قازاق جەرىنىڭ قوس قيىرىندا ومىرگە كەلىپ، پەشەنەسىنە قان مايدانداعى ەرلىگىمەن، بەيبىت زاماندا قالام قۋاتىمەن تانىلۋ جازىلعان، تاعدىرلاس قوس ارىس – مالىك عابدۋللين مەن باۋىرجان مومىشۇلى اراسىنداعى رۋحاني بايلانىس ەكىنشى دۇنيەجۇزىلىك سوعىس جەر-جاھاندى شارپىعان جىلداردان باستالىپتى.     

1941 جىلى الماتى قالاسىنىڭ تۇبىندە جاساقتالعان 316-اتقىشتار ديۆيزياسى (كومانديرى گەنەرال-مايور ي.ۆ.پانفيلوۆ) قۇرامىندا قوس قىران مايدان شەبىنە اتتانادى. اۆتوماتشىلار روتاسىنىڭ ساياسي جەتەكشىسى مالىك عابدۋللين مەن باتالون كومانديرى باۋىرجان مومىشۇلىنىڭ تانىستىعى وسى كەزدەن باستاۋ الادى. قىزمەت بابى، سوعىس جاعدايىنا بايلانىستى ۇنەمى بەتپە-بەت جۇزدەسىپ، پىكىر الماسىپ وتىرۋعا مۇمكىندىك جوق ەدى. رۋحاني ۇندەسكەن قوس باتىر وزدەرىنىڭ امان-ساۋلىقتارىن، ءتۇرلى تاقىرىپتاعى وي-پىكىرلەرىن حات ارقىلى ءبىر-بىرىنە جولداپ وتىردى. ول حاتتار نەگىزىنەن توتە جازۋمەن جازىلعان جانە بارلىعى بىردەي ساقتالماعاندىعىن ەسكەرگەن ءجون. سەبەبى، مالىك عابدۋلليننىڭ بىرنەشە قاپ ماتەريالدارى، ءوزىنىڭ ايتۋىنشا، سوعىس كەزىندە بومبا ءتۇسىپ جانىپ كەتكەن. قازىردە بىزگە جەتكەن حاتتاردىڭ ءوزى ءبىرشاما ەكەندىگىن ەسكەرسەك، ەكى تۇلعا اراسىنداعى تىعىز بايلانىستىڭ قانداي بولعاندىعىن ايقىن اڭعارامىز.

حاتتارعا كوز جۇگىرتە وتىرىپ، مايدانداس اعا مەن ءىنى اراسىنداعى سىيلاستىقتى، كىشىپەيىلدىلىكتى، اعالىق قامقورلىق پەن ىنىلىك جاناشىرلىقتى بايقاۋعا بولادى. حاتتاردا اماندىق-ساۋلىق، كۇندەلىكتى تۇرمىستىق كۇيلەر، مايدان احۋالىنا قوسا، ۇلتتىق ماسەلەلەر دە قوزعالىپ، ءوزارا جوسپارلارىن، ويلارىن ءبولىسىپ وتىرادى. مالىك باۋكەڭنىڭ وتباسىنا دا حات جازۋدى دا ۇمىتپاعان. باتىردىڭ جۇبايى جامال مەن ۇلى باقىتجانعا ءاردايىم باۋكەڭنىڭ اماندىعىن ايتىپ، سالەم جولداپ وتىرعان. ماكەڭ ءبىر حاتىندا بىلاي دەيدى: «قىمباتتى جامال، باقىت! ايدان بۇرىن جازعان حاتىمدى العان بولارسىزدار. ءبىز باۋىرجاننىڭ تاربيەسىندە وسكەن ادامدارمىز، باۋىرجاننىڭ مايدانداس جولداستارىمىز.

كەشە پوچتالون كوپ گازەت اكەلدى: وندا ءبىرسىپىرا ادامعا ناگرادا بەرۋ تۋرالى جايىندا بۇيرىق شىعىپتى. وسى بۇيرىق بويىنشا باۋىرجان ناگرادقا ايبىندى «قىزىل تۋ» وردەنىن الدى. سىزدەرگە باۋىرجاننىڭ العان ناگرادىمەن قۇتتى بولسىن ايتامىز. بۇل ناگرادقا سىزدەر قانداي قۋانساڭىزدار، ءبىز دە سونداي قۋانامىز»، - دەپ، ءوزىنىڭ شىن قۋانىشتى ەكەنىن بىلدىرەدى. مالىك جامالعا جازعان حاتتارىندا ۇنەمى باۋىرجاننىڭ ەرلىك ىستەرىن، ازاماتتىعىن، قايسارلىعىن تامسانا ايتۋمەن بولادى: «مەن بۇرىن باۋىرجاندى، شىنىن ايتقاندا، بىلمەۋشى ەدىم. ول ەكەۋىمىزدى تانىستىرعان جەر – كوكالا ءتۇتىنى بۇرقىراعان مايدان بولدى. باتىرلىق، ەرلىك، وجەتتىك – ءبىر كىسىنىڭ بويىندا بولاتىن قاسيەت ەمەس. سول سياقتى، مىنەزى ماۋا، كوڭىلى شات، مىنەزى مەيىرىمدىلىك قاسيەت تە ەكىنىڭ بىرىندە بولا بەرمەيدى. ادامداعى وسى ەكى قاسيەت ءبىر كىسىنىڭ تۇلعاسىنان تابىلۋى وتە سيرەك. بىراق، وسى ەكى قاسيەتتىڭ ەكەۋى دە باۋىرجاندا بار. مەن مۇنى جاقسى بىلەمىن. مەن جازۋشى ادام ەمەسپىن. ەگەر جازۋشى يا اقىن بولسام، كوك كۇمبەزدى قاعاز ەتىپ، كوكالا داريانى سيا ەتىپ «باتىرىم باۋىرجان» دەگەن حيكايا دا جازعان بولار ەدىم» دەيدى جان سىرىن اقتارا.

بۇل سوزدەردەن مالىكتىڭ ادام تاني بىلەتىن، ازاماتتى باعالاي بىلەتىن كورەگەندىگىن بايقاۋعا بولادى. باۋكەڭ ەكەۋىنىڭ اراسىنداعى قارىم-قاتىناس ارىپتەستىك پەن اسكەري جارعىنىڭ اياسىندا عانا قالىپ قويماي، اعا مەن ءىنى، ۇستاز بەن شاكىرت اراسىنداعى نىق بايلانىسقا اينالعانىن كورەمىز. مالىك عابدۋللين ءوزى ۇستاز تۇتقان باۋىرجان اعاسىن ءاردايىم ۇلىقتاپ وتىرعاندىعىن تەك حاتتارىنان عانا ەمەس، ماقالالارىنان دا بايقاۋعا بولادى. مايداندا ءجۇرىپ «سوتسياليستىك قازاقستان» گازەتىنە باۋكەڭنىڭ ەرلىك-ونەگەسى جايىندا جازىلعان «قازاق ماقالىنىڭ كۇشى» دەگەن ماقالاسىن جىبەرەدى.

ەلگە جازعان تاعى ءبىر حاتىندا: «ايتپاقشى، مەن «قازاق بالاسى» دەگەن ۇلكەن نارسە جازدىم، بارلىعى 7 وبششايا تەتراد بولدى. وندا 6-7 قازاق بالاسىنىڭ مايدانداعى ەرلىك ءىسى ايتىلادى. 2 داپتەر كوبىنشە باۋكەڭە ارنالدى. بۇل ماتەريالدى قازاق جازۋشىسىنىڭ ءبىر مىقتىسىنا بەرمەكپىن، ول ودان بىردەمە شىعارا السا، تىلەك ورىندالعانى. جازعاندارىمنىڭ ءبارى – تەك فاكتى، ماتەريالدار».

مالىك عابدۋللينگە كەڭەس وداعىنىڭ باتىرى اتاعىن بەرۋدە باۋىرجان مومىشۇلىنىڭ ۇلكەن قاجىر-قايرات تانىتىپ، كوپ ەڭبەك سىڭىرگەندىگىنە تاريحي قۇجاتتار كۋا. مايدان دالاسىندا ەرلىك كورسەتكەندەردىڭ وزىنە كەشەگى بۇراتانا ۇلتتاردىڭ وكىلى رەتىندە شەكەدەن قارايتىن شوۆينيست شەندىلەردى مويىنداتىپ، دالا ۇلاندارىنىڭ ادال ەڭبەگىن دالەلدەۋ وڭاي بولماعان. مالىكتەي باتىر ءىنىسىنىڭ ەرلىك ءىسىن ەلەمەۋ – ارعا سىن دەپ ۇقتى باۋكەڭ. بۇل مالىككە عانا ەمەس، بارشا قازاق سولداتتارىنا  بەرىلگەن اتاق ەدى. «...ماعان گەروي اتاعىن بەردى. بۇل اتاققا ۇسىنۋدا باۋكەڭنىڭ ەڭبەگى زور، ونى ايتىپ، بولماسا، جازىپ بىتىرە الماسپىن. ءتىرى بولساق، باۋكەڭ ەڭبەگىن اقتاۋ ءوز الدىنا. گەروي اتاعىن بەسبارماقپەن قارسى الۋ كەرەك ەمەس پە؟ اتتەڭ، نە كەرەك، قولدىڭ قىسقالىعى جانە بۇرىن بولماعان جاڭا قىزمەت ورنى كوپ اسەرىن تيگىزدى. وقاسى جوق، امان بولساق، بەس بارماق ەمەس، ون بارماق جازارمىز».

باۋىرى باتىر اتانعاندا ەڭ العاشقى بولىپ قۇتتىقتاعان دا باۋكەڭ بولاتىن.

«ەل كۇيزەلگەن كەزىندە،

ەرلىك ەتكەن، باۋىرىم،

جاۋ جاعادان العاندا،

باتىرلىق ەتكەن، باۋىرىم،

ەل نامىسىن قۇرمەتتەپ،

ەر نامىسىن ارداقتاپ،

قۇتتى بولسىن ايتامىن،

شىن جۇرەكتەن، مالىگىم!»-

دەگەن جىر جولدارى سول ساتتەردە جازىلعان، باۋكەڭدەي باتىردىڭ شىنايى كوڭىلدەن شىققان رياسىز تىلەگى بولاتىن.

ماكەڭ ءوزىن ەشقاشان اقىن ساناماعان تۇلعا. ءتىپتى كەيبىر جازۋشىلارعا جازعان حاتتارىندا ءوزىن اقىن دەپ اتاۋدان اۋلاق بولۋىن ەسكەرتىپ ايتادى. الايدا جازعان ولەڭدەرى دە جوق ەمەس ەدى. سونداي ولەڭدەرىنىڭ ءبىرى باۋىرجان اعاسىنا ارنالعان:

ارداقتى باۋكە!

«اقىل مەنەن ايباتتىڭ،

ارناسى ەدىڭ قايراتتىڭ،

توگىلگەن كەزدە قىزىل قان،

قىسىلعان كەزدە شىبىن جان

المادىڭ تىنىم نەشە كۇن،

جايلانىپ كىرپىك قاقپادىڭ،

سەزبەدىڭ كۇننىڭ باتقانىن،

سارعايىپ تاڭنىڭ اتقانىن،

قارساق جورتپاس قارساڭنان،

جولبارىس جۇرمەس جىلعادان،

قۇلان باسپاس تاقىردان،

تاعالى ات تايعان مۇزداردان،

تەرىستەن سوققان ىزعاردان،

قارعا قونباس قارا اعاش،

نەلەر بيىك قۇزداردان،

اياعىڭ باسىپ اتتادىڭ.

قانداسقان جاۋمەن قاعىسىپ،

نەشە كۇن تاماق تاتپادىڭ،

اتا مەنەن انانىڭ،

بەسىكتەگى بالانىڭ،

ءىنى مەنەن اعانىڭ،

جەڭگە مەنەن كەلىننىڭ،

ەركەلەپ وسكەن ەلىڭنىڭ،

كوك وراي نۇرلى جەرىڭنىڭ

سەنىمىن ادال اقتادىڭ.

ار، ۇيات، نامىس سەندەگى – 

كۇشتى ەدى-اۋ سوققان داۋىلدان.

سىزگە ارناعان مىندەتى – 

سوزدەر ەدى وسى، «باۋىرجان!»

تەمىر جاقتى، جەز تاڭداي،

ايىر كومەي، اق ماڭداي

اتانام دەپ تالپىنعان

بولىپ ەدى كەزدەرىم.

نوسەرلەتە توگىلگەن

ءبىر كەزدەگى سوزدەرىم،

قازىر مەنەن اۋلاقتاپ،

كوردىڭ بە، باۋكە، بەزگەنىن.

ايتپەسە وسى حاتتى ولەڭمەن جازايىن دەپ پە ەم. بۇل اشەيىن كوڭىل ەدى. ايتپەسە مەندە شاتاسىپ جۇرگەن نە اقىندىق، - دەپ حاتىن اياقتايدى.

مالىك عابدۋللين ورتالىق ساياسي باس باسقارماعا قىزمەتكە اۋىسىپ كەتكەندە دە باۋكەڭمەن حابارلاسىپ، حات الىسىپ تۇرادى. حاتتارىندا اعاسىمەن كوپ اقىلداسادى. «وسەر ەلدىڭ بالاسى ءبىرىن-ءبىرى باتىر دەر» دەگەن ماقالدى كوپ قولدانادى. باۋكەڭە باتىر اتاعىن بەرۋ ماسەلەسىن (مالىكتىڭ حاتتارىندا) دە ءسوز ەتەدى.

باۋكەڭ جازعان حاتتاردان اعالىق قامقورلىقتى ايقىن اڭعارۋعا بولادى. «قاراعىم، قارا تەنتەگىم –مالىگىم!» دەپ ەركەلەتە جاۋاپ جازعان حاتتارى سوعان دالەل. جالپى مازمۇنى ۇلتقا قىزمەت ەتۋگە كەپ سايادى. سول كەزدەگى سولاقاي ساياساتتى سىناي وتىرادى.

«...ءسىز الماتىعا بارعاندا كوپ ەڭبەك ىستەگەنىڭىزدى ەستىپ قۋاندىم. وتە جاقسى ءىس جاساعانسىز. ول ەڭبەكتەر حالقىمىز ءۇشىن وتە باعالى، اسا اسىل قازىنا دەپ بىلەمىن. مۇنداي ەڭبەكتىڭ قازاق حالقىنىڭ اتاعىن شىعارۋ، ابىرويىن كوتەرۋ، ادامدارىن تانىتۋ جولىندا وتە كوپ قىزمەت اتقارارى ءسوزسىز. شىنىندا دا، حالىققا قىزمەت ەتۋدەن ارتىق نە بار؟ بىراق وسى قىزمەت ەتۋ دەگەندى تەرىس ۇعىناتىن دۋراكتار دا جوق ەمەس، ولار كوپ. وندايلاردىڭ ويىنشا، قارا قارنىڭ قامپايسا، قارا باسىڭنىڭ بابى كەلىسسە، ءۇستى-باسىڭ دۇرىس بولسا، بۇل – حالىققا قىزمەت ەتكەندىك بولادى دەپ قارايدى. ناعىز مەششاندىق وسى عوي. قۇداي ساقتاسىن. مۇندايلار ەل باسقارماسىن. ەلدى دە، ەردى دە وندايلار ەزەدى. ەزبەسە ەزۋگە تىرىسادى. وندايلاردىڭ كەيبىرەۋىن ءسىز كەزدەستىرگەن بولارسىز. مۇنداي ادامدار ۇلت دەگەندى تەرىس ۇعىنادى، ودان قاشادى، ءتىپتى قورقادى. ايتا بەرسەڭ، پالە جاۋىپ، سەنى ۇلتشىل ەتىپ كورسەتۋگە تىرىسادى. ناتسيونالنايا گوردوست دەگەنگە تەرىس قارايدى».

قىلىشىنان قان تامىپ تۇرعان قىزىل يمپەريا داۋىرىندە ايتىلعانىن ەسكەرسەك، مالىك باتىردىڭ بۇل ويلارىن ەرلىك دەۋگە تۇراتىن ءىس جانە قازىرگى كۇنى دە كۇن تارتىبىندە تۇرعان ماسەلە دەپ ايتا الامىز.

ەكى بىردەي تاۋ تۇلعانىڭ ويى مەن كوزقاراسى ءاردايىم ءبىر جەردەن شىققان دەۋگە دە كەلمەيدى. ءتۇرلى ادام بولعان سوڭ، ءتۇرلى پىكىر دە بولادى. سول پىكىر الۋاندىعى ەكى تۇلعا اراسىندا بەيبىت كۇندە كورىنىس تاپقان. وعان سەبەپ بولعان باتىر باۋكەڭنىڭ «زا نامي موسكۆا» شىعارماسى ەدى. «زا نامي موسكۆا» جارىققا شىققاننان كەيىن مالىك عابدۋللين باۋىرجان اعاسىنا حات جازىپ جىبەرەدى. حاتىندا شىعارمانىڭ اسىعىس جانە قىسقا جازىلعانى ايتىلىپ، بىرنەشە ەسكەرتۋ دە جاسايدى. «وسى شىعارماعا ەنگەن باستى ادامداردىڭ سوعىسقا دەيىن كىم بولعاندىعىن قىسقاشا تۇردە بايانداپ بەرۋ كەرەك. ماسەلەن: باۋىرجان، راحيمۇلى، بوزجانۇلى تاعى باسقالارى سوعىسقا دەيىن كىم ەدى؟ گەنەرال پانفيلوۆ تۋرالى تولىق ماتەريال بەرىڭىز. بۇل گەنەرالدىڭ اتىن حالىق ەستىگەن، بىراق سوعىسقا دەيىن كىم بولعاندىعىن ەكىنىڭ ءبىرى بىلە بەرمەيدى. سوندىقتان پانفيلوۆ جايلى ماتەريالدار قوسساڭىز، وتە حوروشو بولماق. پانفيلوۆتىڭ وبرازى كورىنبەيدى. كوپ جاعدايدا گەنەرالىمىز قولباسشى ەمەس، تەك كارتاعا ءۇڭىلىپ، جۇرتتىڭ ءسوزىن تىڭداۋشى عانا بولىپ قالادى. گەنەرال جۇرتتى باسقارۋشى، قولباسشى ەدى عوي. ەندەشە، ول وسىنداي دارەجەدە بولا تۇرىپ نە ىستەدى دەگەن سۇراۋدىڭ جاۋابىن كىتاپ بەرمەيدى. ءسىز گەنەرالدى ماقتايمىن، دارەجەلەيمىن دەگەن ماقساتتى قويا وتىرىپ، سونى ورىندامايسىز. كوپ جاعدايدا گەنەرال تەك ءسىزدىڭ ءسوزىڭىزدى تىڭداۋشى، قۇپتاۋشى عانا بولىپ قالادى. ءسىز باسقارعان باتالون موسكۆانى قورعاۋ جولىندا ءتورت تاماشا ەرلىك جاساعانى تاريحقا بەلگىلى، وعان تالاسىمىز جوق. بىراق تا ءسىز ءوز باتالونىڭىزدى سۋرەتتەۋ ارقىلى بۇكىل ديۆيزيادا ءبىر عانا باتالون بار، ول مەنىڭ باتالوننىم دەگەندەي اسەر قالدىراسىز. ديۆيزيانىڭ باسقا بولىمدەرى بوس جۇرگەن نەمەسە تىرقىراپ قاشىپ جۇرگەن سياقتى بولىپ كورىنەدى. باسقالاردىڭ ەرلىگىن ءارتۇرلى سۋرەتتەۋگە مولىنان بولادى عوي. سوندا ءسىزدىڭ باتالونىڭىزدىڭ ەرلىگى باستى ورىندا سۋرەتتەلسىن، سول ارقىلى باسقالاردىڭ ەرلىگى كورىنسىن. سونداي-اق، بوزجانوۆتى كاك پوليترۋك ءسىز كورسەتە الماعانسىز. جاۋىنگەرلەردىڭ اراسىندا بولىپ، جۇرتتى ۇيىمداستىرىپ جۇرگەن پوليترۋكتەر ءسىزدىڭ كىتابىڭىزدا كورىنبەيدى. ول شتاب اينالاسىنان شىقپايدى. بۇل قالاي؟ «زا نامي موسكۆا» اڭگىمەسىنە بەرىلگەن ەپيگراف ءسوزىڭىزدى وقىپ شىعىڭىزشى، وندا ءسىز بىلاي دەپسىز: «مەن بۇل شىعارمامدا ءوزىمنىڭ تاجىريبەمدى ايتۋمەن قابات، كەيبىر قاتەلەرىمدى دە كورسەتپەكپىن» دەيسىز. مەنىڭشە، مۇنداي ءسوزدىڭ قاجەتى بولماس، ويتكەنى قاتەم مىناداي دەپ كورسەتپەيسىز».

مۇنداي وتكىر سىن، ارينە، كىمگە دە بولسا، ونىڭ ىشىندە باۋكەڭ سياقتى قاھارلى قولباسشىعا وڭاي تيمەيتىندىگى انىق ەدى. بۇل حاتتىڭ جاۋابى دا كوپ كەشىكپەي يەسىن تاپقان:

«قاراعىم مالىك!

ءبىر قالادا تۇرىپ، قارىم-قاتىناسىمىز بولماستان حات ارقىلى سويلەسىپ، پىكىر الىسۋدى قالايىنشا ازاماتتىعىمىزعا، اتاعىمىزعا جاراسادى دەپ ويلايسىڭ؟ مەنىڭ ەسىگىم سەنىڭ الدىڭدا قاشان جابىلىپ ەدى؟ مىنا حاتتى سەن ماعان قانداي ويمەن تولعانىپ جازعانىڭا تۇسىنبەدىم. «تۆورچەسكي كۋحنياداعى تاماق» بەس جىلداپ، ون جىلداپ «پىسەتىنىن» سەن بىلەسىڭ. پريەم اۆتورا، مەتودولوگيا، رەشەنيە پروبلەمنىح ۆوپروسوۆ، تاعى باسقا نارسەلەرگە قالايىنشا ارالاسۋعا بولادى؟ ۆيدەنيە ميرا دەگەن نارسەنى جازۋشىعا تابيعات قانا بەرەدى ەمەس پە؟ مەنىڭ جاۋىنگەرلەردىڭ ارۋاعىنىڭ الدىندا، تاريح، حالىق الدىندا ادالدىعىما كۇمان كەلتىرۋگە سەنىڭ قانداي مورالدىق پراۆوڭ بار؟ سەنىڭ جاپقان «جالاڭ» ماعان جۇقپايدى. اسىعىستىق، شالا-شارپى ويلارىڭ ءوزىڭدى كەيىن ۇيالتىپ جۇرمەسىن. اسكەري اتاعى بارلاردا تەرەڭ اسكەري ويلار بولا بەرمەيدى. فورما مەن پروفەسسيانىڭ جەر مەن كوكتەي ايىرماسى بار ەكەنىن سەن بىلەسىڭ. تاريحتا كاپروۆ پەن جيىرما ءۇشىنشى پولك ءۇشىن ەشقانداي ادۆوكاتتىڭ كەرەك جوق ەكەنىن دە بىلەسىڭ. قۇداي بار، ارحيۆ بار. مەن قۇداي مەن ءارحيۆتىڭ قۇلىمىن. زايا باسپايمىن. وقي بىلگىن، ويلاي بىلگىن. سەنىڭ كورگەنىڭدى مەن كورگەنىم جوق. مەنىڭ كورگەنىمدى «كوردىم» دەپ جاعالاسپاعىن. حاتىڭدى قايتارىپ وتىرمىن. پىكىرىڭدى اۋىزەكى كوزبە-كوز ايتقىن. ارامىز ونشا الىس ەمەس قوي».

باتىردىڭ باتىرعا جازعان جاۋابى وسى بولدى. قاشاندا ەر شەكىسپەي بەكىسپەيدى. ەكى الىپ تۇلعانىڭ تاريحي وقيعالارعا قاتىستى كوزقاراسىنان ءبىز ولاردىڭ تۋراشىلدىق مىنەزىن، اقيقات جولىنداعى ادالدىعىن تانىعاندايمىز. بۇعان قاراپ، ەكى باتىردىڭ اراسى بەيبىت زاماندا سۋىنىپ كەتكەن ەكەن دەگەن وي تۋىنداماۋى ءتيىس. ءاربىر جيىندار مەن مەرەكەلىك سالتاناتتاردا مالىك باتىردىڭ باۋىرجان اعاسىن ۇنەمى كوتەرمەلەپ، قولداپ، ول تۋرالى كوپتەگەن ماتەريالداردى ءومىرىنىڭ سوڭىنا دەيىن باسىلىم بەتتەرىندە جاريالاپ وتىرۋى ءسوزىمىزدىڭ دالەلى بولسا كەرەك-ءتى.

مالىك عابدۋللين مەن باۋىرجان مومىشۇلى اراسىنداعى رۋحاني بايلانىس 30 جىلدان استام كەزەڭدى قامتىدى جانە ول جىلدار وتكەن سايىن كەمەلدەنە ءتۇستى دەپ ايتا الامىز. مالىك عابدۋللين ومىردەن وتكەندە باۋكەڭ قامىعىپ، قايعىرىپ وتىرىپ اھ ۇرادى. ەكى باتىردىڭ اراسىنداعى پەندەشىلىك، باقاي ەسەپتەن ادا، نە ايتسا دا شىندىق، تۋراشىلدىقتان اينىماعان، جاراسىمدى سىيلاستىق بۇگىنگى ۇرپاق - بىزدەردىڭ ارامىزدا دا بولسا، قانەكي دەگىمىز كەلەدى. مالىك باتىردىڭ عاسىرلىق تويىنا وراي، باۋىرجان، مالىك، رامازان ەلەباەۆ، تولەگەن توقتاروۆ، گەنەرال پانفيلوۆ، ت.ب. ەرلەردىڭ ونەگەلى عۇمىرىن، شىنايى ادامي بەينەسىن كورسەتەتىن فيلم، ساحنالىق تۋىندىلار جارىق كورسە، جاس ۇرپاقتى وتانشىلدىققا، حالىقتار دوستىعىنا، ەرلىككە تاربيەلەۋدىڭ تاپتىرماس قۇرالى بولار ەدى جانە وسى ويىمىز جۇزەگە اسادى دەگەن سەنىممەن ماقالامىزدى تۇيىندەمەكپىز.

نۇربولات المەنوۆ.

كوكشەتاۋ.

P.S. ماقالا مالىك عابدۋللين مۋزەيى قورىنان الىنعان ماتەريالدار نەگىزىندە جازىلدى.

Abai.kz