بۇل – كۇلكى دە، ءازىل دە ەمەس. بۇگىننەن باستاپ اسكەري مىندەتىن ورىنداۋدان قاشىپ، جالتارعاندار قاتاڭ جازالانادى. قر قورعانىس مينيسترلىگىنىڭ ءباسپاسوز قىزمەتى ەلىمىزدە اسكەري بورىشىن وتەۋدەن جالتاراتىندارعا جازا كۇشەيە تۇسەتىنىن جانە وتان الدىنداعى ازاماتتىق بورىشىن وتەگىسى كەلمەيتىندەر 2 ملن. تەڭگە كولەمىندە ايىپپۇل تولەۋمەن قوسا، 3 جىلعا دەيىن باس بوستاندىعىنان دا ايىرىلۋى مۇمكىن ەكەندىگىن حابارلاپ وتىر. اتالعان زاڭ بۇگىننەن، ياعني، ءساۋىردىڭ 1-ىنەن باستاپ كۇشىنە ەندى. 2015 جىلدىڭ 1 قاڭتارىنان بەرى قر قىلمىستىق كودەكسىنە ەنگىزىلگەن وزگەرىستەر مەن تولىقتىرۋلار وسىنداي قاتاڭ شارالاردى قاراستىرۋدا.

بۇعان نە دەيمىز؟ «بارەكەلدى!» دەيمىز بە، الدە... الدەقانداي پىكىر ايتامىز با؟ قالاي دەسەك تە، ەلىمىزدە قورعانىس سالاسىنا ەرەكشە ءمان بەرىلىپ، كامەلەت جاسىنا تولعان ازاماتتاردىڭ اسكەري ءومىردى كورىپ قايتقاندىعىن ءجون كورەمىز. ويتكەنى، بۇگىنگى الەم مەملەكەتتەرى ءوزىنىڭ قاۋىپسىزدىگىنە، جەرىنىڭ تۇتاستىعىنا قاتتى ءمان بەرۋدە. مىنە، كەشەلى-بەرى اراب ليگاسى ورتاق اسكەر قۇراتىندىعى جونىندە جارياعا جار سالۋدا. ال، رەسەيدىڭ قورعانىس مينيسترلىگى ورتالىق ازيا ەلدەرىنەن رەسەي قالالارىنا جۇمىس ىزدەپ بارعانداردان (گاستاربايتەرلەردەن) ارنايى جاساق قۇرىپ جاتسا، اقش ومىرلىك باس بوستاندىعىنان ايىرىلعانداردى اسكەر قاتارىنا الۋدا.

مۇنداي مىسالدار كوپ. ەندەشە، قر قورعانىس مينيسترلىگىنىڭ اسكەري الەۋەتىمىزدى كۇشەيتۋ ءۇشىن الگىندەي ارەكەتكە بارۋى قاي جاعىنان الساق تا قۇپتارلىق. جاسىراتىنى جوق، ەلىمىزدە ەڭ تۇرالاعان، ءىرىپ-شىرىگەن، بىلىققا باتقان سالا – قورعانىس سالاسى. وسى ۋاقىتقا دەيىن اسكەرگە بارعىسى كەلەتىندەر – باردى. بارعىسى كەلمەيتىندەر جوقتى سىلتاۋ ەتىپ قالا بەردى. ونى ايتاسىز، اسكەر قاتارىندا بولۋ «شيرك» دەيتىن ءدىني كوزقاراس ۇستاناتىن جات ءوڭدى جاستار دا شىقتى. اسكەردەگى تارتىپسىزدىك پەن باسسىزدىقتىڭ سالدارىنان قازا قۇشقان وعىلاندار دا از ەمەس. سونداي قاتىگەزدىككە قاراپ جۇرت بالاسىن اسكەرگە جىبەرمەيتىن حالگە جەتكەن. وسىنىڭ ءبارى مەملەكەتشىل تۇلعا، بۇگىنگى قورعانىس ءمينيسترى – يمانعالي تاسماعامبەتوۆتىڭ باسشىلىققا كەلۋىمەن تۇزەلەدى، جاڭا ساپاعا كوشەدى، قازاق اسكەرىنىڭ ساپىندا بولۋ ءار جاستىڭ كوكەيىندەگى اسقاق ارمانعا، پاتريوتتىق سەزىمگە اينالادى دەگەن سەنىم بار.

ەستەرىڭىزگە سالا كەتەيىك، قازاق جەرىندەگى اسكەري پوليگونداردىڭ كوبىن رف-نىڭ قورعانىس مينيسترلىگى جالعا الىپ، يەلىك ەتىپ كەلەدى. سايكەسىنشە، جەرىمىزدە «جاۋىنگەرلىك دوستاستىق» اياسىندا اسكەري وقۋ-جاتتىعۋلار جىلىنا ەكى رەت ءوتىپ تۇرادى.  

Abai.kz