بۇگىن قازاقستان پرەزيدەنتتىگىنە كانديدات نۇرسۇلتان ءابىشۇلى نازارباەۆتىڭ رەسپۋبليكالىق قوعامدىق شتابى مۇشەلەرى ايماقتار بويىنشا ناسيحات جۇرگىزۋ ءۇشىن جولعا شىقتى.

وسى ورايدا ناسيحات توبىنىڭ ەڭ الدىمەن قاراعاندى وبلىسىنا ات باسىن بۇرۋى بەكەر ەمەس. سەبەبى، ۇلت كوشباسشىسىنىڭ ەڭبەك جولى ءدال وسى جەردەن باستاۋ العان بولاتىن.

دەلەگاتسيا قۇرامىندا – رەسپۋبليكالىق قوعامدىق شتاب جەتەكشىسى مۇحتار قۇل-مۇحاممەد، قازاقستان پاتريوتتارى پارتياسىنىڭ توراعاسى عاني قاسىموۆ، «اق جول» دەموكراتيالىق پارتياسىنىڭ توراعاسى ازات پەرۋاشەۆ، «بىرلىك» پارتياسىنىڭ توراعاسى سەرىك سۇلتانعالي، «اتامەكەن» ۇكپ باسقارما توراعاسى ابىلاي مىرزاحمەتوۆ، قحا توراعاسىنىڭ ورىنباسارى اناتولي باشماكوۆ، قوعام قايراتكەرى ورالباي ابدىكارىم، ءماجىلىس دەپۋتاتتارى مايرا ايسينا، اسقار بازارباەۆ، مۇحتار تىنىكەەۆ جانە سەرىكجان قاناەۆ، سەنات دەپۋتاتى مۇحتار التىنباەۆ، قازاق تاعامتانۋ اكادەمياسىنىڭ پرەزيدەنتى تورەگەلدى شارمانوۆ، وليمپيادا چەمپيونى سەرىك ساپيەۆ جانە باسقا دا تانىمال قازاقستاندىقتار بار.

ەلىمىزدىڭ ءوندىرىس ورتالىعىندا ايماق اكتيۆتەرىمەن، ستۋدەنت جاستارمەن، كاسىپكەرلەرمەن، «ارسەلور ميتتال تەميرتاۋ» اق شاحتەرلەرىمەن جانە ەتنومادەني بىرلەستىكتەردىڭ وكىلدەرىمەن بىرقاتار كەزدەسۋلەر ءوتتى.

قاراعاندىلىقتار ۇدەمەلى يندۋستريالىق-يننوۆاتسيالىق دامۋ باعدارلاماسى ءۇشىن نۇرسۇلتان ءابىشۇلى نازارباەۆقا العىس ءبىلدىردى. وسى باعدارلاما اياسىندا سوڭعى 5 جىلدا وبلىستا 59 كاسىپورىن ىسكە قوسىلىپ، 5000 جاڭا جۇمىس ورنى اشىلدى.

ايماقتىڭ قوعام قايراتكەرى تاتيانا ساۆيتسكايا قازاقستاندىق ايەلدەر قاۋىمى اتىنان ەلىمىزدە ورناعان بەيبىتشىلىك، تۇراقتىلىق پەن تىنىشتىق ءۇشىن نۇرسۇلتان ءابىشۇلى نازارباەۆقا شەكسىز ريزاشىلىعىن جەتكىزدى.

رەسپۋبليكالىق قوعامدىق شتاب جەتەكشىسى اتاپ وتكەندەي، ۇلت كوشباسشىسى نۇرسۇلتان ءابىشۇلى نازارباەۆتىڭ ساياساتىنىڭ ارقاسىندا قازاقستان ەلىمىزدى دامۋدىڭ جاڭا دەڭگەيىنە كوتەرەتىن ۇلى وزگەرىستەرگە قاراي قادام باسقالى تۇر.

كەزدەسۋلەرگە مىڭداعان قاراعاندىلىق قاتىستى. ءوز سوزدەرىندە ولار مەملەكەت باسشىسى نۇرسۇلتان ءابىشۇلى نازارباەۆتىڭ ساياساتىنىڭ ارقاسىندا قازاقستان زور جەتىستىكتەرگە قول جەتكىزگەنىن اتاپ ءوتتى.

حالىق مەملەكەتىمىزدى مىقتى كوشباسشى باسقارعانىن قالايدى. سول سەبەپتى ورتالىق قازاقستاننىڭ تۇرعىندارى ءبىراۋىزدان 2015 جىلى 26 ساۋىردە رەسپۋبليكامىزدىڭ گۇلدەنۋى ءۇشىن، ياعني، نۇرسۇلتان ءابىشۇلى نازارباەۆ ءۇشىن داۋىس بەرەتىندەرىن ءمالىم ەتتى.

اباي-اقپارات.