تاياۋ بولاشاقتا ەۋرو وداق پەن ەۋرازيالىق ەكونوميكالىق وداق اراسىندا ءوزارا ىقپالداستىققا قۇرىلعان ارىپتەسىتىك قارىم-قاتىناس ورناۋى  مۇمكىن. جاميعاتتىڭ قۇلاعىنا جاعىمدى ەستىلەتىن وسىنداي ءبىر ءسوز بۇگىن اقپارات كوزدەرىندە ايتىلىپ قالدى. ارينە، قىرىمدى الىپ، ۋكراينانىڭ شىعىس ايماعىندا بۇلىك سالىپ جۇرگەن سەپاراتيستەردى قولداپ وتىرعان رف-مەن ەۋرو وداقتىڭ تاپ بۇگىن ەرتەڭ قول الىسىپ، قولتىقتاسا قويۋى ەكىتالاي. الايدا، رەسەيدىڭ كوگىلدىر وتىنى مەن مۇنايىنا بەلگىلى ءبىر دەڭگەيدە ەكونوميكالىق تۇرعىدان تاۋەلدى ەۋرو وداق ۋكرايناداعى ساياسي وقيعالار سايابىر تاپسا، ءبىزدىڭ سولتۇستىكتەگى كورشىمىزبەن ءتىل تابىسىپ، اتالعان قاۋىمداستىقتاردىڭ شەڭبەرىندە جۇمىس ىستەۋى ابدەن مۇمكىن. ونىڭ ۇستىنە، قازاق مۇنايى دا رف تەرريتورياسى ارقىلى تاسىمالدانادى. قالا بەردى، باتىس پەن قازاقستان اراسىنداعى ساۋدا اينالىمى رەسەيمەن سالىستىرعاندا جوعارى. مىسالى، بىلتىرعى جىلعى قازاقستان – ەۋرو وداق اراسىنداعى تاۋار اينالىمى - 53 ميلليارد دوللاردى قۇراسا، رەسەيمەن الىس-بەرىستىڭ شەگى – 28 ميلليارد دوللارعا تۇراقتاعان. قىتايمەن ساۋدا-ساتتىقتىڭ كولەمى تيىسىنشە – 23 ميلليارد دوللاردى كورسەتىپتى. بۇنىڭ سىرتىندا، ەۋرو وداقپەن دوستىق راۋىشتەگى بايلانىستا بولۋعا رەسمي استانا، اسىرەسە، مۇددەلى بولسا كەرەك. ويتكەنى، قر پرەزيدەنتى ەاەو-نى «ەكونوميكالىق ۇيىم» دەپ ايتقان سايىن رف پرەزيدەنتى وعان ساياسي بوياۋ جۇقتىرىپ باعۋدا. اتالعان وداققا مۇشە ەلدەردىڭ ءبىرى – بەلارۋس رەسپۋبليكاسىنىڭ پرەزيدەنتى لۋكاشەنكو دا ەكونوميكالىق وداقتىڭ ساياسي سيپات الىپ كەتۋىنەن قاۋىپتەنەدى. دەمەك، ەاەو-نىڭ وقشاۋلانىپ ءومىر سۇرمەۋى ءۇشىن وعان ەو ەلدەرى مەن نازارباەۆ-لۋكاشەنكو تاندەمى بارىن سالادى.

ايتپاقشى، رەسەي قاڭتار-اقپان ايلارىندا ەۋروپادان تاسىمالداناتىن تاۋارلارعا كەدەندىك وداق پەن ەاەو-نىڭ رەگلامەنتتەرىنە سۇيەنىپ شەكتەۋلەر قويۋعا تىرىسقان كەزدە، قازاقستان مەن بەلارۋس تاراپى اشىق قارسىلىق بىلدىرگەن بولاتىن. وتكەن جىلدىڭ جەلتوقسان ايىندا قازاقستانعا ارنايى ساپارمەن كەلگەن فرانتسۋز پرەزيدەنتى فرانسۋا وللاند مىرزامەن كەزدەسۋ بارىسىندا دا نازارباەۆ قازاقستاننىڭ ەو-دان قول ۇزگىسى كەلمەيتىندىگىن اشىق ايتقان ەدى. قر پرەزيدەنتى وسى ءسوزىن گەرمانيانىڭ سىرتقى ىستەر ءمينيسترى فرانك-ۆالتەر شتاينمايەرمەن كەزدەسۋ بارىسىندا دا ەسكەرتتى.

پۋتين قانشا جارماسقانىمەن ەاەو-نىڭ كىندىك اكەسى – نازارباەۆ ەكەنى مۇقىم جۇرتقا ءمالىم. «كىندىك اكەنىڭ» وسى ءبىر ۇيىمدى ومىرگە اكەلۋگە قانشاما ۋاقىتىن سارپ ەتكەندىگى دە ەل ەسىندە. وعان كەرەك دەسەڭىز، ەلتسيننىڭ ءداۋىرى دە كۋا بولا الادى. ەندى «كىندىك اكە» ءوزى مۇرىندىق بولعان وداقتى ەو-مەن سەرىكتەس ەتۋگە دە ەرىكتى. ەو مەن ەاەو سەرىكتەستىگى. بۇل – شىندىققا اينالسا، ءسوز جوق، جاقسى سەرىكتەستىك بولار ەدى.

Abai.kz