اساد 9 قاڭتاردا سيريالىق SANA اگەنتتىگىندە جاريالانعان، فرانتسۋز جۋرناليستەرىنە بەرگەن سۇحباتىندا كەلىسسوز مەرزىمى بەلگىلەنە سالىسىمەن ءوزى باسقاراتىن ۇكىمەتتىڭ كەلىسسوزگە قاتىساتىن دەلەگاتسياسى دايىن بولاتىنىن ايتتى.

رەسەي، يران جانە تۇركيا بەيبىت كەلىسسوزدى استانادا وتكىزۋدى ۇسىنعان. ال تۇركيا سىرتقى ىستەر ءمينيسترى مەۆليۋت چاۆۋشوگلۋ كەلىسسوز 23 قاڭتاردا باستالۋى مۇمكىن ەكەنىن مالىمدەگەن. سيريانىڭ وپپوزيتسياشىل توپتارى استانادا كەلىسسوز وتكىزۋ مۇمكىنشىلىكتەرىن تالقىلاپ جاتقانىمەن، وعان قاتىساتىنى تۋرالى ءالى رەسمي تۇردە بىلدىرگەن جوق.

اساد سۇحباتىندا كەلىسسوزگە "شىنايى" وپپوزيتسياشىل توپتاردىڭ قاتىسقانى ماڭىزدى ەكەنىن ءبىلدىرىپ، سيرياداعى ساۋد ارابياسى مەن باتىس ەلدەرى قولدايتىن وپپوزيتسياشىل كۇشتەردىڭ ءبىتىم ورناتۋداعى ءرولىن ازايتۋعا تىرىستى. "شىنايى" دەگەندە مەن ساۋد ارابياسى، فرانتسيا نەمەسە ۇلىبريتانيا قولدايتىنداردى ەمەس، حالىقتىڭ ءوز ىشىنەن شىققان وپپوزيتسيانى ايتىپ تۇرمىن. سيريانىڭ ماسەلەلەرىن سيريا وپپوزيتسياسى تالقىلاۋى ءتيىس" دەدى اساد.

باشار اساد سونىمەن قاتار بولاشاقتا سيريا پرەزيدەنتتىگىنە قايتا سايلاۋعا تۇسۋدەن باس تارتۋ ۇسىنىسىنا قاتىستى كوممەنتاري بەرۋدەن باس تارتىپ، ول ماسەلە "سيريا حالقىنىڭ قالاۋىنا بايلانىستى شەشىلەتىنىن" ايتتى.

نۇرگەلدى ابدىعانيۇلى

اباي-اقپارات