«تەڭگەمىزدىڭ تاعدىرى تالاپايعا ءتۇسىپ كەتتى عوي!» دەپ قاپالانىپ جۇرگەن حالىقتىڭ قۇلاعىنا ءسۇيىنشى حابار كەپ جەتتى!

ەلىمىزدىڭ ۇلتتىق ەكونوميكا ءمينيسترىنىڭ ورىنباسارى بۇگىن ورتاق ۆاليۋتا تۋراسىندا بىلايشا كەسىپ ايتتى: ء«بىز بۇل سۇراقتى تالقىلامايمىز. ەاەو كەلىسىم-شارتىندا بىرىڭعاي ۇلتتىق ۆاليۋتا ەنگىزۋ قاراستىرىلماعان».

ەاەو-عا تۋىسىن تاپقانداي قۋانا ەنىپ كەتكەن بيلىككە رازى بولماعانىما ءبىراز بوپ ءجۇر ەدى. ال ءدال وسى كەسىمدى پىكىرگە ءبىر قۋانىپ قالدىم.

قۇتتى بولسىن، اعايىن!

مۇنىڭ ءوزى جاقسىلىقتىڭ نىشانى دەپ بىلەمىن، ياعني ءبىزدىڭ بيلىكتىڭ ىشىندە دە تاۋەلسىزدىگىمىزدىڭ تۇعىرلى تالاپتارىنا ءتاۋ ەتەتىن تۇلعالار دا بار ەكەن عوي. ول دەگەنىڭىز جاڭادان قالىپتاسىپ كەلە جاتقان شەنەۋنىكتەر قاۋىمىنا مىقتى سيگنال: كورشى الپاۋىت مەملەكەتتىڭ باسشىسى استانانىڭ تورىندە وتىرىپ جاريا ەتكەن اسا ماڭىزدى مالىمدەمەگە ءوز مەملەكەتىنىڭ مۇددەسى ءۇشىن قارسى شىعۋعا بولادى ەكەن!

مويىنداۋ كەرەك، ءبىر مينيسترلىكتىڭ وكىلى جوعارى جاقتىڭ رۇقسات نە تاپسىرماسىنسىز مۇنداي، ساياسي استارى عانا ەمەس، سالماعى بار ءسوزدى ايتا المايدى! سوعان قاراعاندا ەاەو-عا قاتىستى ساياسي شەشىم قابىلدايتىن توپتاردىڭ ىشىندە دە ۇلتتىق مۇددەنى جوعارى قوياتىن كۇشتەر ىقپالعا يە بولا باستاعانى-اۋ. ۇزاعىنان ءسۇيىندىرسىن!

ايتپەسە، ورتاق ۆاليۋتاعا قارسى شىعۋشىلار تەك وپپوزيتسيا قاتارىندا ما دەپ كەلدىك ەمەس پە. دەپ كەلگەندە، بيلىككە جاقىن توپتاردىڭ ىشىنەن وسى تاقىرىپتا پىكىرىن اشىق جاريالاعان ۇلتتىق كاسىپكەرلەر پالاتاسى توراعاسىنىڭ ورىنباسارى راقىم وشاقباەۆقا قالاي رازى بولمايسىڭ؟

جاقىندا ۆاليۋتالىق وداق قۇرۋ مۇمكىندىگى تۋرالى تاقىرىپتى تالقىلاعان جيىنعا قاتىسقانىم بار. ۇيىمداستىرعان – التىنبەك سارسەنباەۆ اتىنداعى قور. سوندا قارجى سالاسىنىڭ ماماندارى ءتاپ-ءتاۋىر باياندامالار جاسادى. تاقىرىپتى بۇگە-شىگەسىنە دەيىن اشىپ، «ۆاليۋتالىق وداق قازاقستان ەكونوميكاسىنا ءتيىمسىز» دەگەن تۇجىرىمعا كەلدى.

بازبىرەۋلەر مىسال رەتىندە كەلتىرىپ جۇرگەن ەۋرووداقتاعى ورتاق ۆاليۋتا – ەۋرو تۋرالى، ونداعى جاعدايدىڭ ەاەو-مەن مۇلدەم وزگەشە ەكەنىن دالەلدەپ بەردى.

بالكىم، مامانداردىڭ وسى جانە باسقا دا پىكىرلەرى بيلىكتىڭ قۇلاعىنا جەتكەن بولار.

سونىمەن، ءبىر پالەدەن قۇتىلعان سياقتىمىز.

دەسەك تە، كوڭىلدە ەكى ءتۇرلى كۇدىك ءالى بار.

بىرىنشىدەن، جوعارىدا اتالعان شەنەۋنىگىمىز تاقىرىپتى ودان ءارى جالعاستىرا كەلە: «سونىمەن قاتار، ەەاو اياسىندا 2025 جىلعا دەيىن ءبىز قارجى نارىعىن تۇراقتاندىرۋ اياسىنداعى زاڭنامانى ۇيلەستىرۋدى جۇزەگە اسىرامىز»، - دەگەندى تاعى دا ايتىپ وتىر.

باتىس سانكتسيالارىنىڭ استىندا قالعان، ونسىز دا تالتىرەكتەپ تۇرعان رەسەي ءرۋبلى مەن ەشكىم دە ۇستاعىسى كەلمەيتىن بەلارۋس ءرۋبلى – «زايچيكپەن» بىرگە ءجۇرىپ، تەڭگەمىزدىڭ تۇراقتىلىعىن قامتاماسىز ەتە الامىز با؟ سول «ۇيلەستىرۋدىڭ» ءوزى قاجەت پە بىزگە؟ سونى ويلانساق.

ەكىنشى كۇدىكتىڭ ساياسي تەحنولوگياعا قاتىسى بار. گولليۆۋدتىڭ ءبىر ءفيلمى بار. سيۋجەتى مىناداي:

اقش پرەزيدەنتىنىڭ سايلاۋىنا ءۇش كۇن قالعاندا ونىڭ قارسىلاستارى ونى ماسقارا ەتەتىن ءبىر فاكت تاۋىپ الىپ بەدەلدى ءبىر گازەتتە جاريالايىن دەپ جاتادى. ول ماقالا شىعىپ كەتسە، پرەزيدەنت ءسوزسىز جەڭىلىپ قالادى. پرەزيدەنتتىڭ ءوزى قىتايدا ساپارمەن ءجۇر. نە ىستەۋ كەرەك؟

كومەككە ونىڭ ەجەلگى ءبىر دوسى كەلەدى.

«سوعىس اشۋ كەرەك!» - دەيدى ول.

«كىممەن؟»

«البانيامەن!»

«نەگە البانيامەن؟»

«ويتكەنى، ول ەلدى كوپ ادام بىلە بەرمەيدى!»

ءسويتىپ، گولليۆۋدتىڭ ءبىر رەجيسسەرىن شاقىرىپ، كينوستۋديادا اقش-تىڭ البانيا حالقىنا كومەككە كەلىپ، سوعىس اشقانى تۋرالى بەينەسيۋجەتتەر جاساپ، كەلەسى كۇنى تاڭەرتەڭدە بارلىق تەلەارنالاردان كورسەتەدى. وسىنى كورگەن امەريكالىقتار انا گازەتتەگى ءبىر ماقالانى بايقاماي دا قالادى. ءسويتىپ، پرەزيدەنت قايتادان ءوز ورنىنا سايلانادى.

ياعني، ءبىر تاقىرىپتى ەكىنشى ءبىر تاقىرىپ ارقىلى تاسالاپ قويۋعا بولادى.

مەنىڭ ايتايىن دەگەنىم مىناۋ: قارجى وداعىنا كىرمەيتىن بولدىق دەپ الاقايلاپ ءجۇرىپ، ەۋرازيالىق وداققا قاتىستى ورتاق پوزيتسيامىزدان ايرىلىپ قالمايىق، اعايىن!

ءامىرجان قوسانوۆ  

Abai.kz