كۇنى كەشە عانا "Abai.kz" اقپاراتتىق پورتالىندا  االى تۋتكىچەۆ پەن ازامات بولعونباەۆتىڭ ايتىسى جاريالاندى (قىرعىز اقىندارى). ءسوز دوداسى ۇستىندە قىزدى-قىزدىمەن ەكى اقىن قازاق  حالقى تۋرالى قاتتى-قاتتى سوزدەر ايتىپ قالعان. بۇل، ارينە، قازاق حالقىنىڭ رەنىشىن تۋدىردى.

ايتىس ساحناسىندا ارقالانىپ الىپ اۋىزدارىنا تۇسكەن ءسوزدى ايتقان ەكەۋدىڭ بۇل «اقىندىعى» قازاق-قىرعىز قارىم-قاتىناسىنا سىزات ءتۇسىرىپ، ۇلتارالىق رەنىش، وكپە تۋدىرۋى مۇمكىن بولعان سوڭ ءبىز قىرعىزستاننىڭ قازاقستانداعى توتەنشە جانە وكىلەتتى ەلشىلىگىنە حابارلاستىق.

(قازاق حالقىن تىلدەگەن ەكى اقىن)

بىزگە قىرعىز رەسپۋبليكاسىنىڭ قازاقستانداعى ەلشىلىگىنىڭ ءبىرىنشى حاتشىسى شولپاناي ابدىساماتقىزى ادجيماتوۆا جاۋاپ بەردى. اۋەلى شولپاناي ابدىساماتقىزى "Abai.kz" اقپاراتتىق پورتالىندا جاريالانعان "قىرعىز اقىندارى قازاقتى قىرىنا الدى. نەگە؟" اتتى ماقالامەن تانىسىپ شىعىپ، ارتىنشا پورتالىمىز ارقىلى قىرعىزستاندىق ەكى اقىننىڭ داۋ شاقىرعان داڭعازا ارەكەتىنە قاتىستى پىكىر ءبىلدىردى.

(سۋرەت "فەيسبۋك" جەلىسىندەگى Cholpon  Adjimatova اككاۋنتىنان الىندى)

- مەن "Abai.kz" اقپاراتتىق پورتالىندا جاريالانعان ماقالامەن جانە وندا كورسەتىلگەن بەينە جازبامەن تانىسىپ شىقتىم. شىنتۋايتىنا كەلگەندە  قاتتى ۇيالىپ وتىرمىن. باۋىرلاس ەكى ەلدىڭ تىنىشتىعىن بۇزاتىنداي اۋىر سوزدەر ايتىلعان ەكەن. سول ءۇشىن قىرعىز رەسپۋبليكاسى جانە قىرعىز حالقى اتىنان قازاق حالقىنان كەشىرىم سۇرايمىن. وزدەرىڭىز دە ماقالادا ايتقانداي، ەكى اقىننىڭ ءسوزى كۇللى قىرعىز حالقىنىڭ ءسوزى ەمەس، ارينە. مەن جانە ءبىر مارتە قازاق حالقىنان وسى ءبىر ءجايت ءۇشىن كەشىرىم سۇرايمىن, - دەدى قىرعىز ەلشىلىگىنىڭ وكىلى.

سونداي-اق، شولپاناي ابدىساماتقىزىنىڭ ايتۋىنشا االى تۋتكىچەۆ باستاپ، ازامات بولعونباەۆ قوشتاعان قىرعىز اقىندارىنا رەسمي تۇردە قىرعىزستان ۇكىمەتى تاراپىنان شارا قولدانىلاتىن بولدى.

- ءبىز ءبىرىنشى كەزەكتە بۇل ەكى اقىننىڭ ايتىستا ايتقان سوزدەرىن كەلتىرە وتىرىپ، قىرعىز رەسپۋبليكاسىنىڭ مادەنيەت مينيسترلىگىنە جانە سىرتقى ىستەر مينيسترلىگىنە حات جازامىز. ول جاقتان رەسمي جاۋاپ كەلگەندە سىزدەردىڭ پورتالدارىڭىزعا جولداپ، ەكى اقىنعا قاتىستى قانداي شارا قولدانىلاتىنىن ايتاتىن بولامىز. ال ازىرگە مەن ناقتى قانداي شارا قولدانىلاتىنىن بىلمەيمىن. بىراق، قانداي دا ءبىر رەاكتسيا بولاتىنى ءسوزسىز. ايىپقا بۇيىرماڭىزدار، سىزدەردەن تاعى دا كەشىرىم سۇرايمىن", - دەدى ەلشىلىك وكىلى.

وسى رەتتە ايتا كەتەيىك، ءبىز قىرعىز اقىنى ازامات بولعونباەۆقا دا حابارلاسقان ەدىك. ازماتتىڭ تاراپىنان ەش جاۋاپ "بولبودى". ءتىپتى، "ۆاتساپ" جەلىسى ارقىلى سۇراعىمىزدى جولداپ، سۇحباتقا شاقىردىق. بۇل ارەكەتىمىز دە ناتيجەسىز قالدى.

"ەلدەستىرمەك - ەلشىدەن، داۋلاستىرماق - داۋشىدان" دەمەكشى، ءبىز ءوز كەزەگىمىزدە بۇل ەكى اقىننىڭ اۋزىنداعى ءسوزدى كۇللى قىرعىز حالقىنىڭ اۋزىنداعى ءسوز دەۋدەن اۋلاقپىز. الداعى ۋاقىتتا قىرعىز رەسپۋبليكاسىنىڭ قازاقستانداعى توتەنشە جانە وكىلەتتى ەلشىلىگىمەن بايلانىس ورناتا وتىرىپ، اتالعان اقىندارعا قاتىستى قىرعىز بيلىگى تاراپىنان قانداي شارا قولدانىلعانىن ءبىلىپ، حابارلايتىن بولامىز.

نۇرگەلدى ابدىعانيۇلى

Abai.kz