بىشكەك. 24 قىركۇيەك. قازتاگ - يگور شەستاكوۆ. اقش ەلشىلىگى حالىققا قۇقىقتىق كومەك كورسەتۋ جانە ەلدىڭ وڭتۇستىگىندەگى داۋ-دامايدان كەيىنگى جاعدايدى جەڭىلدەتۋ جونىندەگى ەكى جوبانى جۇزەگە اسىرۋ ءۇشىن $150 مىڭ ءبولدى، دەپ ءمالىم ەتتى ەلشى تاتيانا گفەللەر.

«اقش قىرعىزستانعا رەسپۋبليكادا دەموكراتيا ورناتۋدا ارى قاراي قولداۋ كورسەتۋگە دايىن ەكەندىگىن جەتكىزدى. ءبىز تەك سايلاۋ وتكىزۋ، پارلامەنتتىڭ قىزمەتى تۋرالى عانا ايتىپ وتىرعان جوقپىز. بۇل جەتكىلىكسىز، حالىققا ازاماتتىق قۇقىقتى قورعاۋ سالاسىندا جانە تولەرانتتىلىق پروتسەسستەرىن نىعايتۋدا قولداۋ كورسەتكەن ماڭىزدى»، - دەدى اقش ديپميسسياسىنىڭ جەتەكشىسى جۇما كۇنى بريفينگتە.

ءوز كەزەگىندە جوبالاردىڭ ۇيلەستىرۋشىسى ازامات كەرىمباەۆتىڭ تۇسىندىرۋىنشە، زاڭگەرلەر وش جانە جالال-اباد وبلىستارىنىڭ تۇرعىندارىنا تەگىن قۇقىقتىق كومەك كورسەتەدى.

«ءبىز ماۋسىم ايىنداعى تارتىپسىزدىكتەر بارىسىندا زارداپ شەككەندەرگە مەنشىك قۇقىعىن جانە جەكە كۋالىكتەردى قالپىنا كەلتىرۋگە كومەكتەسەمىز»، - دەپ اتاپ ءوتتى ا. كەرىمباەۆ.

ونىڭ حابارلاۋىنشا، رەسپۋبليكانىڭ 5 ايماعىنداعى 35 مەكتەپ پەن 4 مەدرەسەدە تولەرانتتىلىقتىڭ دامۋىنا بايلانىستى وقۋ باعدارلامالارى وقىتىلىپ، ارنايى وقۋ قۇرالدارى جاسالادى.

«ماۋسىم ايىنداعى تارتىپسىزدىكتەرگە كوپتەگەن جاستار قاتىستى، سوندىقتان ءبىزدىڭ جوبا رەسپۋبليكانىڭ وڭتۇستىگى مەن سولتۇستىگىندەگى جاستاردىڭ اراسىندا ۇلتارالىق كەلىسىمدى نىعايتۋعا باعىتتالادى»، - دەدى ا. كەرىمباەۆ.