وسىدان بىرەر جىل بۇرىن قوعامنىڭ نارازالىعىنا ۇشىراپ، پارلامەنت قابىرعاسىندا تالقىلانعان «كەلىن» فيلمىندە باستى ءرولدى سومداعان ءارتىس گۇلشارات جۇباەۆانىڭ اششى داۋسى ەندى شىعىپ جاتىر.

ول «ۇيات ەمەس» باعدارلاماسىندا بەرگەن سۇحباتىندا «كەلىن» ءفيلمى جايلى وكپە-نازىن ءبىلدىرىپ، اعىنان جارىلعان. سويتسەك، اكتريسانىڭ كۇنى بۇگىنگە دەيىن وتىرىك-شىنى ارالاس سۇحبات بەرىپ كەلگەن  ءفيلمنىڭ رەجيسسەرى ەرمەك تۇرسىنوۆقا وكپەسى قارا قازانداي ەكەن.

ءيا «كەلىن» ءفيلمى كورسەتىلىمگە  شىعا سالا ۇياتسىز كادرلار ءۇشىن سىنعا ۇشىراپ ەدى. ءالى كۇنگە دەيىن باسىنان داۋ ارىلماي كەلەدى.

ەندى مىنە، گۇلشارات تاعى ءبىر داۋدىڭ شەتىن شىعاردى.

«اشىق-شاشىق كادرعا تۇسپەيمىن دەپ كەسىپ ايتتىم، سول ارادان توقتاماق تا بولدىم. بىراق سول كەزدەگى «قازاقفيلمنىڭ» باسشىلارى مەنى سول ءۇشىن ورتاعا الىپ، سىنادى. «ويلان، ويتكەنى بۇل مەملەكەتتىك قارجىعا ءتۇسىرىلىپ جاتىر، قانداي دا ءبىر اۋەسقوي فيلم دەپ ويلاما، مەن دارداي ستسەناريستپىن، مەن دارداي رەجيسسەرمىن سەنىڭ الدىڭدا ويناپ ءجۇر ەكەنبىز عوي» دەپ بەتىمنەن الدى. ۇياتتى كادرلاردىڭ وزىندە پەردە تۇرادى دەپ سەندىرگەن ەدى... الايدا،  ءوزىمدى ەكراننان كورگەن كەزدە مەنى الداعانىن ءتۇسىندىم»، - دەگەن گۇلشارات.

«مەنى ءبارى اقشا ءۇشىن ىستەگەن دەيدى. ءيا، مەن اقشا ءۇشىن ىستەدىم. بۇل كۇنى كىم اقشا ءۇشىن جۇرگەن جوق؟  ونى قويشى ەرمەك تۇرسىنوۆ سۇحباتتارىندا مەنى اتىراۋدا تويدا كورىپ، بيلەپ جۇرگەن جەرىمنەن تاۋىپ الىپ، كينوعا ىشكىزىپ ءتۇسىردىم دەپ داۋرىعىپ ءجۇر، بۇل تازا وتىرىك! مەنى كينوعا بەكىتكەن، ءتىپتى ول ەمەس.  وعان دەيىن باسقا رەجيسسەر بولاتىن. بۇكىل اكتەرلىك قۇرام بولەك بولاتىن. بۇل ءفيلمدى ءتۇسىرۋدى باستاعاندا، باستاپقىدا مۇنداي اشىق تۇسىرىلىمدەر بولعان دا جوق. بىراق ءفيلمنىڭ العاشقى نۇسقاسىن كورگەننەن كەيىن كوركەمدىك جەتەكشىلەر قۇپتامادى. ەرمەك تۇرسىنوۆتىڭ وتىرىگىن شىعارعىم كەلگەن. ءتىپتى، ءبىراز ادامدارعا بارىپ، جۇگىرىپ تە كوردىم. سۇحباتىندا ايتقان سوزدەرىن قايتارىپ الىپ، مەنەن كەشىرىم سۇراسا، "ول ءۇشىن نە ىستەۋىم كەرەك؟" دەپ ويلانعان كەزدەرىم دە بولدى. بىراق مەنى كەزىندە ۇگىتتەگەن ادامداردىڭ ىشىنەن «وسىلاي ساعان جالا جابىلىپ جاتىر ەكەن عوي، سەنى ماس قىلىپ ءتۇسىردىم دەپ جاتىر ەكەن عوي. ول وتىرىك ءسوز، مەن قاسىندا بولدىم عوي» دەپ ايتاتىن ەشكىم تابىلعان جوق»، - دەپ رەنىشىن بىلدىرگەن گۇلشارات حانىم ءالى كۇنگە دەيىن ءوزىنىڭ اقتىعىن دالەلدەي الماي ءجۇر ەكەن. 

نۇرسۇلۋ نايمانوۆا

Abai.kz