«نۇر-مۇباراك» ەگيپەت يسلام مادەنيەتى ۋنيۆەرسيتەتىنىڭ «يسلامتانۋ» فاكۋلتەتىن ءبىتىرۋشى تۇلەكتەرىمەن كەزدەسۋ كەزىندە قازاقستان مۇسىلماندارى ءدىني باسقارماسىنىڭ توراعاسى ەرجان قاجى مالعاجىۇلى ءدىن قىزمەتكەرلەرى بەلسەندى بولۋى كەرەك دەگەن ءسوزدى قاداپ ايتتى. باسقارام توراعاسىنىڭ ءسوزىن باق-قا قمدب-نىڭ ءباسپاسوز قىزمەتى جەتكىزىپ وتىر.

«يسلام ءدىنىنىڭ جاۋاپكەرشىلىگىن ارقالاعان ءدىن قىزمەتكەرلەرى حالىق اراسىندا يماندىلىقتى ناسيحاتتاپ، قوعامداعى تۇراقتىلىق پەن رۋحاني تۇتاستىققا قىزمەت ەتكەن. بۇل ساباقتاستىق ۇرپاقتان-ۇرپاققا عاسىرلار بويى جالعاسىپ كەلگەن. ال، قازىرگى ۋاقىتتا يمام بولۋدىڭ جاۋاپكەرشىلىگى، ءتىپتى، ۇلكەن. ويتكەنى، جاڭا اقپاراتتىق كەڭىستىك قوعامعا ءتۇرلى ءدىني ماعلۇمات الۋ مۇمكىندىگىن بەردى. ونىڭ ىشىندە دۇرىسى دا، بۇرىسى دا بار. سوندىقتان، ءدىندى دۇرىس ناسيحاتتاپ، ناقتى تۇسىنىك قالىپتاستىرۋ جولىندا ءدىن قىزمەتكەرى سەرگەك ءارى بەلسەندى بولۋى كەرەك»، – دەدى باس ءمۇفتي ەرجان قاجى مالعاجىۇلى. باس مۇفتيمەن وتكەن كەزدەسۋ ساۋاتتى ءدىن قىزمەتكەرلەرىنە ارتىلار ءۇمىت تە، مىندەت تە مول ەكەندىگىن تاعى دا ناقتىلاي ءتۇستى.

سونىمەن قاتار، كەزدەسۋگە قمدب-نىڭ وقۋ-اعارتۋ ءبولىمىنىڭ مەڭگەرۋشىسى باقتىباي بەيسەنباەۆ، ۋنيۆەرسيتەت پرورەكتورى ءشامشادين كەرىم، الماتى ورتالىق مەشىتىنىڭ باس يمامى نۇربەك ەسماعانبەت قاتىسىپ، ءوز ويلارىمەن ءبولىستى.

بيىل «نۇر-مۇباراك» ەگيپەت يسلام مادەنيەتى ۋنيۆەرسيتەتىن «يسلامتانۋ» ماماندىعى بويىنشا 130 ستۋدەنت ءتامامدايدى.

اباي-اقپارات