الىپ تۇلعا اعا پارقى
مۇحتار شاحانوۆقا
كۇللى رۋحسىز بيىكتەردىڭ پارقى،
داڭقى سۇيىقتاۋ
ءبىز شىققان تاۋ – شىندىق تاۋى،
بارلىق تاۋدان بيىك تاۋ!
م.شاحانوۆ
تامىرىڭ تەرەڭ، دىڭگەگىڭ مىقتى، بۇتاعىڭ بيىك تارماقتى،
بايتەرەك اعا، سايا بوپ جۇرگەن ىعىڭا جيناپ جان-جاقتى.
بايسالدى ءجۇزىڭ باعىنعان ويعا، سابىرعا جاندى شاقىرعان
ىستەرىڭ ابزال، ىزەتىڭ كەرىم، ءىلتيپات تاعىلىم سالماقتى.
لەبىزدەن ىزگى جىلۋلىق ەسكەن، سوزدەرىڭ ۇلىق عيبراتتى،
توقتامىڭ تۇنىق، كولدەردە جۇزگەن اققۋداي سەنگەن عيززاتتى.
كىسىلىك –ايبىن، كىشىلىك – ايقىن، جاراسىم تاۋىپ قوس ەگىز،
تۇلعاڭدى بيىك، تۇعىرلاپ ءيىپ، مۇسىندەپ شەبەر سومداپتى.
ەل-جۇرتىڭ ەلەپ، ەلەگىزىپ كۇتكەن، ەسەلى ەڭبەك قوماقتى،
ايانعان جايىڭ، ادىلدىك جولدان جالتارعان ءساتىڭ بولماپتى!
«سويلەگەن ەكى جىگىتتىڭ جايى – ولگەنمەن تەڭ!» دەپ جيرەندىڭ،
ادام بوپ قالۋ – ۇلىلىق سەزىم، ءبىرتۋار باتىر ساڭلاق-تى.
اۋىرعان جانىڭ جەتكىزىپ ەزىپ، زىنداننان تارتىپ شىندىقتى،
جابايى جۇيرىك، قۇلاققا ءتۇرپى، تاعالى سوزدەر سىرعىپتى.
«التى ءجۇز توقسان ءۇش» قالامگەر، «تج»-لار، «ءۇش توپ ادامدار»، -
دەپ، جانايقاي شەرلى سىرىڭ، تۇسىنگەن ەلىڭ تالانتتى.
ونەگە تەرگەن، وزگە ەلدىڭ بەرەن جاقسىسى ءسىزدى تاڭداپتى،
ءوز ەلىڭ وركەن جايعىزىپ تەرەڭ ازامات ەرىن اڭداتتى.
اعاتاي، سەنىڭ ەلىڭ مەن جەرىڭ «قازاق» دەپ ۇعىپ سىرت كوزدەر،
ابىروي – اسقاق، اقيقات – ماقسات، جەر شارىن ءجۇزىپ شارلاپتى.
ماڭدايعا بىتكەن قازاقتىڭ كوزى، ايبىندى ءسوزى، ايباتتى،
شىدامىڭ نەتكەن شىدەردى شەشكەن شىرعالاڭ ساتتە قايراتتى.
قايسارلىق كەلبەت، ادىلدىك تورلەپ، شىندىقتىڭ يەم، نۇرىن توك!
اعاتاي، جانىڭ اقجولتاي مىرزا، جەرىندەي قازاق بايتاق-تى.
ءجۇرشى امان ەلدىڭ تىلەۋى سەن دەپ تاقىمىن قىسقان – ايعاق-تى،
كەر زامان قيلى تۇسىندەي كورگەن موڭكە بي بابام، تايعاق-تى.
ۇلى ءىسىڭ ۇلتتىڭ ۇلاعات ۇلىن ۇمتىلتىپ جونگە شاقىرعان،
ۇلىلار – تاريح، تاريح بوپ قالدىڭ، ۇستاز بوپ جەبەپ ۇرپاقتى!
جولدىباي مۇزاپپاروۆ
Abai.kz
