كورشى وزبەك ەلى باستى ساياسي تاڭداۋىن جاساپ ۇلگەردى. الا تاقيالى اعايىن پرەزيدەنت سايلاۋىنا ءبىر كىسىدەي داۋىس بەرۋدى اياقتاپ، ەندىگى قورىتىندى شەشىمنىڭ جاريا بولۋىن كۇتىپ وتىر...

وزبەكستاننىڭ وسك-ءسى «ناۋقان ەشقانداي زاڭ بۇزۋشىلىقسىز، زاڭ تالاپتارىنا ساي ءوتتى» دەپ كەسىپ ايتۋدا. سىرت كوز دە باس جارىپ، كوز شىعاراتىنداي مالىمدەمە جاساپ جاتقان جوق. جالپى، ۇلكەن ساياساتتا ىشكى سىرىن الدىرمايتىن، اكىمشىلىك باسقارۋدا دا اككى جول ۇستاناتىن قازىرگى ەل باسشىسى يسلام كاريموۆتىڭ 25 جىلعا جۋىق بيلىگى تۇسىندا بۇل ەلدەگى كەز كەلگەن سايلاۋ تۋرالى اقپاراتتان اششىمال ءيىس شىققان ەمەس... ءھام بۇعان دەيىنگى دودالاردا شاشاسىنا شاڭ جۇقپاي وزا شاپقان جالعىز جەڭىس يەسى... كاريموۆتىڭ كانديداتۋراسى عانا بولاتىن.

وسى جولى دا سولاي بولۋى بەك مۇمكىن. ويتكەنى، كاريموۆپەن تاق تالاسىنا بارعان ۇمىتكەرلەر اراسىندا بيلىكتى بىردەن جۇلىپ اكەتەتىن سالماقتى ساياساتكەر جوققا ءتان. قازىرگى داۋىسقا تۇسكەندەردىڭ اراسىندا (وزبەكستان حالىقتىق-دەموكراتيالىق پارتيا باسشىسى حاتامجان كەتمونوۆ، «ادولات» سوتسيال-دەموكراتيالىق پارتياسى اتىنان ناريمون ۋماروۆ جانە «قايتا ورلەۋ» دەموكراتيالىق-ۇلتشىل پارتياسىنان تالاسقا ءتۇسۋشى اكمال سايدوۆ) لايىقتى كانديداتتىڭ جوقتىعىن وزبەك ساياساتكەرلەرىنىڭ وزدەرى ايتىپ جۇرگەن ەدى. ءتىپتى، اتى اتالعان پارتيالار رەسمي بيلىكتىڭ قولىنان جەم جەپ وتىرعان ۇيىمدار دەگەن پىكىرلەر دە جوق ەمەس. دەمەك، بۇل سايلاۋدا يسلام اكانىڭ جۇلدىزدى ءساتى تاعى دا تۋىپ تۇرعانعا ۇقسايدى!

قالاي بولعاندا دا، وزبەكستاننىڭ ساياسي بيلىگى الداعى 7 جىل بويىنا سالماقتى ءارى سەنىمدى ادامنىڭ قولىنا كوشكەنى ايماقتاعى ەلدەر ءۇشىن اسا ماڭىزدى. اسىرەسە، ىرگەدەگى ءتۇبى ءبىر اعايىن سانالاتىن ءبىز ءۇشىن وزبەكستاننىڭ تىنىشتىقتا جانە تابىستى بولۋى ەكى باستان قولايلى. «وزبەكتىڭ دە ءوز دەگەنى بار...» بىراق، شىعىستا قۇمىرسقاداي قىتاي، سولتۇستىكتە ورمانداي ورىس وتىرعاندا كاريموۆتىڭ قازاقستانعا قاتىستى ساياساتى قايتا قاراۋعا جاتپايتىن تاڭداۋ بولىپ قالا بەرۋى ءتيىس.

Abai.kz