قازاقستان رەسپۋبليكاسىنىڭ ۇلتتىق  مۋزەيىندە (استانا قالاسى) 2015 جىلعى 16 ساۋىردە ساعات 10.30-دا حاكىم ابايدىڭ (يبراھيم قۇنانباەۆ) تۋعانىنا 170 جىل تولۋىنا ارنالعان «اباي مۇراسى» اتتى عىلىمي كونفەرەنتسيا وتەدى. شاراعا بەلگىلى ابايتانۋشىلار، عالىمدار، قوعام قايراتكەرلەرى جانە استانا قالاسىنداعى ءبىلىم مەكەمەلەرىنىڭ ۇستازدارى مەن وقۋشىلارى قاتىسادى.

تاياۋدا عانا «نۇروتان» پارتياسىنىڭ كەزەكتى سەزىندە ەلباسى نۇرسۇلتان نازارباەۆ ابايدىڭ ءۇشىنشى قارا سوزىنەن ءۇزىندى كەلتىرسە، سەمەيگە جاساعان ساپارىندا مەملەكەت باسشىسى اباي مۇراجايىنا ارنايى بارىپ، ۇلى اقىننىڭ ولەڭىن وقىپ، «ابايدىڭ جولىن، ارتىندا قالعان وشپەس مۇراسىن حالقىمىزعا پاش ەتۋىمىز كەرەك» دەپ، جيىلعان جۇرتقا ەرەكشە وي سالعانى بەلگىلى.  

ابايدىڭ 170 جىلدىق مەرەيتويىنا وراي ۇلتتىق مۋزەيدىڭ ۇيىتقى بولۋىمەن وتەتىن كونفەرەنتسيادا عاريفوللا ەسىم، تۇرسىن جۇرتباي، مەكەمتاس مىرزاحمەتوۆ، سۇلتان ورازالين، سەرىك نەگيموۆ، جانقارا دادەباەۆ، اسان ومار، اسقار نارتوۆ، باۋىرجان ەردەنبەكوۆ سىندى بەلگىلى عالىمدار، زيالى قاۋىم وكىلدەرى اقىن مۇراسى جايلى ارنايى بايانداما جاسايدى.

سونداي-اق، ابايدىڭ العاشقى شىققان ەڭبەكتەرى، شەت تىلدەرگە اۋدارىلعان تۋىندىلارى مەن اقىن جايلى ارنايى دايىندالعان اۋديو-بەينە روليكتەر جانە ۇلتتىق مۋزەي قورىنداعى اباي پورترەتتەرىنەن شاعىن كورمە ۇسىنىلادى.  

كونفەرەنتسيا بارىسىندا اباي اندەرى ورىندالادى جانە اباي وقۋلارىنىڭ جەڭىمپازدارى اقىن ولەڭدەرىنەن، قارا سوزدەرىنەن  ۇزىندىلەر وقيدى.

اباي-اقپارات