الەۋمەتتىك جەلىلەردە قر پرەمەر-ءمينيسترى كارىم ءماسىموۆتىڭ قوعامدىق كولىككە ءمىنىپ، استانا كوشەلەرىن كەزىپ جۇرگەنى تۋرالى ءسوز گۋلەپ تۇر.

مىسالى، جۋرناليست ەلتاي داۋلەنوۆ: «كارىم ءماسىموۆ «تۇقشىرايىپ» الىپ بۇگىن 48-اۆتوبۋسقا مەنىمەن بىرگە ءمىندى. اۆتوبۋسقا كىردى، جولاقىسى تولەنگەن بيلەتىن كوندۋكتورگە كورسەتتى. ءسويتتى دە، الدەقانداي ءبىر ويعا بەرىلىپ، تەرەزەدەن سىرتقا كوز سالدى... سوسىن، 7-ەمحانانىڭ قاسىنان ءتۇسىپ قالدى. كارىم قاجىمقانۇلى، مەن ءسىزدى ءبارىبىر تانىپ قويدىم» دەپ جازادى.

ال، رەسمي اقپارات كوزدەرى ءماسىموۆتىڭ سينگاپۋردە، مارقۇم لي كۋان ءيۋدى جەرلەۋ راسىمىنە قاتىسىپ قايتقانى تۋرالى ايتادى. ايتسە دە، مىنا ءبىر بەيتانىس جاننىڭ قر ۇكىمەتىنىڭ باسشىسىنا ۇقساستىعى عاجاپ ۇقساستىق رەتىندە باعالانىپ، الىپ-قاشپا اڭگىمەلەرگە وزەك بولۋدا. سول كوپ اڭگىمەنىڭ ءبىر پاراسى: راسىندا مىنا ادام – ءماسىموۆتىڭ ءوزى دەگەنگە سايادى. ويتكەنى، قر پرەمەر-ءمينيسترىنىڭ قۇپيا ومىرىندە «نۇربانۋ» دەگەن ەسىممەن رف مەن قىتايدىڭ بارلاۋ قىزمەتىندە بولعانى جايىندا ءجيى ايتىلادى.

كىم بىلەدى، بالكىم، از ۋاقىتتىڭ ىشىندە قارىشتاپ دامىعان سينگاپۋر سياقتى ەلگە بارىپ قايتقان ءماسىموۆ باياعى ھارون پاتشانىڭ كەيىپىنە ەنىپ، جۇدەۋ كيىنىپ، كوشە ارالاپ، ەلدىڭ جايىن ءوز كوزىمەن كورىپ، ءبىلىپ جۇرگەن شىعار...

Abai.kz 

(سۋرەتتەر جۋرناليست جانكەلدى قارجاننىڭ facebookتەگى پاراقشاسىنان جانە primeminister.kz سايتىنان الدىندى.)