ، ەلدەن قاشىپ، اقىرى تۇرمەدە جان تاپسىرعان ەدى. جالپى، ەل ىشىندە بۇل اۋلەت تۋرالى ءارتۇرلى الىپ-قاشپا اڭگىمەلەر كوپ-اق. الايدا، ونىڭ ەشبىرى راستالعان ەمەس.

ن.نازارباەۆ - قازاقستاننىڭ تۇڭعىش پرەزيدەنتى. ەلدى 27 جىل بويى باسقارىپ كەلەدى. ايسۇلتان بولسا، پرەزيدەنتتىڭ تۋعان جيەنى.

نۇرا ماتاي

Abai.kz